1 Atzun jlu t-xe'tlen tkanil ba'n in yolin ti'j Jesucrist, aju Tc'wa'l Dios. 2 Ic tza'n tz'iban tuj tu'jil Isaías aju t-sanjel Dios, in tma'n: Lu cxel nsama'ne nsanjele tu'n tcub nej twitza binchalte tbeya. 3 In jaw tk'ajk'ajel twi' jun xjal tuj lugar minti' cynajbil xjal tuj, in tma'n: Cybinchame tbe Kman; cybinchame jun tbe jikun ti'j, chi Isaías. 4 Cyja'tzun ul Juan ex e byan xjal tu'n tuj a' tuj lugar minti' cynajbil xjal tuj, ex in pacban ti'j tu'n tajtz ti'j cyanmi xjal ex tu'n cybyan tuj a', tu'ntzun tnajset cyil. 5 E tzajtzun cycyakil xjal tuj tx'otx' Judey, cyuc'ix cycyakil xjal tuj tnam Jerusalén, e pon tuc'il Juan; tej tjatz cypa'n cyil cycyakiltzun e byan tu'n Juan tuj nima Jordán. 6 In bettok Juan toc t-xbalun ttzmal chej camey, ex tz'u'm c'albil tc'u'j toc, ex ẍplon twa in xi' tuc'ix ta'l cab tuj tze'. 7 Ex in pacban Juan cye xjal in tma'n cyja': —At jun xjal tzul wi'jxiye mas at tipumal nwitze, ex minti' woclene tu'n ncub muc'e'ye pjulte tak'al t-xajab. 8 Ax toc, weye ma che byane wu'ne tuj a'; atzunju tzul wi'jxiye, che byale tu'n tuj junxitl tumel oc cyc'monteye Xewbaj Xjan. 9 Cucxtok cybyan xjal tu'n Juan, etz Jesús tuj tnam Nazaret tuj tx'otx' Galiley, ex o byan Jesús tu'n Juan tuj nima Jordán. 10 Tejtzun tjatz Jesús tuj a', o til jaket ttzi cya'j, ex o til cubil Xewbaj Xjan tibaj, ic que'yin ic tza'n paloma. 11 Ex tzaj jun tk'ajk'ajel wibaj tuj cya'j in tma'n: —Aya Nc'wa'le, c'ujla'nxixa wu'ne; in chin tzalaje ti'ja. 12 Ex jurat naj xi k'i'n Jesús tu'n Xewbaj Xjan, pon k'i'n tuj jun lugar minti' cynajbil xjal tuj. 13 Ex axtzun o cyaj ten 40 k'ij tuj lugar minti' cynajbil xjal tuj, o ten cyxol jil; ex oc tuj joybil ti'j tu'n Satanás, ex e ul ke anjel tuc'il tu'n cyajben te. 14 Otok tz'ocx k'o'n Juan tuj pres tej tpon Jesús tuj Galiley in pacban ti'j tkanil ba'n ti'j tcawbil Dios. 15 Chi Jesús: —Ma japun tk'ijlalil ex ma tzul lak'e' tk'ijlalil tu'n tcawin Dios; tajtz ti'j cyanmiye ex cyocslame tkanil colbil. 16 In bettok Jesús ttzi laguna tuj Galiley, o til Jesús Simón tuc'ix Andrés aju titz'in Simón, in cu'x cyk'o'n xyub tuj a' te tzuybil cyiẍ, porque tzyul cyiẍ ke. 17 Xitzun tma'n Jesús cye: —Che lpe'tze wi'je, che oqueltzun nk'o'ne te tzyul xjal ic tza'n in che tzyet cyiẍ cyu'ne. 18 Jurattzun cyaj cyk'o'n cyxuyb, e oc lpe' ti'j Jesús. 19 Ic'tzun Jesús, xi lak'e' ch'intl, ex o til Jesús Jacobo aju tcy'ajal Zebedey, tuc'ix Juan aju terman Jacobo, ate'tok tuj barc in che xbukin cyxuyb. 20 Jurattzun e tzaj ttxco'n Jesús; cyajtzun cyk'o'n cyman tuj barc, aju Zebedey tbi, cyuc'ix ke majen, e octzun lpe' ti'j Jesús. 21 E pontzun tuj tnam Capernaum; ocx Jesús tuj ja te c'ulbil tuj k'ij te ojlabl, ex xi tk'o'n xnak'tzbil cye xjal. 22 Ex e labin xjal ti'j ju t-xnak'tzbil; porque at toclen tu'n t-xi tk'o'n xnak'tzbil, ex mya ic tten t-xnak'tzbil ic tza'n cye xnak'tzal ti'j ley. 23 Pero at jun xjal tocx tuj ja te c'ulbil at ju'ẍ tuj tanmi, jaw sch'in, 24 ex tma cyja': —¿Ti toclena ki'je, Jesús aj Nazaret? ¿Maj ma tzula tu'n knaje tu'na? Ba'n wu'ne alcyeya, aya xjan Tc'wa'l Dios, chi ju'ẍ. 25 Xi tmayo'n Jesús aju ju'ẍ: —C'ol ttzi'ya, cu tetza tuj tanmi xjal, chi Jesús. 26 Atzunte xjal jaw lu'lunxix wen tu'n tipumal ju'ẍ; etztzun ju'ẍ tuj tanmi xjal in sch'in wen. 27 Cycyakiltzun xjal e labin ti'j, cyja'tzun e oc ten yolil ti'j cyxolx, in cyma'n: —¿Ti t-xilen jlu? ¿Ti tten ju ac'aj xnak'tzbil lu? Porque at toclen xjal lu tu'n tcawin cyi'j ju'ẍ, ex in xi niman tyol cyu'n, che chi xjal. 28 Jurat naj el tkanil Jesús tuj tcyakil lugar tuj tx'otx' Galiley. 29 Tejtzun cyetz Jesús tuj ja te c'ulbil, e pon cyja Simón ex Andrés, tuc'ix Jacobo pon ex Juan. 30 Ex aju xu'j tji' Simón yabtok tu'n cyak, tx'ayl twi' watbil; jurattzun xi cyma'n te Jesús ti'j yab. 31 Pontzun lak'e' Jesús ttxlaj, jaw ttzyu'n tk'ab ex jaw twaban; jurat naj ic' cyak ti'j, ex oc ten xu'j ajbel cye. 32 Tejtzun toc kax, otok tz'ex k'ij, ul cyi'n xjal cycyakil yab tuc'il Jesús, cyuc'ix keju at ju'ẍ tuj cyanmi. 33 Cycyakil xjal tuj tnam pon cychmon cyib ttzi ja. 34 Nimcu xjal yab e bant tu'n Jesús, ela' txcaj cyyabil, ex nimcu ju'ẍ e je'tz tlajo'n Jesús tuj cyanmi xjal; minti' xi tk'o'n Jesús ambil tu'n cyyolin ju'ẍ, porque ba'n cyu'n alcyete Jesús. 35 Jaw we' Jesús primxix, atx kwitz, etz tuj tnam, xi' na'l Dios tuj jun lugar minti' cynajbil xjal tuj. 36 Xi'tzun Simón cyuc'ix keju ate' tuc'il jyolte Jesús. 37 Tejtzun tcnet cyu'n, xi cyma'n te: —Cycyakil xjal in che jyon ti'ja, che chi. 38 Xitzun tma'n Jesús cye: —Ko'ke cyuj ke lugar nikayin ate' ax icx tu'n t-xi npacba'ne tyol Dios cye xjal; porque atzun wak'une ma chin ule. 39 Xi'tzun Jesús ex baj tbetin tuj tcyakil tx'otx' Galiley in pacban cyuj ja te c'ulbil; ex e je'tz tlajo'n Jesús ke ju'ẍ at tuj cyanmi xjal. 40 Ultzun jun xjal tuc'il Jesús, nim tx'a'c ti'j minti' k'anbil ti'j, o cubsan twitz Jesús ex cub ẍmeje': —Ka taja, jacu chin banixe tu'na, chi xjal. 41 Tzajtzun k'ak'an tc'u'j Jesús ti'j, xi tnukpi'n tk'ab oc tmaco'n ti'j: —Wajbile, bi'x cbantela, chi Jesús. 42 Tejtzun t-xi tma'n Jesús ju yol lu, bi'x el ju tx'a'c ti'j xjal ex cyaj banix. 43 Txi'ya, chi Jesús te xjal. Pero xi tcyuwsa'nxix te: 44 —Mi'n txi tma'na cye xjal; nok o'cx txi'ya ex yec'unx tiba twitz pal, ex k'onxa jun oyaj tu'nju ma banixa, ic tza'n cyaj tma'n Moisés, tu'n tel cynic' xjal ti'j ka ma banixa. 45 Tejtzun tex ju xjal, oc ten k'ol tkanil, xi tma'n cye cycyakil aju otok tbincha Jesús te. Cyja'tzun tten minti'tl ocx tyec'un tib Jesús tuj junjun tnam; atzun o ten ti'jxi tnam cyuj ke lugar minti' cynajbil xjal tuj; pero e pon ke xjal tuc'il e tzaj tuj tcyakil lugar.
Copyright ℗ 2000 Hosanna Grabado por Producciones Cristianas Vina