Lucas 19

1Ocxtzun Jesús tuj tnam Jericó, ex o bet tuj tnam. 2Ex at jun xjal Zaquey tbi, nejeneltok cye peyil pwak, ex k'inuntok. 3O tajbe Zaquey tu'n tque'yinte alcye Jesús, pero minti' tumel tu'n tlonte tu'n tlaj nim xjal, porque ch'intok twa'l Zaquey. 4Xitzun nej cywitz xjal, jaw kelan ex jax twi' jun tze' sicómro tu'n tque'yinte twitz Jesús; porque cyja'tok t-xi' Jesús. 5Tejtzun tcanun Jesús jatum ta' Zaquey, jaw tque'yin jawni, o til, ex xi tma'n te: —Jurat tcu'tza, Zaquey, porque ax chin cyjel tene tjaya ja'lo. 6Jurattzun cu'tz Zaquey ex o c'met Jesús tu'n tuj tja, in tzalaj ti'j. 7Tej cylonte xjal jlu, cycyakil e jaw wululun cyxolx, ex cyma: —Ma tz'ocx Jesús posadiyil tuj tja jun xjal aj il, che chi. 8Atzunte Zaquey cub we' ex xi tma'n te Kajaw: —Tat, mijcu at weye cxel nk'o'ne cye meba; ex ka at jun ma tz'el welk'a'ne jun ti'xti te, jacu tz'aj nk'o'ne cyaje maj t-xel. 9Xitzun tma'n Jesús te: —Ja'lo ma tzul ju colbil tuj ju ja lu; porque ax tiyjil Abraham te xjal lu. 10Porque akine, sc'o'maj kine tu'n Dios tu'n ntene cyuc'il xjal, ma chin ule jyolte ex clolte aju tzpetnitok. 11Ex in che bintok xjal ti'j tcyakil jlu, xi tma'n Jesús juntl techal cye, porque ch'ixtok tcanun tuj tnam Jerusalén, ex tuj cynabl xjal ka tu'n tul naj tcawbil Dios. 12Xitzun tma'n Jesús: —At jun xinak ma' toclen xi' tuj jun tx'otx' najchak c'molte toclen tu'n toc te rey ex tu'n tajtz meltz'aj. 13Na'nxtok t-xi', e tzaj ttxco'n laj tmajen, ex xi tk'o'n jun pwak ma' twitz te teyle junjun cye, ex xi tma'n: Che negosyarine ti'j pwak lu acu in alin ch'in oc wule. 14Pero ke t-xjalil e oc ten ic'ul te, ex lepchix t-xi cysama'n jun comisyón k'malte cyja': Mi'n kaje tu'n toc jlu te rey tu'n tcawin kibaje, che chi. 15Tejtzun tc'monte toclen, ajtz meltz'aj tuj ttanmi tu'n toc te rey. E je'xtzun txocbaj ke majen tu'n, akeju otok txi k'o'n pwak cye, tu'n tbinte jte' otok tcamba junjun. 16Ul aju tnejel ex tma: Tat, aju tpwaka ma tcamba lajtl. 17Xitzun tma'n rey te majen: Cu, aya majen ba'n; ch'in xi nk'o'ne teya ex ma tz'ak'nanxixa ti'j; cyja'tzun cxel nk'o'ne toclena tu'n tcawina cyibaj laj tnam. 18Ul juntl ex tma: Tat, aju tpwaka ma tcamba jwe'tl. 19Ax icx xi tma'n rey te jlu: Icx teya ccawila cyibaj jwe' tnam. 20Ul juntl ex tma: Lu tpwaka lu, tat. Bi'x xi nc'u'ne tuj jun tal c'albil; 21porque tzaj nxobile twitza, aya jun xjal cyuw, in xi ttzyu'na aju minti' in cub tk'o'na, ex in jaw tchmo'na twitz awal aju minti' in cu'x tawa'na. 22Atzunte rey xi tma'n te: Aya majen mya ba'n, tu'nx ju tyola cbel tcastiwoya wu'ne. Ka ba'n tu'na akine jun xjal cyuwxix, in jaw ntzyu'ne aju minti' in cub nk'o'ne, ex in jaw nchmo'ne aju minti' in cu'x wawa'ne; 23¿tiku'ntzun minti' ocx tk'o'na npwake tuj banc? mawtlo nc'ame ch'in ta'l tej ẍin ule. 24Xitzun tma'n rey cye keju ate'tok: Cyi'mele pwak te jlu, ex cyk'onxe teju at laj pwak tuc'il. 25Atzun cye xi cyma'n te rey: Tat, pero at laj pwak tuc'il. 26Xitzun tma'n rey: Cxel nma'ne cyeye: Alcyeju at ch'in te, mas cxel k'o'ntl te; atzun teju minti' te, aju ch'in at te, c'elel k'i'n. 27Ax icx keju e k'ojin wi'je ex minti' o cyajbe tu'n woque te rey te cawil cyibaj, cyi'ntze ke tzalu, ex cybyoncuye nwitze, chi rey. 28Tej tbaj tma'n Jesús jlu cub nej cywitz, cyja' t-xi' tuj tnam Jerusalén. 29Tej ch'ixtok tcanun cyuj ke tal tnam Betpagé tuc'ix Betania, otok che pon t-xe' jun witz Olivos tbi, e je'x t-sama'n Jesús cabe t-xnak'tzben, 30ex xi tma'n cye: —Cyxi'ye tuj tal tnam tocx chixin; octzun cyocxe cnetel cyu'ne jun tal bur c'alo'n, aju na'nx tjax jun xjal chejil tibaj; cypaju'mele, ex cyi'ntze. 31Ex ka at jun xjal ma tzaj kaninte cyeye: ¿Tiku'n nne'l cypaju'ne? ka chi, cytzak'wenxe te cyja': C'ajbel te Kajaw, che chicuye. 32E je'xtzun ke t-xnak'tzben, ex cnet tal bur cyu'n ic tza'n otok tma Jesús. 33Ex matok nne'l cypaju'n ju tal bur, cyma ke tajwil cye: —¿Tiku'n nne'l cypaju'ne ju tal bur? 34Xitzun cyma'n cye: —C'ajbel te Kajaw. 35Tzajtzun cyi'n ju tal bur, ul cyi'n twitz Jesús; jax cyk'o'n cyxbalun tibaj tal bur tu'ntzun tjax ke' Jesús tibaj. 36Ex tej cyja'tok t-xi' Jesús, cub cylic'un cyxbalun tuj be. 37Tejtzun cycanun ttxa'n witz Olivos tbi tu'n cyxi' cubl, cycyakil t-xnak'tzben e jaw tzalaj, in che sch'in wen, ex e oc ten nimsal tbi Dios tu'nju otok cyil tbinchben Jesús nim tipumal, 38in cyma'n: —Cy'iwla'n teju rey aju ma tzul, ma tzaj sama'n tu'n Kman. Atwit tzalajbil tuj cya'j, ex nimanxwit tbi Dios tuj cya'j. 39At junjun parisey cyxol xjal xi cyma'n te Jesús: —Xnak'tzal, mayonxa ke t-xnak'tzbena. 40Xitzun ttzak'we'n Jesús cye, chi cyja': —Cxel nma'ne cyeye, ka ma che k'ajen ke xjal lu, ake abj che jawil sch'in. 41Tejtzun tpon lak'e' Jesús nikayin tibaj tnam Jerusalén, xi tque'yin ju tnam ex jaw ok' ti'j, 42ex tma: —Nokwit sel tnic'a ti'j ja'lo tza'n tten tu'n ttena tuj txubtxaj. Pero ja'lo ewan twitza ex mlay tz'el tnic'a ti'j. 43Porque tzul jun tk'ijlalil mya ba'n tibaja, ke aj k'oj ti'ja cjawil cymontonin tx'otx' ti'jeleya, che xel txole' soldad ti'jeleya, ex che oquel tzokpaj ti'ja tuj tcyakil ttxlaja. 44Cbel xituna cyu'n, ex che bel byo'n ke xjal ate' tuja, jumajx cbel xituna tcyakil, porque minti' el tnic'a ti'j ju k'ij tej tul Dios onil teya. 45Ocxtzun Jesús tuj tja Dios, ex oc ten lajol cye xjal akeju in che c'ayin tuj, 46ex xi tma'n cye: —At jun yol in tma'n tuj Tu'jil, chi cyja': We nja, ja te nabl Dios; atzun cyeye ma tz'oc cyk'o'ne te cyjul elek'. 47Xi tk'o'n Jesús xnak'tzbil tcyakil k'ij tuj tja Dios; atzun cye nejenel cye pal cyuc'ix ke xnak'tzal ti'j ley ex ke nejenel cye xjal oc tilil cyu'n alcye tumel tu'n tcub byo'n Jesús cyu'n. 48Pero minti' cnet tumel cyu'n tza'n tten tu'n tcub Jesús, porque cycyakil xjal in cub cybi'nxix tyol.

will be added

X\