MALAQUÍAS 2

1Atzun ja'lo akeye pal, chi Kman in tma'n cyeye cyja': 2Ka minti' ma chinx cynimane ex ka minti' ma jaw cynimsa'ne nbiye axix toc cyu'ne, ctzajel nsama'ne mya ba'n cyibaje te t-xel ju cy'iwbil o txi nk'o'ne cyeye nej, ex ya ma tzaj mya ba'n cyibaje wu'ne porque minti' in jaw cynimsa'ne nbiye. 3Chin k'ojile cyi'j cyiyjile ex c'oquel nxo'ne cytxa' alumaj tibaj cywitze, akeju in che cub cybyo'ne te cyoyaje weye, ex junx che elex nxo'ne ti'jxi tuc'il cytxa' alumaj. 4Atzun c'elel cynic'e ti'j ka akine in chin k'mante ju yol lu, tu'ntzun cucx tu'n tten tipun ju yol cyaj bant ti'j wu'ne cyuc'il ke tiyjil Leví, chi Kman aju Tajaw Tcyakil. 5Aju nyole cyaj bant ti'j cyuc'il aj Leví, atzun jlu: Tu'n tten cychwinklal ex tu'n cyten tuj tzalajbil. Xi nk'o'ne ke jlu tu'ntzun tbant cyxob nwitze ex tu'n cyniman weye; e niman weye ex e xob nwitze. 6Xi cyk'o'n aj Leví xnak'tzbil axix toc, ex misicyer jun yol mya ba'n etz tuj cytzi'. E bet mojl cyyol wuc'ile ex e bet tz'aklxix nwitze, ex nimcu xjal cyaj cycolin cybinchben mya ba'n nok cyu'n. 7Atzun cyak'un pal, tu'n t-xi cyk'o'n xnak'tzbil cye xjal tu'n tel cynic' wi'je; ex cycyakil xjal ba'n tu'n cyul c'mol xnak'tzbil cyuc'il, porque nsanjele ke jlu, akine Cymane aju Tajaw Tcyakil. 8Pero akeye pal ma tz'el cypa'n cyibe ti'j be tbanilxix; nimcu ma che cub tz'ak tu'n cyxnak'tzbile mya ba'n ex ma baj cytzacsine nyole aju cyaj bant ti'j wu'ne cyuc'il aj Leví. 9Cyja'tzun oc nbincha'ye tu'n cyel ic'une cyu'n cycyakil xjal ex tu'n cyoc k'o'ne te minti' cyajbene tu'nju minti' in che bete tuj nbeye, ex oc t-xi cyma'ne nleye cye xjal nno'c cyque'yine aju cyxilen, chi Kman aju Tajaw Tcyakil. 10¿Baka mya junx Kman kcyakil? ¿Baka mya a Dios o binchante ke kcyakil? ¿Tiku'n in baj ksbun kib kxolx ex in nno'c kk'o'n te minti' tajben aju yol cyaj bant ti'j tu'n Dios cyuc'il kxe'chel? 11Minti' ma japun cyu'n aj Judá aju yol xi cytziyan te Dios tu'n cyajben te, ex tuj Jerusalén ex cyxol aj Israel in cybincha'n aju mas plojxix. Aju tja Dios c'ujla'nxix tu'n ma tz'oc cyk'o'n aj Judá te minti' tajben, ex ke xinak aj Judá ma che jaw moje' cyuc'il ke xu'j in che c'ulun cye junxitl dios, akeju mya dios ke. 12Ke xjal lu cyuc'ix ke cyiyjil che najxwit tu'n Kman, tu'ntzun mya cucx tu'n cyten kxol akeju in cybincha'n mya ba'n, nok alcyex ke ex masque tzaj cyi'n cyoyaj te Kman, aju Tajaw Tcyakil. 13Mya nok o'cx jlu, ax icx at juntl mya ba'n in cybincha'ne. In cub ta'l cywitze tibaj t-altar Kman ex in che ok'e tuc'il tk'ajk'ajel cywi'ye cyuw, tu'nju minti' in xi tc'mo'n Kman cyoyaje tuc'il tzalajbil. 14Ex cucx in cyma'ne: ¿Tiku'n minti' in xi c'mo'n koyaje? Che chiye. Porque ax te Kman testiw cyi'je tu'nju minti' ma japun cyu'ne aju yol xi cytziyane te cyxu'jile, akeju e moje'ye cyuc'il tej cu'xunx keye. Akeju xu'j lu atzun cymoje, ex xi cytziyane cye tu'n cyc'ujlanteye ex tu'n cymoje'ye cyuc'il te jumajx. 15¿Myapetzun ax Dios aju binchante t-ximlal xjal ex t-xew, tza'nx ke xinak ax icx ke xu'j, tu'ntzun cyoc te junx? ¿Alcyetzun taj Dios? Atzun taj Dios, tu'n cyajben ke cyiyjile te. Cyja'tzun, cycwentin oc cyibe ex japunx cyu'ne aju yol xi cytziyane te cyxu'jile tej k'apojxtok ke. 16Ate Kman aju Dios cye aj Israel chi in tma'n: Cyk'o'nque cwent cyi'je ex mi'n cub cyximane tu'n tcyaj cycoline cyxu'jile; porque ic'un wu'ne aju xjal in cub tpa'n tib tuc'il t-xu'jil ex nne'l tic'un, chi Kman aju Tajaw Tcyakil. 17Ya ma sict Kman tu'n tbinte cyyole, ex atzun cyeye in cyma'ne: ¿Alcyetzun kyole in xi kma'ne te tu'nju ma sict tu'n tbinte kyole? Che chiye. Ma sict Kman tu'nju in cyma'ne ka ba'n tuj twitz akeju in cybincha'n mya ba'n ex in tzalaj cyi'j, ex in cyma'ntle: ¿Jatumtzun ta' ka tz'aklxixte Dios? Che chiye.

will be added

X\