Lucas 13

1Tujx ju tk'ijlalil lu e pon junjun xjal xi cyma'n te Jesús cyi'j junjun aj Galiley otok che cub byo'n tu'n Pilat ex baj t-smo'n tib cychc'el tuc'il cychc'el alumaj otok che cub cybyo'n te chojbil. 2Ex xi tma'n Jesús cye: —¿Chi toc cyu'ne? ¿Maspe aj ilxix ke aj Galiley lu cywitz txkantl aj Galiley, tu'nju e cub byo'n? 3Cxel nma'ne cyeye: Mi'n; icx cyeye, ka minti' ma tz'ajtz ti'j cyanmiye, che najele cycyakile. 4Ex keju wajxaklaj xjal e cyim, akeju cub tz'ak cwartel cyibaj tuj Siloé. ¿Chi toc cyu'ne? ¿Maspe nimxix cyil cywitz txkantl xjal najl tuj Jerusalén? 5Cxel nma'ne cyeye: Mi'n; icx cyeye, ka minti' ma tz'ajtz ti'j cyanmiye, che najele cycyakile. 6Ax icx xi tma'n Jesús aju techal lu: —At jun xjal at jun wi' higo awa'n tu'n tuj ttx'otx', ex tzaj jyol twitz, pero minti' cnet tu'n. 7Xitzun tma'n te cwentil awal: Ja'lo toxin abk'i cucx in chin ule jyol jun twitz higo lu, ex minti' jun twitz in cnet wu'ne. Tx'eminctza; nokx gan xmu'jin tx'otx' tu'n. 8Atzunte cwentil awal xi ttzak'we'n: Tat, k'oncja juntl abk'i; cbajel wak'nane tx'otx' t-xe'; ex c'oquel nk'o'ne abon t-xe'. 9Ka ma tz'oc twitz, mlay jaw tx'emit; katzun minti', ba'n tu'n tjaw tx'emit. 10Tuj jun k'ij te ojlabl in k'o'ntok Jesús xnak'tzbil tuj jun ja te c'ulbil; 11ex attok jun xu'j otok bant-xi wajxaklaj abk'i toclen tyabil; otok cyaj tze'jix ti'j tu'n ju'ẍ, ex minti' tumel tu'n tjaw we' ti'j. 12Tej tlonte Jesús, tzaj ttxco'n ex xi tma'n te: —Aya xu'j, ma tzokpeta, ma tz'el tyabila. 13Cubtzun tk'o'n Jesús tk'ab tibaj; ex jurat jikumax ti'j xu'j, ex jaw tnimsa'n tbi Dios. 14Atzunte nejenel tuj ja te c'ulbil tzaj nim tk'oj tu'n tlaj banix jun xjal tu'n Jesús tuj k'ij te ojlabl, ex xi tma'n nejenel cye xjal: —O'cx tuj kak k'ij ba'n tu'n kak'nan; atzun k'ij ba'n tu'n cyule tu'n cybanixe, ex mya tuj k'ij te ojlabl. 15Atzunte Kajaw xi ttzak'we'n: —Xmletz' keye, teyle junjun cyeye ¿maj minti' nne'l tpaju'n twacẍ ex ka tchej tuj k'ij te ojlabl ex in xi ti'n c'al a'? 16Yajtzun ju xu'j lu, ax tiyjil Abraham, ex wajxaklaj abk'i mer ic tza'n c'alo'ntok tu'n Satanás tu'n yabil, ¿myapelo ba'n tu'n ttzokpet ex tu'n tel tyabil tuj k'ij te ojlabl? 17Tej tmante Jesús tcyakil jlu, tzaj cych'ixwi keju in che k'ojin ti'j; atzun cye cycyakil xjal e jaw tzalaj ti'j tcyakil tbinchben Jesús tbanilxix ke. 18Tmatzun Jesús: —¿Chi toc cyu'ne ti'j tcawbil Dios? ¿Tza'n tten? Ex ¿alcye jun techal ctzajel ki'n ti'j? 19Ic tten ic tza'n jun twitz mostaza xi ti'n jun xjal ex cu'x tawa'n tuj tpe'n; ex ch'iy, ex oc ma'xix ic tza'n jun tze', ex ke chyu'j cybincha cyk'u' cyxol tk'ab. 20Ex tma Jesús juntl maj: —At jun techal cxel nma'ne tza'n tten tcawbil Dios. 21Ic tten ic tza'n ch'in t-samel pan xi ti'n jun xu'j ex cu'x t-smo'n tuj ox malbil arin, ex tcyakil tk'otjil pan jaw mal tc'u'j. 22Ic'tzun Jesús cyuj ke tnam ex ke aldey, in tk'o'n xnak'tzbil cye xjal, ex cyja' t-xi' tuj Jerusalén. 23Ex xi tma'n jun xjal te: —Tat, ¿maj nic'xi keju in che clet? Xitzun tma'n Jesús cye: 24—Cyk'o'nc cyipune tu'n cyocxe ttzi ja ch'in; porque cxel nma'ne cyeye, nimcu xjal c'oquel tilil cyu'n tu'n cyocx ex mlay che ocx. 25Porque tzul k'ij cjawil we' ju tajaw ja lamol ttzi ja; atzun cyeye ka otok che cyaj tene ttxa'n pe'n, che oquel tene k'ajtzal ttzi ja, ex oc cyma'ye cyja': Tat, Tat, jako'ncxa ttzi ja kwitze. Atzun te tajaw ja c'eletz ttzak'we'n: Minti' ba'n wu'ne jatum tzajni keye. 26Atzun cyeye che oquel tene k'malte te: O ko wa'ne ex o ko c'ane tuc'ila, ex tzaj tk'o'na xnak'tzbil tuj ktanmiye. 27Atzunte tajaw ja ctzajel tma'n cyeye: Cxel nma'ntle cyeye: Minti' ba'n wu'ne jatum tzajni keye; cypa'mil cyibe wi'je cycyakile akeye binchal mya ba'n. 28Octzun che jawil ok'e, ex ckitx'itx'il t-xe cye'ye oc cylonteye Abraham tuc'ix Isaac, tuc'ix Jacob ex cycyakil t-sanjel Dios ate' tuj tcawbil Dios, atzun cyeye otok che cyaj tene ti'jtze. 29Porque che tzajel xjal te ocni, te elni, te jawni ex te cubni, ex che bel ke' wa'l ti'j mes tuj tcawbil Dios. 30Ex akeju ate' te mancbil ja'lo, at junjun che oquel te tnejel; ex keju ate' te tnejel ja'lo, at junjun che oquel te mancbil. 31Tujx ju k'ij lu e pon junjun parisey ex xi cyma'n te Jesús: —Texa tzalu ex txi'ya, porque taj Herodes tu'n tcub byo'na tu'n. 32Pero xi tma'n Jesús cye: —Cyxi'ye, ex cyk'manxe te wech Herodes: Akine in che etz ju'ẍ tuj cyanmi xjal wu'ne, ex che banixel xjal wu'ne ja'lo tuc'ix nchi'j, ca'jxitzun cwebel wak'une, che chicuye te. 33Pero il ti'j tu'n nbete ja'lo tuc'ix nchi'j tuc'ix ca'j; porque mlay bant tu'n tcyim jun t-sanjel Dios ti'jxi tnam Jerusalén. 34Aya tnam Jerusalén, aya tnam Jerusalén, in che cub tbyo'na ke t-sanjel Dios ex in che baj t-xo'na tu'n abj akeju in che tzaj t-sama'n Dios tuc'ila. Nimcu maj o wajbeye tu'n cyoc nchmo'ne ke tc'wa'la ic tza'n jun ttxu ec' in che oc tchmo'n ke tal tjak' t-xic', ex minti' o tajbeya. 35Aju tja Dios at cyxole cyjel colin tu'n Dios, ex cxel nma'ne cyeye mlay chin cyile juntl maj, maxi chin oquel cyque'yine oc tpon tk'ijlalil oc cymanteye: Cy'iwla'n teju tzul, aju ctzajel sama'n tu'n Kman.

will be added

X\