Lucas 5

1At jun k'ij wa'ltok Jesús ttzi laguna Genesaret tbi, nim xjal ul cychmon cyib tuc'il tu'n cybinte tyol Dios. 2Ex o til Jesús cabe barc ate'tok nikayin ttzi laguna; atzun cye tzyul cyiẍ otok che cu'tz tuj barc ex in che tx'jontok cyxuyb te tzuybil cyiẍ. 3Ocxtzun Jesús tuj jun barc aju te Simón, ex cubsan twitz Simón tu'n tex tlak'ba'n ch'in barc ttzi tx'otx'. Jurat cub ke' Jesús tuj barc ex octzun ten k'ol xnak'tzbil cye xjal. 4Tejtzun tjapun baj tyol Jesús xi tma'n te Simón: —Tocx lak'e'ya tuj laguna ex cyk'oncuxe cyxuybe tu'n tjatz cyiẍ. 5Xi ttzak'we'n Simón: —Xnak'tzal, ma tz'ex ak'bil ku'ne in ko ak'nane, ex minti' cyiẍ ma tzyet ku'ne; pero nok tu'nju ma tzaj tma'na, cbelex nk'o'ne xyub, chi Pedro. 6Tejtzun tcu'x cyk'o'n, tzyet nim cyiẍ cyu'n, ch'ixtok tlakj cyxuyb. 7Xitzun cyyec'un cyk'ab cye cyuc'il, akeju ate'tok tuj juntl barc, tu'n cytzaj onil cye. E ultzun ex e baj noj cycabil barc cyu'n cyiẍ, cyja'tok cyaj mulk'aj tjak' a' tu'n cyalil cyiẍ. 8Tejtzun tlonte Simón Pedro jlu, cub ẍmeje' twitz Jesús ex xi tma'n: —Pa'mil tiba wi'je Tat, porque akine jun xinak aj il. 9Porque otok tzaj nim t-xobil Simón, tu'nju nim cyiẍ otok tzyet cyu'n, ax icx cycyakil keju ate'tok tuc'il tzaj cyxobil. 10Ax icx tzaj t-xobil Jacobo tuc'ix Juan, akeju tcy'ajal Zebedey, akeju tuc'il Simón. Atzunte Jesús xi tma'n te Simón: —Mi'n xoba; texju ja'lo c'oquela te tzyul xjal ic tza'n in che tzyet cyiẍ. 11Tej tetz cyi'n barc ttzi tx'otx', cyaj cyk'o'n tcyakil, ex e oc lpe' ti'j Jesús. 12Tej attok Jesús tuj jun tnam, lu jun xinak nim tx'a'c ti'j minti' k'anbil ti'j, tej tlonte xjal Jesús cub ẍmeje' twitz ex pon tacl tibaj twitz max twitz tx'otx' ex o cubsan twitz: —Tat, ka tajbila jacu chin banixe tu'na, chi xjal. 13Xitzun tnukpi'n Jesús tk'ab, oc tmaco'n, ex xi tma'n: —Wajbile. Bi'x cbantela, chi Jesús. Ex jurattzun el tx'a'c ti'j xjal. 14Ex xi tma'n Jesús te tu'n mi'n t-xi tma'n cye xjal. O'cx xi tma'n: —Txi'ya ex yec'unx tiba twitz pal cye judiy, ex k'onxa ju oyaj te tx'ajbil teya ic tza'n o tma Moisés, tu'ntzun tel cynic' xjal ti'j ka ma banixa. 15Pero el lak'e' tkanil ti'j Jesús; ex nim xjal e chmet tu'n cybinte tyol ex tu'n cybanix ke yab tu'n. 16Atzunte Jesús el tpa'n tib cyi'j ex xi' tuj jun lugar minti' cynajbil xjal tuj tu'n tna'n Dios. 17At jun k'ij in tk'o'n Jesús xnak'tzbil cye xjal, ex k'ukl ke'tok ke parisey cyuc'ix ke xnak'tzal ti'j ley, tzajni ke tuj junjun tnam tuj tx'otx' Galiley ex tuj tx'otx' Judey ex tuj Jerusalén; ex attok tipumal Dios tuc'il Jesús tu'n cybanix ke yab tu'n. 18E pontzun junjun xinak k'intok jun xinak cyu'n twitz tcoẍbil, tzkijle'n tyabil, ex o cyajbe tu'n cyocx tuja tu'n tcub cyk'o'n ju yab twitz Jesús. 19Pero minti' cnet cyu'n jatum ba'n tu'n tocx yab tu'n tlaj nim xjal. E jaxtzun twi ja ex el cyi'n cabe xc'o'n tu'ntzun tcu'x ju yab twitz tcoẍbil tu'n tcu'pun cyxol xjal twitz Jesús. 20Ex tej tlonte Jesús ka at cyocslabl xi tma'n te yab: —Aya wuc'il, ke tila ma che najset. 21Atzun ke xnak'tzal ti'j ley ex ke parisey e cub ten ximal ti'j ex cyma: ¿Titzun toclen ju xjal lu? In yolin mya ba'n ti'j Dios. ¿Alcye jun xjal jacu najset il tu'n, myapelo o'cx Dios? 22Eltzun tnic' Jesús ti'j cyximbetz, ex xi tma'n cye: —¿Tiku'n in cub cyximane jlu tuj cyanmiye? 23¿Alcye mas ch'in toca tu'n t-xi nma'ne te xjal lu? ¿Apetzun tu'n t-xi nma'ne: Ke tila ma che najset, ex ka tu'n t-xi nma'ne: We'ctza ex beta? 24Cxeltzun nyec'une cyeye tu'n tel cynic'e ti'j, at woclene twitz tx'otx' tu'n tnajset cyil xjal, akine sc'o'maj kine tu'n Dios tu'n ntene cyuc'il xjal. Xitzun tma'n teju xjal tzkijle'n tyabil: —Teya cxel nma'ne: We'ctza, k'i'nctz tcoẍbila, ex txi'ya tjaya, chi Jesús. 25Jurattzun jaw we' ju yab cywitz cycyakil, jaw ti'n tcoẍbil jatum coẍltok, ex xi'tzun tja in tk'o'n chjonte te Dios. 26Ex cycyakiltzun in che labin nim ti'j, in jaw cynimsa'n tbi Dios; ex tzaj nimxix cyxobil, in cyma'n: —Ja'lo ma kil tbinchben nimxix cyipumal, bajx kil icju. 27Tbajlenxitzun jlu, etz Jesús ex o til Jesús jun peyil pwak Leví tbi k'ukltok ti'j mes tuj ja jatum nne'l peyin pwak te gobierni, ex xi tma'n Jesús te: —Lpetza wi'je. 28Cyajtzun tk'o'n Leví tcyakil, jaw we' ex oc lpe' ti'j Jesús. 29Ex o tbincha Leví jun nintz wa'n tuj tja te Jesús; ex ate'tok nim peyil pwak ex txkantl xjal k'ukl ke'tok ti'j mes cyuc'il. 30Atzun ke parisey cyuc'ix ke cyuc'il, akeju xnak'tzal ti'j ley, tzaj jun cyyol cyi'j t-xnak'tzben Jesús, ex xi cyma'n cye: —¿Tiku'n in che wa'ne cyuc'il peyil pwak ex cyuc'il aj il ex in che c'ane cyuc'il? 31Xi ttzak'we'n Jesús: —Akeju xjal ba'n ke mya il ti'j jun k'anal cye, o'cx keju xjal yab ke. 32Minti' ma chin ule txcol cye xjal tz'aklxix, nok o'cx ma chin ule txcol cye xjal aj il tu'n tajtz ti'j cyanmi. 33Xitzun cyma'n te Jesús: —¿Tiku'n in cub cyyo'n nimcu maj we'yaj ke t-xnak'tzben Juan, ex in che na'n Dios, ax icx in cybincha'n ke cyxnak'tzben parisey, atzun cye t-xnak'tzbena cucx in che wa'n ex in che c'an? 34Xi tma'n Jesús cye: —¿Jacupe cub cyyo'n we'yaj keju otok che txconjtz tuj mejeble'n atxtok chmilbaj cyuc'il? 35Pero tzul tk'ijlalil c'elel k'i'n chmilbaj cyxol; maxitzun cbel cyyo'n we'yaj. 36Ax icx xi tma'n Jesús jun techal cye: —Minti' jun xjal nno'c tk'o'n jun piẍ xbalun ac'aj te xbukbil teju xbalun ma baj. Ka ma tz'oc tk'o'n, c'elel sbit'j ju xbalun ma baj tu'nju xbukbil ac'aj; ax icx aju xbalun ma baj mlay tmojba tib tuc'il xbukbil ac'aj. 37Ex minti' jun xjal in cu'x tk'o'n ac'aj vin tuj jun bols tz'u'm ttx'akan; ka ma cu'x tk'o'n, cbajel sbit'j bols tz'u'm tu'n ac'aj vin, ex cbel kojl vin, ex che najel ke bols tz'u'm. 38Cyja'tzun il ti'j tu'n tcu'x k'ot ac'aj vin tuj bols tz'u'm ac'aj. 39Ex minti' jun xjal in c'an ti'j ojtxi vin ex tajtl ju ac'aj, porque in tma'n: Aju te ojtxi mas ba'n, chi Jesús cye.

will be added

X\