Lucas 11

1At jun maj oc ten Jesús na'l Dios tuj jun lugar, ex tej tbaj na'n Dios, at jun t-xnak'tzben xi tma'n te: —Tat, ko t-xnak'tzama tu'n tbant kna'ne Dios, ic tza'n te Juan xi tk'o'n xnak'tzbil cye t-xnak'tzben tza'n tten tu'n tbant cyna'n Dios. 2Xitzun tma'n Jesús cye: —Oc cyna'ne Dios, cyk'manxe cyja': A Kman [ata tuj cya'j], tenwt tchiylal tbiya keye. E ttzaj ju tcawbila. [Bant-xwit ju tajbila twitz tx'otx' ic tza'n in bant tuj cya'j.] 3K'ontza kwaye ja'lo, aju in ajben tcyakil k'ij. 4Ex najsama aju mya ba'n in kbincha'ne twitza, ic tza'n keye in cub knajsa'ne cypaltil keju in cybincha'n mya ba'n ki'je. Ex mi'n tak'a ambil tu'n koque tuj joybil ki'je, [nok o'cx ko tcloma teju mya ba'n.] 5Ax icx xi tma'n Jesús cye: —Alcye jun cyeye at jun tamiw, ex ka ma txi' tuc'il tamiw tmij ak'bil ex ma txi tma'n te cyja': Amiw, k'ontza ox pan nch'exe 6porque at jun wamiwoye cyja' t-xi' tuj tbe ma tzul wuc'ile, ex minti' ch'in ba'n t-xi nk'o'ne te, ka chi cxel tma'n. 7Ex ka ma tz'etz ttzak'we'n tamiw te cyja': Mi'n tz'el ti'na watl tuj nwitze; ma lamet ttzi ja, ex ate' ke tal nc'wa'le wuc'ile tuj ncoẍbile; mlay chin jaw we'ye tu'n t-xi nk'o'ne aju in tzaj tkanina, ka chi tamiw; 8cxel nma'ne cyeye, masque mlay jaw we' cyamiwoye k'ol pan cyeye tu'nju cyamiw cyibe, pero tu'nju cucx cywuline cjawil we' k'olte tcyakilju at tajben cyeye. 9Cyja'tzun cxel nma'ne cyeye: Cykaninxe, ex ctzajel tk'o'n Dios cyeye; cyjyome, ex cnetel cyu'ne; cyk'ajtza'n oque, ex cjaketel ttzi ja cywitze. 10Porque alcye jun xjal in kanin ti'j, oc tc'ma'; ex aju in jyon ti'j, cnetel tu'n; ex aju nno'c tk'ajtza'n, cjaketel ttzi ja twitz. 11¿Ex alcye jun mambaj cyxole, [ka ma tzaj tkanin tc'wa'l jun twa pan, maj cxel tk'o'n jun abj?] Ex ka ma tzaj tkanin tc'wa'l jun tchi' cyiẍ, maj cxel tk'o'n jun lobaj? 12Ex ka ma tzaj tkanin tc'wa'l jun tchi jos, ¿maj cxel tk'o'n jun si'nin? 13Masque mya ba'n keye, pero in xi cyk'o'ne oyaj ba'n cye cyc'wa'le. ¿Yajtzunte Cymane aju at tuj cya'j, mlaypelo tzaj tk'o'n aju Xewbaj Xjan cye keju in che kanin te? 14At jun xjal etz jun ju'ẍ tuj tanmi tu'n Jesús, otok tz'oc xjal men tu'n ju'ẍ; tejtzun tetz ju'ẍ tuj tanmi xjal, bant tyolin xjal; ex ke xjal e labin ti'j. 15Pero at junjun xjal in cyma'n: —In che etz ju'ẍ tuj cyanmi xjal tu'n Jesús, porque ate Beelsebú in k'onte tipumal, porque atzun nejenel cye ju'ẍ, che chi. 16Ex txkantl xjal xi cykanin tu'n tbant jun señ tu'n tel cynic' ti'j ka atzun tzajni tipumal tuj cya'j, xi cykanin nok tu'n toc Jesús tuj joybil ti'j cyu'n. 17Pero el tnic' Jesús ti'j cyximbetz ex xi tma'n cye: —Ka at jun cawbil at pabl tib tuj ex in che k'ojin xjal cyxolx, cbel xitj cawbil; ex ka at jun ja xjal at pabl tib cyxol, cbel xitj jun ja xjal lu. 18Icxte Satanás, ka tpa'n tib ex in k'ojin ti'jx, ¿tza'ntzun tten cucx tu'n tcyaj ten tcawbil? Porque akeye in cyma'ne ka nok tu'n tipumal Beelsebú in che etz ke ju'ẍ tuj cyanmi xjal wu'ne. 19Ka ax toc nok tu'n tipumal Beelsebú in che etz ju'ẍ tuj cyanmi xjal wu'ne, ¿yajtzun cye cyuc'ile, alcye in k'onte cyipumal tu'n cyetz ju'ẍ tuj cyanmi xjal? Cyja'tzun, ax ke cyuc'ile oc cyma' ka mya tuj tumel cyyole. 20Katzun tu'n tipumal Dios in che etz ju'ẍ tuj cyanmi xjal wu'ne, tz'elxtzun cynic'e ti'j ax toc ma tzul tcawbil Dios cyuc'ile. 21Jun xinak at tipun nok banin tten, ex ka ma tz'oc t-xk'ukin tja, tcyakilju at te segur ta'. 22Pero ka ma tzul juntl xjal mas at tipun twitz, cbel ti'j tu'n, entons c'elel k'i'n tcyakil tmacbil aju k'ukl tc'u'j ti'j, ex cbel sipan tcyakilju otok tz'el k'i'n te. 23Alcye jun xjal mya tk'on tib wuc'ile, in k'ojl wi'je; ex alcye jun xjal minti' in onin wuc'ile tu'n tjaw chmet twitz awal, nok in baj tchitun. 24Oc nne'tz jun ju'ẍ tuj tanmi jun xjal, in xi' ju'ẍ betel cyuj lugar tzkij tx'otx' in jyon ti'j jatum tu'n tojlan; ex ka minti' ma cnet tu'n, in tma'n: Chin ajel meltz'aje juntl maj tuj njaye jatum ẍin etze, chi ju'ẍ. 25Octzun tul meltz'aj ju'ẍ tuj tanmi xjal, c'oquex tque'yin ic tten ic tza'n jun ja tz'iso'maj tuj ex bincha'maj. 26In xi'tzun ju'ẍ ex in che tzaj ti'n wuktl ju'ẍ mas mya ba'n ke twitz; in che ocxtzun tuj tanmi xjal ex ax in che najan; te yajxitl mas pyor ta' xjal ic tza'n nej. 27Matok in yolin Jesús ti'j tcyakil jlu, at jun xu'j jaw sch'in cyxol xjal, ex tma: —At tzalajbil te xu'j aju sel itz'ja ti'j ex ma ch'u'na ti'j. 28Atzunte Jesús xi tma'n: —Mic' ttenju, mas at tzalajbil cye keju in xi cybi'n tyol Dios ex in xi cyniman. 29Ex tej toc cychmon cyib nim xjal ti'j Jesús, oc ten Jesús k'malte: —Akeju xjal ate' tuj tk'ijlalil ja'lo mya ba'n ke; cyajbil tu'n cylonte jun señ, pero mlay txi yec'un jun señ cye, nok o'cx ju señ ti'j Jonás aju t-sanjel Dios. 30Porque ic tza'n te Jonás oc te jun señ cye xjal aj Nínive, ax icxtzun weye chin oquele te jun señ cye xjal ate' tuj tk'ijlalil ja'lo, akine sc'o'maj kine tu'n Dios tu'n ntene cyuc'il xjal. 31Tuj tk'ijlalil jwisi oc cyoc xjal tuj xjel, akeju ate' tuj tk'ijlalil ja'lo, cjawil we' xu'j rey aju o cawin tuj jun tx'otx' t-xe cya'j tuj tnayaj k'ij, ex che bel tz'ak ke xjal lu tuj cyil tu'n; porque ate xu'j rey tzaj max ttxa'npun tx'otx' tu'n tul bilte tyol Salomón, porque nimxix tnabl Salomón; ex at jun tzalu mas ma' toclen twitz Salomón. 32Tuj tk'ijlalil jwisi, oc cyoc xjal tuj xjel, akeju ate' tuj tk'ijlalil ja'lo, che jawil we' ke xjal aj Nínive ex che bel tz'ak ke xjal lu tuj cyil cyu'n; porque ke xjal aj Nínive ajtz ti'j cyanmi tej cybinte tpacbabl Jonás; ex at jun tzalu mas ma' toclen twitz Jonás. 33Mi jun xjal in cub k'onte jun candil tuj ewaj toclenxi ttxako'n, ex mlay tz'ocx tk'o'n tjak' jun cajón, o'cx in jax tk'o'n tibaj jun tcubil, tu'ntzun tk'onte spic'un cye cycyakil keju ate' tuja. 34Ke tbak' twitza atzun t-spic'umal t-ximlala; katzun ba'n ate' tbak' twitza, ax icx tcyakil t-ximlala at tuj spic'un; pero ka mya ba'n ate' tbak' twitza, ax icx t-ximlala at tuj klolj. 35K'o'nca cwent ti'j aju spic'un at teya myawt klolj. 36Katzun tcyakil t-ximlala at tuj spic'un, ex minti' ch'in klolj tuj, tcyakil cspic'ebel twitza ic tza'n jun tkan k'ak' in t-spic'ba'n twitza. 37Tej tbaj yolin Jesús, at jun parisey o cubsan twitz tu'n twa'n Jesús tuc'il; ocxtzun Jesús tuj tja, ex cub ke' ti'j mes. 38Tej toc tque'yin parisey minti' el ttx'jo'n Jesús tk'ab tej toc wa'l, o labin ti'j. 39Atzunte Kajaw xi tma'n te: —Akeye parisey ic cytene ic tza'n jun xjal o'cx ti'j vas ex ti'j lak nne'l ttx'jo'n, atzun tujxi minti' in baj ttx'jo'n, porque tuj cyanmiye o'cx in che ximane ti'j tu'n cyelk'ane ex tu'n cybinchanteye mya ba'n. 40Miban che bine. ¿Minti'pe nne'l cynic'e ti'j, aju o binchante te ti'jxi, axju o binchante te tujxi? 41Cyja'tzun, cyk'onxe cycotz xjal tu'n tcyakil cyc'u'je, ex che cyjeltzune sak keye. 42Bec'bil cywitze, parisey. Porque in xi cyk'o'ne tlaji'n te Dios ti'j tal c'ul alwen tbi, ex ti'j rud, ex ti'j tcyakil tal c'ul awa'n cyu'ne, pero minti' nno'c cyk'o'ne cwent ti'j tu'n cybinchanteye aju tz'aklxix ex tza'n tten tu'n cyc'ujlanteye Dios. Atzun jlu tu'n tbant cyu'ne, ex tu'n mi'n tcyaj cyk'o'ne aju mastl. 43Bec'bil cywitze, parisey. Cyajbile tu'n cycub ke'ye tuj tnejel k'ukbil tuj ja te c'ulbil, ex tu'n cyoc k'olbe'ne tuj plas tuc'il nimbil. 44Bec'bil cywitze xnak'tzal ti'j ley ex parisey, xmletz' keye. Ic cytene ic tza'n tjulil cyimni minti' k'ancha'l, ex ke xjal in che bet tibaj minti' ba'n cyu'n. 45Ex tzaj ttzak'we'n jun chic'bal ti'j ley: —Xnak'tzal, aju tyola lu ax icx kibaje in cub tz'ak. 46Ex tma Jesús: —Ax icx bec'bil cywitze chic'bal ti'j ley, porque in xi cyk'o'ne cyikatz xjal mlay c'isj cyu'n, atzun cyeye minti' nno'c cyk'o'ne jun tal cyk'abe ti'j iktz. 47Bec'bil cywitze, in jaw cybincha'ne cypantyón ke t-sanjel Dios ex cyu'n cyxe'chele e cub byo'n ojtxi. 48Cyja'tzun in cyyec'une ka mojl tak'pon cyu'ne cyuc'il cyxe'chele; porque cyu'n cyxe'chele e cub byo'n ke t-sanjel Dios ojtxi, atzun cyeye in jaw cybincha'ne cypantyón. 49Cyja'tzun o tma Dios aju at nim tnabl: Che xel nsama'ne nsanjele cyuc'ix apostl yolil cyuc'il; at junjun cye che bel byo'n cyu'n, ex junjun che bajel yajla'n cyu'n, chi Dios. 50Cyja'tzun che bel tz'ak ke xjal lu tuj cyil tu'n tlaj cychc'el cycyakil t-sanjel Dios, akeju o che cub byo'n atxix tbantlen twitz tx'otx', 51tzajnix bant tej tcub byo'n Abel ex japun ti'j Zacarías, aju o cub byo'n ti'jxi altar twitz tja Dios. Cyja'tzun cxel nma'ne cyeye, che bel tz'ak xjal lu tuj cyil tu'n cylaj t-sanjel Dios e cub byo'n. 52Bec'bil cywitze, chic'bal ti'j ley. Ma txi cytzyu'ne ju tal ja te ojtzkibl; ax keye minti' ma che ocxe tuj; o cyajbe xjal tu'n cyocx, pero xi cymayo'ne tu'n mi'n cyocx xjal. 53Tejtzun tetz Jesús tuj tja parisey, ke xnak'tzal ti'j ley ex ke parisey tzaj nimxix cyk'oj ti'j, xi cyxjelin nimcu yol te; 54in che jyon tumel tza'n tten tu'n tcub tz'ak cyu'n tuj jun til tu'nx ju tyol.

will be added

X\