Lucas 2

1Ex cyuj k'ij lu etz jun orden tu'n president Augusto tu'n tjaw cyajlal cycyakil xjal. 2Atzun tnejel maj jaw cyajlal xjal tej in cawintok Sirenio tuj tx'otx' Siria. 3E je'xtzun cycyakil xjal tujx cytanmi tu'n ttz'ibanjtz cybi. 4Cyja'tzun tzaj José tuj tnam Nazaret tuj tx'otx' Galiley, ja'wil tuj tnam Belén aju ttanmi David, tuj tx'otx' Judey, porque ate José tiyjil David. 5Ultzun José tu'n ttz'ibanjtz cybi tuc'ix Mariy aju banin ti'j tu'n tmoje' tuc'il, aju otok tz'oc ten tal. 6Ex axtoktzun ate' tuj Belén tej tpon k'ij tu'n tul itz'j tal Mariy. 7Ex ul itz'j ju tnejel tal, ex ocx tbalk'i'n tuj tal tam, ex cub tcoẍba'n tuj twabl chej, porque minti' cnet cyposad tuj mesón. 8Nikayin ttxa'n tnam Belén ate'tok junjun pastor, ax in che cyaj ten tuj cojbil te konic'an tu'n cycwentin cyẍne'l. 9Ex jurat cub tyec'un tib jun t-anjel Kman cywitz, ex ju t-spic'umal Kman cub spic'e' cyibaj; atzun cye pastor tzaj nim cyxobil. 10Atzunte anjel xi tma'n cye: —Mi'n che xobe, porque cxel nma'ne ba'n tkanil cyeye te nim tzalajbil ex cye cycyakil xjal. 11Porque ja'lo ma tz'itz'j tuj ttanmi David jun Clol cyeye, ate Crist aju Kajaw. 12Ex atzun jun yec'bil cyeye tu'n tel cynic'e ti'j; cnetel tal ne' cyu'ne balk'i'n tuj tal tam, ex coẍl tuj twabl chej, chi anjel cye. 13Ex minaben cub cyyec'un cyib txkantl anjel nim cyajlal tzajni ke tuj cya'j, in cynimsa'n tbi Dios, ex in cyma'n: 14Nimanxwit tbi Dios tuj cya'j, ex tu'n cyten xjal twitz tx'otx' minti'tl cybis, akeju in tzalaj Dios cyi'j, che chi anjel. 15Ex tej cyaj baj ke anjel tuj cya'j, cymatzun ke pastor cyxolx: —Ko'ke tuj Belén que'yil te jlu ti ma baj aju ma tma Kman ke. 16Jurattzun e je'x, ex cnet Mariy tuc'ix José cyu'n ex ju tal ne' coẍl tuj twabl chej. 17Ex tej cyque'yinte, xi cytx'olba'n aju o tma anjel cye ti'j tal ne'. 18Ex cycyakil keju e binte cyyol pastor, e labin ti'j ju o cyma. 19Atzunte Mariy xi tc'u'n tcyakilju yol lu tuj tanmi, ex o ximan ti'j. 20Ex e ajtz meltz'aj ke pastor in cynimsa'n tbi Dios ex in cyk'o'n chjonte te ti'j tcyakilju o cybi ex o cyil, porque ax toc aju otok tma anjel cye. 21Ex tuj twajxakin k'ij o sircunsidarinjtz ju ne', ex oc cyk'o'n tbi JESUS, axju tbi oc ic tza'nxju otok tma anjel te Mariy tej na'nxtok toc ten tal. 22Tej tjapun baj k'ij te saksabl cye ic tza'nx in tma'n tuj tley Moisés, xi cyi'n ju tal ne' tuj tnam Jerusalén tu'n t-xi cyk'o'n te Kman. 23Xitzun cyi'n tu'n tjapun cyu'n aju tz'iban tuj tley Kman, in tma'n: Cycyakil tnejel cyc'wa'le xinak cxel cyk'o'ne tu'n tajben te Kman, chi tuj Tu'jil. 24E je'xtzun tu'n t-xi cyk'o'n jun moj tal ẍpo'k ex ka cabe tal paloma ic tza'nx in tma'n tuj tley Kman. 25Attok jun xinak Simeón tbi ax najl tuj Jerusalén. Ate xinak lu tz'aklxix ex nimal Dios ex in ayontok ti'j tu'n cycolpet aj Israel. Aju Xewbaj Xjan attok tuc'il, 26ex otok tzaj yec'un te tu'n Xewbaj Xjan ka mlayx cyim ka na'nxtok tque'yinte twitz ju Crist aju attok ttzajel t-sama'n Kman. 27Xitzun k'i'n Simeón tu'n Xewbaj Xjan, pon tuj tja Dios. Ex tej tul k'i'n tal ne' Jesús cyu'n tman tuj tja Dios tu'n tbinchanjtz ti'j ic tza'nx in tma'n ley, 28jawtzun tchle'n Simeón ju ne', xi tk'o'n chjonte te Dios, ex tma: 29Ja'lotzun Nman, ba'n tu'n ncyime tuj txubtxaj, porque ma japun ju yol tzaj tma'na weye, akine tmajena. 30Porque ma wile tu'n nwitze aju colbil tu'na, 31aju ma tbinchaya cywitz cycyakil xjal twitz tx'otx'. 32Atzun jlu jun spic'un tu'n t-spic'banjtz cye txkantl tnam mya aj Israel ke, ex tu'n cyjaw nimsa'n aj Israel, akeju etzan tu'na, chi Simeón. 33Ex in labintok tman ne' ex ttxu ne' ti'j tcyakilju in tma'n Simeón ti'j ne'. 34Ex e baj tcy'iwla'n Simeón, ex xi tma'n te Mariy aju ttxu' ne': —Ate c'wa'l lu k'o'maj tu'n cycub tz'ak nimcu aj Israel ex tu'n cyjaw we' nimcu. C'oquel te jun señ, ex mlay txi cyniman tyol, 35tu'ntzun tel tuj k'ancha'l tcyakil cyximbetz xjal at tuj cyanmi; ex atzun te teya ic c'oquel jlu ic tza'n jun spad c'elex tuj tanmiya, chi Simeón. 36Ax icx axtok ta' jun xu'j t-sanjel Dios, Ana tbi; ate Ana tme'jel Fanuel ex tiyjil Aser. Otok tijin te Ana, ex c'wa'lxtok ta' tej tmoje' ex nok wuk abk'i ten tuc'il tchmil, 37ex otok bant 84 abk'i tcyajlen meba xu'j. Minti' nne'l tpa'n tib Ana ti'j tja Dios, atzun in ajben te Kman konic'an ex k'ijtl, in cub tyo'n we'yaj ex in na'n Dios. 38Ax or tej tpon Ana in tk'o'n chjonte te Dios, ex in yolin ti'j ne' cye cycyakil keju in che ayontok ti'j tu'n cycolpet ke xjal tuj Jerusalén. 39Ex tbajlenxi bant tcyakil cyu'n ic tza'nx in tma'n tuj tley Kman, e aj meltz'aj, e pon tuj cytanmi Nazaret tbi, tuj tx'otx' Galiley. 40Ex ju ne' in ch'iytok ex nno'ctok tipun, ex nno'ctok tnabl; ex ju t-xtalbil Dios tcubtok tibaj. 41Tcyakil abk'i in che'xtok ke tman Jesús tuj tnam Jerusalén tuj nink'ij Xjan K'ij tbi. 42Tej tjapun Jesús twi' cablaj abk'i, e je'xtzun tuj Jerusalén ic tza'nx cymod tu'n cyxi' tuj nink'ij. 43Tejtzun tbaj nink'ij e ajtz meltz'aj, atzunju tal c'wa'l Jesús cyaj ten tuj Jerusalén, minti' che bin tman ti'j. 44Ximan cyu'n ka lepchix ttzaj Jesús cyxol xjal, ex e bet juncu k'ij; e octzun ten jyolte cyxol keju at cyxilen cyuc'il ex cyxol cyamiw; 45ex tu'nju minti' cnet cyu'n, e aj meltz'aj e pon tuj Jerusalén in che jyon ti'j. 46Ex tbajlenxi ox k'ij cnet cyu'n tuj tja Dios, k'ukltok cyxol ke xnak'tzal ti'j ley, in bintok cyi'j, ex in xjelintok cye. 47Ex cycyakil keju in che bintok ti'j tyol Jesús e labin ti'j ju tnabl ex ti'j ju tzak'webl tu'n. 48Tejtzun cylonte ke tman, e labin ti'j; xitzun tma'n ttxu' te: —Wal, ¿tiku'n ma tbinchaya jlu ki'je? Lu tmana ex kine in ko jyone ti'ja ex nim in ko bisune. 49Xitzun tma'n Jesús cye: —¿Tiku'n in che jyone wi'je? ¿Maj minti' ba'n cyu'ne ka ilxix ti'j tu'n ntene tuj tja Nmane? 50Atzun cye minti' el cynic' ti'j tyol Jesús aju tzaj tma'n cye. 51Ajtzun Jesús cyuc'il, pontl tuj Nazaret, ex xi tniman ke. Atzunte ttxu' xi tc'u'n tcyakilju yol lu tuj tanmi. 52Ex nno'ctok tnabl Jesús ex in ch'iytok ex ba'n ela tmod tuj twitz Dios ex cywitz xjal.

will be added

X\