1 At jun k'ij in tk'o'ntok Jesús xnak'tzbil cye xjal tuj tja Dios ex in pacban ti'j tkanil colbil, e pontzun ke nejenel cye pal cyuc'ix ke xnak'tzal ti'j ley ex ke cytijil xjal, 2 ex xi cyma'n te Jesús: —K'mantza keye: ¿ti toclena tu'n tbinchanteya jlu? ¿Alcye ma tzaj k'onte toclena? Che chi. 3 Xitzun ttzak'we'n Jesús: —Icx weye at jun nxjele cyeye; ba'n tu'n ttzaj cytzak'we'ne: 4 ¿Alcye tzaj k'onte toclen Juan tu'n cybyan xjal tu'n tuj a'? ¿Tu'npe Dios, ex ka cyu'n xjal? Chi Jesús cye. 5 Atzun cye e oc ten yolil ti'j cyxolx: —Ka ma txi kma'n: Tu'n Dios tzaj k'o'n toclen Juan, ¿tiku'ntzun minti' xi cyocsla'ne? Chilo ke. 6 Ex ka ma txi kma'n: Cyu'n xjal tzaj k'o'n toclen Juan, jaculo ko cub cybyo'n xjal tu'n abj, porque ocsla'nxix cyu'n xjal ka t-sanjel Dios te Juan. 7 Tzajtzun cytzak'we'n: —Minti' ba'n ku'ne alcye tzaj k'onte toclen Juan tu'n cybyan xjal tu'n. 8 Atzunte Jesús xi tma'n cye: —Icx weye mlay txi nma'ne cyeye alcye ma tzaj k'onte woclene tu'n nbinchanteye tcyakil jlu. 9 Octzun ten Jesús k'malte jun techal lu cye xjal: —At jun xjal cu'x tawa'n txkan uva tuj ttx'otx' ex xi tk'o'n xjal tx'otx' te cymajen xjal, xi'tzun tuj juntl lugar, ex o ten nim k'ij. 10 Tejtzun tpon tk'ijlalil tu'n tcub twitz awal, tzaj t-sama'n xjal jun majen cyuc'il majenal tx'otx', tu'n t-xi cyk'o'n ch'in twitz awal te; atzun cye majenal tx'otx' baj cyc'ixbisa'n ex aj cysama'n minti' ch'in k'i'n tu'n. 11 Ex tzaj t-sama'n tajwil tx'otx' juntl majen; atzun cye majenal tx'otx' baj cyyaso'n, baj cyc'ixbisa'n ex aj cysama'n minti' ch'in k'i'n tu'n. 12 Ex tzaj t-sama'n tajwil tx'otx' juntl majen; atzun cye majenal tx'otx' baj cyc'ixbisa'n ex ex cylajo'n ti'jxi. 13 Atzunte tajwil tkan awal tma: ¿Ti oc nbincha'ye? Mejor cxel nsama'ne nc'wa'le aju c'ujla'nxix wu'ne; kapelo at ch'in tchi tuj cywitz oc tpon, chi patrón. 14 Atzun cye majenal tx'otx' tej cylonte cyja ttzaj tc'wa'l patrón, e oc ten yolil ti'j cyxolx: Atzunte etzal jlu; chux keye, kbyoncu tu'ntzun tcyaj ten tetzbil te ke, che chi. 15 Extzun cyi'n ti'jxi tkan awal, ex cub cybyo'n. —¿Titzun oc tbincha' aju tajwil tkan awal cyi'j? 16 Ctzajeltzun ex che bel tbyo'n ke majenal tx'otx', ex cxel tk'o'n ttx'otx' te cymajen txkantl xjal, chi Jesús xi tma'n cye. Tejtzun cybinte parisey jlu, cyma: —Cuchiwt mi'n japun jlu. 17 Atzunte Jesús e je'x tque'yin, ex xi tma'n cye: —¿Titzun t-xilen aju yol tz'iban tuj Tu'jil? Porque in tma'n: Aju abj el cyic'un ke binchal ja, atzunju ma tz'oc te scyini te simyent. 18 Alcye jun xjal ma jaw tolj ex ma cub tz'ak tibaj abj lu, bi'x cbajel tokj; ex alcye jun xjal ma cub tz'ak abj lu tibaj, bi'x cbajel buchj xjal tu'n, chi Jesús cye. 19 Atzun cye nejenel cye pal cyxol xjal judiy cyuc'ix ke xnak'tzal ti'j ley o cyajbe bi'x tu'n ttzyet Jesús cyu'n, porque canun tuj cynabl ka cyibaj otok cub tz'ak ju techal lu aju tma Jesús; pero tzaj cyxobil cywitz xjal. 20 Entons e cub ten xk'ukil te Jesús, ex e je'x cysama'n cabe xjal bil tyol, oc cyk'on cyib mejor xjal ke pero mya ax toc cyu'n, o cyajbe tu'n tcub tz'ak Jesús cyu'n tujx jun tyol, tu'ntzun t-xi cyi'n ex tu'n t-xi cyk'o'n tuj tcwent gobernador. 21 Atzun cye xi cykanin te Jesús: —Xnak'tzal, ba'n ku'ne in yolina tuj tumelxix ex in tk'o'na xnak'tzbil ba'n, ex minti' nno'c tque'yina aju t-xilen xjal, nok o'cx in tk'o'na xnak'tzbil tza'n tten tu'n kbete tuj ju be in tzaj tyec'un Dios. 22 K'mantza: ¿ba'npe tu'n t-xi kk'o'ne chojenj in tkanin gobierni te Rom, ex ka mi'n? Che chi. 23 Eltzun tnic' Jesús ti'j cyximbetz mya ba'n, ex xi tma'n cye: —[¿Tiku'n in che jyone tumel wi'je?] 24 Cyyec'untze jun pwak weye. ¿Al e tilbilal toc twitz, ex al e biybaj tz'iban twitz? —Te gobierni, che chi. 25 Xitzun tma'n Jesús cye: —Pwes cyk'onxe te gobierni aju te gobierni, ex cyk'onxe te Dios aju te Dios. 26 Ex minti' cub tz'ak Jesús cyu'n tujx jun tyol cywitz xjal; o'cx e labin ti'j ju tzak'webl tu'n Jesús, ex minti'tl e k'ajt. 27 E pontzun junjun xjal sadusey tuc'il Jesús, akeju in cyma'n ka mlay jatz ank'in jun xjal cyxol cyimni, ex xi cykanin te: 28 —Xnak'tzal, che chi, at jun yol cyaj ttz'iban Moisés ke: Ka at jun xjal ma cyim at t-xu'jil ex minti' jun tc'wa'l otok tzaj, ax ju titz'in cmojebel tuc'il t-xu'jil ktzan ttzic, tu'ntzun tcyaj jun t-xel ktzan ttzic tu'n, tu'n mi'n tnaj tiyjil. 29 At wuk xjal e ten cyitz'in cyib; aju tnejel cnet t-xu'jil, ex o cyim minti' jun tc'wa'l cyaj. 30 Ax ju xu'j jaw ti'n tz'inbaj te t-xu'jil, pero ax icx o cyim, minti' jun tc'wa'l cyaj. 31 Ex ax ju xu'j jaw ti'n tcabin tz'inbaj te t-xu'jil, ex elpun baj cywitz wuk xinak tu'nju xu'j, ex e cyim cycyakil, minti' jun cyc'wa'l cyaj. 32 Ex te mancbilxi cyim te xu'j. 33 Octzun cyjaw ank'in ke cyimni, ¿alcyetzun jun cyxol cywukil c'oquel te tchmil ju xu'j lu? Porque cywukil e xu'jlan te, che chi sadusey. 34 Xitzun ttzak'we'n Jesús cye: —Ke xjal ate' tuj tk'ijlalil ja'lo, ke xinak in cnet cyxu'jil, icx cye xu'j in cnet cychmil. 35 Atzun cye xjal ma tzaj tk'o'n Dios cyoclen tu'n cyjaw ank'in cyxol cyimni ex tu'n cyten tuj juntl ank'ibl, mi'n che moje'tl xinak tuc'il xu'j ex ke xu'j tuc'il xinak. 36 Porque mlay che cyim juntl maj, porque ic che oquel ic tza'n ke anjel, ex tc'wa'l Dios ke, porque otok che jaw ank'in cyxol cyimni. 37 Pero ti'j tu'n cyjatz ank'in ke cyimni, ax Moisés cyaj k'onte jun xnak'tzbil tz'iban tuj Tu'jil jatum in tma'n ti'j ch'i'x in c'ant tu'n k'ak' tej tyolin ti'j Dios cyja': Ate Kman, Tdios Abraham, Tdios Isaac ex Tdios Jacob. 38 Pero ate Dios mya Cydios cyimni; nok o'cx Cydios itz', porque cycyakil itz' ke twitz Dios. 39 Xitzun cytzak'we'n junjun xnak'tzal ti'j ley: —Ba'n ma tmaya, Xnak'tzal. 40 Ex minti' oc cynimarin cyib tu'n t-xi cykanin mastl xjel te. 41 Xitzun tma'n Jesús cye: —¿Tza'ntzun tten in cyma'n xjal ka tiyjil David ju Crist aju at toclen tu'n Dios? 42 Porque axte David in k'mante tuj u'j Salmo; chi cyja': Xi tma'n Kman te Wajawe: Ke'cuya tuj nbank'abe, 43 acutzun in cub cyi'j ke aj k'oj ti'ja wu'ne, chi tuj Tu'jil. 44 Ka in tma'n David ka a Crist Tajaw, ¿tza'ntzun tten tu'n toc Crist te tiyjil David? Chi Jesús cye. 45 Cycyakil xjal in che bintok ti'j tyol Jesús tej t-xi tma'n cye t-xnak'tzben cyja': 46 —Ten cycwente cyi'je cye xnak'tzal ti'j ley; nim cygan ti'j tu'n cybet toc cyxbalun ẍjo'w, ex cyajbil tu'n cyoc k'olbe'n tuj plas, ex cyajbil tu'n cycub ke' cyuj cynejel k'ukbil cyuj ja te c'ulbil, ex cyajbil tu'n cycub ke' cyuj tbanil k'ukbil tuj nintz wa'n. 47 Nne'l cyi'n cyja meba xu'j, ex in che na'n Dios ma' tuj, tu'ntzun mi'n tel cynic' xjal ti'j cybinchben mya ba'n; mas nim cycastiw jlu cbel, chi Jesús cye.
Copyright ℗ 2000 Hosanna Grabado por Producciones Cristianas Vina