Lucas 15

1Cycyakil ke peyil pwak cyuc'ix ke aj il e pon lak'e' ttxlaj Jesús tu'n cybinte tyol, 2atzun cye parisey ex ke xnak'tzal ti'j ley in che wululun ti'j Jesús, ex cyma: —Ate xjal lu in che tc'mo'n ke aj il ex in wa'n cyuc'il. 3Atzunte Jesús xi tma'n ju techal lu cye: 4—¿Alcye jun xinak cyxole ka at jun syent t-ẍne'l, ex ka ma cyaj naj jun cyxol, ¿mlaypelo che cyaj tk'o'n keju 99 tuj cojbil, ex cxe'l jyolte aju otok cyaj tzpet ocxi tcnet tu'n? 5Octzun tcnet tu'n, cjawix tk'o'n twi t-semil in tzalaj ti'j; 6octzun tul tja, che tzajel tchmo'n ke tamiw ex ke tvesin, ex cxel tma'n cye: Che tzalajxe wuc'ile porque ma cnet ju tal nẍne'le aju otok cyaj tzpet, chilo xjal. 7Cyja'tzun, cxel nma'ne cyeye: Mas che tzalajel keju ate' tuj cya'j ti'j jun aj il ka ma tz'ajtz ti'j tanmi, cywitz keju 99 xjal tuj cywitz ka tz'aklxix ke ex mya il ti'j tu'n tajtz ti'j cyanmi. 8Ex alcye jun xu'j ka at laj sak pwak tuc'il, ex ka ma txi naj jun sak pwak, ¿mlaypelo tz'oc ttxako'n jun candil, ex cbajel ttz'iso'n tuj ja, ex cheba cbajel tjyo'n tu'n tcnet tu'n? 9Octzun tcnet pwak tu'n, che oquel tchmo'n ke tuc'il ex ke tvesin, ex cxel tma'n cye: Che tzalajxe wuc'ile porque ma cnet aju sak pwak otok txi naj wu'ne, chilo xu'j. 10Cyja'tzun in xi nma'ne cyeye: Ax icx at tzalajbil cyxol ke t-anjel Dios ti'j jun aj il ka ma tz'ajtz ti'j tanmi. 11Ax icx xi tma'ntl Jesús: —At jun xjal attok cabe tcy'ajal; 12atzunte tz'inbaj xi tma'n te tman: Tat, k'ontza wetzbile aju at woclene ti'j. Xitzun tk'o'n mambaj cyetzbil. 13Ex yajxi ch'intl, oc tchmo'n tz'inbaj tcyakilju tetzbil ex xi' tuj juntl tnam najchak; ex atzun baj tnajsa'n tcyakilju tpwak ti'j achbil te twitz tx'otx'. 14Tej tbaj tnajsa'n tcyakilju tpwak, tzaj jun we'yaj nimxix tuj tnam lu, ex ya minti' canun aju in ajben te. 15Xi'tzun jyol tak'un ex pon tuc'il jun xjal aj tnam, ex xi lajo'n tuj cojbil tu'n cyoc tcwentin ke boch. 16Ex o tajbexix tu'n tnoj tc'u'j tu'n cylo' boch, pero mi jun xjal tzaj k'onte te. 17Ex ultzun ti'j tc'u'j ex tma: Nimcu majen ate' tja nmane at nimxix cywa, atzun weye tzalu ch'ix ncyime tu'n we'yaj. 18Chin ajel meltz'aje tuc'il nmane, ex cxel nma'ne te: Tat, ma chin binchane il twitz Dios ax icx twitza. 19Mya ba'n kintle tu'n toc nbiye tc'wa'la, chin tk'o'nca ic tza'n jun tmajena, nchiye cxel nma'ne. 20Cubtzun be tu'n, ajtz meltz'aj tu'n tul tuc'il tman. Na'nxtok tcanun, o ilwaj tu'n tman, tzaj k'ak'an tc'u'j tman ti'j, ex xi' kelan canul ti'j, tzaj tchle'n, ex el ttz'uban twitz. 21Xitzun tma'n c'wa'l te tman: Tat, ma chin binchane il twitz Dios, ax icx twitza; mya ba'n kintle tu'n toc nbiye tc'wa'la. 22Atzunte mambaj xi tma'n cye tmajen: Juratx cyi'ntze aju tbanil xbalun ex cyk'o'nque ti'j; ex cyk'o'nque jun xmulk'ab ti'j tal tk'ab, ex cyk'o'nque t-xajab. 23Cyi'ntze jun tbanil tal wacẍ ex cybyoncuye tu'n kic'san nink'ij ex tu'n kwa'n. 24Porque aju nc'wa'le lu cyimnitok, ex ma jaw ank'in, tzpetnitok ex ma cnet, chi mambaj. E octzun ten ic'sal nink'ij. 25Atzunte tzicbaj attok tuj cojbil, tej tul lak'e' nikayin ttxlaj ja o tbi tk'ajk'ajel twi chnab ex bixbil. 26Tzajtzun ttxco'n jun majen ex xi tkanin te ti in baj. 27Atzunte majen tma: Ma tzul titz'ina ex ma tzaj tma'n tmana tu'n tcub byet jun tal wacẍ tbanilxix tu'nju ba'n ma tzul. 28Atzunte tzicbaj tzaj nimxix tk'oj, ex minti' tajbe tu'n tocx tuja. Etztzun tman ex o cubsan twitz tu'n tocx. 29Atzunte tzicbaj xi tma'n te tman: Ela'xi abk'i in chin ajbene teya ex minti' in chin ic'e tibaj tleya, ex bajx tzaj tk'o'na jun tal chip weye tu'n tcub wic'sane jun nink'ij cyuc'il wamiwoye. 30Tejtzun sul tc'wa'la lu, aju ma baj najsa'n tpwaka tu'n cyuc'il ke xu'j jawni cywitz cyuc'il xinak, ma cub tbyo'na jun tal wacẍ tbanilxix, chi tzicbaj. 31Atzunte mambaj xi tma'n te: Nc'wa'l, bay teya ax ta'ya wuc'ile, ex tcyakilju at weye, teya. 32Pero tuj tumelxix jlu tu'n kic'san nink'ij ex tu'n ktzalaj; porque aju titz'ina lu cyimnitok, ex ma jaw ank'in; tzpetnitok, ex ma cnet, chi mambaj.

will be added

X\