Lucas 14

1At jun k'ij te ojlabl ocx Jesús wa'l tuj tja jun xjal nejenel cye parisey, ex in che que'yin mastl parisey ti'j alcye tu'n tbinchante Jesús tuj k'ij te ojlabl. 2Ex ultzun jun xjal twitz Jesús, at mal ti'j. 3Xitzun tkanin Jesús cye chic'bal ti'j ley ex cye parisey: —¿K'o'npelo tu'n ley tu'n tk'ananjtz jun xjal tuj k'ij te ojlabl ex ka mi'n? Chi Jesús. 4Atzun cye minti' e k'ajt. Tzajtzun ttzyu'n Jesús aju xjal at mal ti'j ex banix tu'n, ex xi tma'n te tu'n taj tja. 5Xitzun tma'n Jesús cye parisey: —¿Alcye jun cyxole, ka ma cu'x tz'ak jun tc'wa'l ex ka jun tchej tuj jun jul, mlaypelo jatz ti'n naj masquelo tuj k'ij te ojlabl? 6Ex minti' bant ttzak'wenjtz jlu cyu'n. 7Tej tque'yinte Jesús tza'n tten mas cyajbil xjal tu'n cycub ke' tuj jun k'ukbil tbanilxix, xi tma'n jun yol cye keju otok che txconjtz: 8—Oc ttxconjtza tu'n jun xjal tu'n t-xi'ya tuj mejeble'n, mi'n cub ke'ya tuj ju k'ukbil tbanilxix, mya yajcu otok txconjtz juntl mas ma' toclen twitza, 9ex octzun tul ju otok tzaj txconte cyeye oc tma' teya cyja': Tic' lak'e'ya tuj k'ukbil lu ex kecuya tuj juntl k'ukbil. Cjawiltzun ch'ixwiya, ex cbel ke'ya tuj mancbil k'ukbil. 10Pero oc ttxconjtza, txi'ya ex kecuya tuj mancbil k'ukbil; octzun tul aju cxel txconte teya oc tma' teya cyja': Amiw, lak'etz ch'intla ntxlaje; entons ma'lo t-xilena cywitz keju in che cub ke' tuc'ila ti'j mes. 11Porque alcye jun xjal in jaw tniman tib, c'oquel k'o'n te ch'in; ex alcye ma tz'oc tk'on tib te ch'in, cjawil nimsa'n. 12Ex xi tma'n Jesús teju xinak xi txconte te: —Ka ma tbinchaya jun nintz wa'n, ex ka taja tu'n cyul xjal wa'l tuc'ila, mi'n che tzaj ttxco'na ke tamiwoya, ke termaniya, ke xjal at t-xilena cyuc'il ex ke tvesina k'inun; porque jaculo txi txco'ntla cyu'n tu'n twa'na cyuc'il, atzun t-xelju tzul k'o'n teya. 13Oc tcub tic'sa'na jun nink'ij, txcontza ke meba, ke xjal tzcaj cyten, ke cox, ex ke moẍ; 14at tzalajbil teya icju, porque mlay bant cyu'n tu'n ttzaj cyk'o'n t-xel teya, maxitzun ctzajel k'o'n t-xel teya ocxi cyjatz ank'in ke xjal tz'aklxix. 15At jun xjal k'ukltok ti'j mes, tej tbinte jlu xi tma'n te Jesús: —At tzalajbil te jun xjal cwa'l tuj tcawbil Dios. 16Xitzun tma'n Jesús te: —At jun xjal o tbincha jun nintz wa'n, ex e tzaj ttxco'n nimcu xjal. 17Tej tpon or te wabl, xi t-sama'n xjal jun tmajen k'malte cye keju otok che txconjtz: Cytzaje, porque ma bant tten tcyakil, chicuya, chi xjal. 18Pero cycyakil tzaj cyma'n tiku'n mlay che tzaj. O tma ju tnejel: Ma lak'et ch'in ntx'otx'e, ex il ti'j tu'n nxi'ye que'yilte; chin cubsale twitza mlay chinxe. 19Ex o tma juntl: Ma lak'et jwe' moj nwacẍe, ma chinxe ak'nal cyuc'il tu'ntzun tic' nwitze cyi'j ka ba'n ke; chin cubsale twitza mlay chinxe. 20Ex o tma juntl: Ma ẍin moje'ye, tu'ntzun jlu mlay chinxe. 21Tej tul meltz'aj ju majen, xi tma'n tcyakil jlu te tpatrón. Tzajtzun tk'oj patrón, ex xi tma'n te tmajen: Juratx t-xi'ya cyuj plas ex cyuj cay tuj tnam, ex k'intza ke meba, ke xjal tzcaj cyten, ke cox, ex ke moẍ, chi xjal. 22Tejtzun tul meltz'aj majen, xi tma'n te tpatrón: Tat, ma bant wu'ne ic tza'n saj tma'na, ex atx lugar. 23Xitzun tma'n patrón te tmajen: Txi'ya cyuj be ex cyuj tal tk'ab be ex k'onca il cyi'j xjal tu'n cytzaj, tu'n tnoj njaye. 24Porque cxel nma'ne cyeye, ke xjal e tzaj ntxco'ne nej, mi jun cxel nic'bente wabj ma bant wu'ne, chi patrón. 25Nimcu xjal lepchke'c ti'j Jesús; ex ajtz meltz'aj twitz cyuc'il xjal, ex xi tma'n cye: 26—Ka at jun xjal ma tz'oc lpe' wi'je, ex ka o'cx toc tc'u'j ti'j tman, ti'j ttxu', ti'j t-xu'jil, cyi'j ke tc'wa'l, cyi'j ke ttzic ex ke titz'in, ax icx ti'j tchwinklal, mlay tz'oc te nxnak'tzbene. 27Ex alcye jun xjal mya k'i'n tcrus ex mya lepcho'c wi'je, mlay tz'oc te nxnak'tzbene. 28Porque alcye jun cyxole, ka taj tu'n tbant jun ja tu'n, ¿mlaypelo cub ke' ximal ti'j nej nic'pun cnajel tu'n, ka acux aju pwak tu'n tbant ja? 29Mya yajcu mlay japun baj tu'n, ex otok cub ke' t-simyentil ja, entons cycyakil keju in che que'yin ti'j che oquel ten tze'l ti'j, 30ex oc cyma': Ate xjal lu oc ten binchal tja ex ma cyaj tx'ake' tu'n, che chilo. 31Ex alcye jun rey, ka ma txi' k'ojlel ti'j juntl rey, ¿mlaypelo cub ke' ximal ti'j nej ka jacu xcye' ti'j winkin mil t-soldad juntl rey in tzaj k'ojlel ti'j, atzun te nok laj mil k'i'n tu'n? 32Ex ka mlay xcye' ti'j, na'nxtok tul canun juntl, che xel t-sama'n cabe t-sanjel kanilte te juntl alcye taj tu'n t-xi k'ot te tu'ntzun twe' k'oj. 33Cyja'tzun, alcye jun cyxole ka minti' xcyaj tk'o'n tcyakilju at te, mlay tz'oc te nxnak'tzbene. 34Ba'n te atz'an; pero ka ma naj ta'w, ¿tza'n tten tu'n toctl ta'w? 35Minti'tl tajben, mi te tx'otx', mi te t-samel tz'is, o'cx tu'n tex xo't. Alcye at t-ẍcyin, binx aju yol lu.

will be added

X\