Lucas 10

1Tbajlenxitzun jlu, e jaw t-sc'o'n Kajaw 70 t-xnak'tzbentl, e je'x t-sama'n tu'n cyxi' nej twitz, te cabchak cybet, e je'x t-sama'n cyuj cycyakil tnam ex lugar jatum attok tponel. 2Ex xi tma'n cye: —Ax toc, nimxix twitz awal at, atzun ke ak'nal mya nim; cyja'tzun, che cubsane twitz Tajaw awal tu'n cyxi t-sama'n ak'nal tu'n tjaw chmet twitz awal. 3Cyxi'ye; che xel nsama'ne ex ic che oquele ic tza'n ke tal ẍne'l cyxol xo'j. 4Mi'n txi cyi'ne ch'u'ẍ, mi pa, mi xjab; ex mi'n che we'ye tuj be tu'n cyk'olbene cye xjal. 5Oc cyocxe tuj jun ja, tnejel cyk'onxe jun k'olbebl: Che tenwt xjal tuj tzalajbil tuj ja lu, che chicuye. 6Katzun ba'n cyten xjal tuj ja lu, che teltzun tuj tzalajbil ic tza'n cxel cyma'ne; katzun mya ba'n cyten xjal, mlay tz'ajben aju k'olbebl otok txi cyk'o'ne. 7Ax che tencje jatum ctzajel k'o'n cyposadiye; cywa'nxe ex cyc'anxe aju ctzajel k'o'n cyeye; porque ba'n tu'n tchjet twi tc'u'j ak'nal. Mi'n che ic'e jyol cyposadiye tuj juntl ja. 8Oc cypone tuj jun tnam, ka ma che c'monjtze cyu'n xjal, cywa'nxe aju cbel k'o'n cywitze; 9ex keju yab ate' tuj tnam lu che banix cyu'ne, ex cymanxe cye xjal: Ma tzul lak'e' tcawbil Dios cyuc'ile, che chicuye. 10Pero ka at jun tnam ma che pone tuj ex minti' ma che c'monjtze cyu'n xjal, cyexe tuj cay ex cymanxe: 11Axju tpujil cytanmiye, aju ma tz'oc lac'e' ti'j kkane, c'elel kchto'ne te jun yec'bil cyi'je ka mya ba'n keye. Pero tz'elx cynic'e ti'j, aju tcawbil Dios ma tzul lak'e' cyuc'ile, che chicuye. 12Cxel nma'ne cyeye: Mas nim tcastiw tnam lu cbel twitz tcastiw tnam Sodoma tuj tk'ijlalil oc tul jwisi. 13Bec'bil cywitze aj Corazín. Bec'bil cywitze aj Betsaida. Porque nokwit tuj tnam Tiro ex tuj tnam Sidón o che binchanjtz ke binchben nim cyipumal ic tza'n ma nbinchaye cyxole, bi'xwitlo ajtz ti'j cyanmi ojtxi, owtlo tz'oc cyk'o'n cyxbalun ch'i'x twitz ex owtlo che cub ke' tuj tza'j, te jun techal ka otok tz'ajtz ti'j cyanmi. 14Cyja'tzun, tuj tk'ijlalil jwisi mas nim cyeye cycastiw cbel ic tza'n te tnam Tiro ex tnam Sidón. 15Ex akeye aj Capernaum, ¿maj che japunele tuj cya'j? Mlay, max che bel ponele tuj cynajbil cyimni. 16Alcye ma cub binte cyyole, weye nyole in cub tbi'n: ex alcye ma tz'el ic'un te cyeye, akine in chin el tic'un; ex alcye ma tz'el ic'un te weye, nne'l ic'un Dios tu'n, aju tzaj samante weye, chi Jesús cye. 17E ultzun meltz'aj keju 70 t-xnak'tzben Jesús in che tzalaj, ex xi cyma'n te: —Tat, icx ke ju'ẍ in ko'x nimane cyu'n nok tu'n tipumal tbiya. 18Xi tma'n Jesús cye: —Ax toc ma wile Satanás ma cu'tz tz'ak twitz cya'j ic tza'n tkan k'ancyok. 19Xi nk'o'ne cyoclene tu'n tcub cywabane ke lobaj ex ke si'nin ex tu'n tcub ti'j tcyakil tipumal aj k'oj cyu'ne. Ex minti' jun tu'n tbaj cyi'je. 20Pero mi'n che jaw tzalaje tu'nju in che nimanjtze cyu'n ju'ẍ, o'cx che tzalajxe tu'nju tz'iban cybiye tuj cya'j. 21Ax or jaw tzalaj Jesús tu'n Xewbaj Xjan ex tma: —Cxel nk'one chjonte teya, Tat, aya Tajaw cya'j ex tx'otx', tu'nju ma cub tewana tcyakil jlu cywitz ke xjal at cynabl ex cywitz ke xjal ba'nxix cyu'n, ex ma tzaj tyec'una cye ke xjal ch'in cyoclen. Ma tbinchaya icju, Tat, porque ba'n e'la tuj twitza, chi Jesús tuj tna'j Dios. 22Ax icx tma Jesús cye xjal: Tcyakil ma tzaj k'o'n weye tu'n Nmane. Ex minti' jun xjal ojtzkilte alcye kine, o'cx Nmane ojtzkilte, porque akine Tc'wa'l; ex minti' jun xjal ojtzkilte alcye Nmane, o'cx akine ojtzkilte, porque akine Tc'wa'l; ex alcye jun xjal waje tu'n t-xi nyec'une Nmane te c'eleltzun tnic' xjal ti'j Nmane, porque akine Tc'wa'l, chi Jesús cye. 23Ajtz meltz'aj twitz Jesús cyuc'il t-xnak'tzben, ex xi tma'n o'cxcu cye: —At tzalajbil cye xjal in cyque'yin tcyakilju in cyile; 24porque cxel nma'ne cyeye, nimcu t-sanjel Dios ex nimcu rey o cyajbe tu'n cylonte aju in cyile, pero minti' o cyil; ex o cyajbe tu'n cybinte aju in cybi'ne, pero minti' o cybi, chi Jesús cye t-xnak'tzben. 25Ex at jun chic'bal ti'j ley ul lak'e' tu'n toc Jesús tuj joybil ti'j tu'n, ex xi tma'n te: —Xnak'tzal, ¿ti oc nbincha'ye tu'n tten nchwinklale te jumajx? 26Xi tma'n Jesús te: —¿Alcye tz'iban tuj ley? ¿Chi toc tu'n oc in jaw t-sch'ina? 27Xi ttzak'we'n xnak'tzal ti'j ley: —Aju tz'iban tuj ley in tma'n cyja': Cyc'ujlame Kman Dios tu'n tcyakil cyanmiye, tu'n tcyakil cyc'u'je, tu'n tcyakil cyipumale ex tu'n tcyakil cynable; ex cyc'ujlame ke cyuc'ile ic tza'n cyeye in cyc'ujlan cyibe, chi tuj Tu'jil. 28Xitzun tma'n Jesús te: —Ba'n ma tmaya; ka ma tbinchaya jlu cteltzun tchwinklala. 29Atzunte xjal o tajbe tu'n mi'n tcub tz'ak tyol Jesús tibaj, xi tma'n te: —¿Alcyetzun ju wuc'ile? 30Xi ttzak'we'n Jesús: —At jun xinak tzaj tuj tnam Jerusalén, cyja' tcu'x tuj be tu'n tpon tuj tnam Jericó, ex tzyet cyu'n elek' tuj be, el cyi'n tcyakilju at te tuc'ix t-xbalun ex baj cybju'n, ex e ic'tzun, cyaj cyk'o'n ch'ixtok tcyim. 31Ex tc'ulbacu, cu'x jun pal cye judiy tuj be, ex tej tlonte pal ju xjal aju otok baj c'ixbisa'n, ic'x ttxlaj be minti' o we'. 32Ax icx jun aj Leví, tej tcanun tuj lugar jatum ta' xjal aju otok baj c'ixbisa'n, nok xi'cu tque'yin, ax icx ic'x ttxlaj be minti' o we'. 33Pero at jun xjal aj Samaria cyja' t-xi' tuj be, pon lak'e' jatum ta' xjal aju otok baj c'ixbisa'n, ex tej tlonte, tzaj k'ak'an tc'u'j ti'j. 34Pontzun lak'e' ttxlaj, baj tk'anan tc'ixblen tu'n aseyt ex vin ex oc tpotzin; ex jax tk'o'n tibaj tchej, xi ti'n tuj mesón, ex oc tcwentin. 35Ex te juntl k'ij tej tic' ju xjal aj Samaria, jatz ti'n cabe denari pwak, xi tk'o'n te tajwil mesón ex cyaj tma'n: Cwentin oca ju xjal lu; nok jte'x cbajel tnajsa'na ti'j jacu chjet wu'ne oc wule juntl maj, chi aj Samaria. 36¿Chi toc tu'na? ¿Alcyetzun jun cyxol keju ox xjal lu oc te tuc'il ju xjal aju tzyet cyu'n elek' tuj be? 37Xitzun tma'n xnak'tzal ti'j ley: —Aju tzaj k'ak'an tc'u'j ti'j. Xitzun tma'n Jesús te: —Txi'ya ex binchama ic tza'n jlu. 38Cyja' t-xi' Jesús tuj be, pon tuj jun tal tnam; ex at jun xu'j Marta tbi o c'met Jesús tu'n tuj tja. 39Ex attok jun terman Marta, Mariy tbi, cub ke' t-xe tkan Jesús ex oc ten bilte tyol. 40Atzunte Marta in bisun cyi'j ke tichak in bant tu'n, pon lak'e' ttxlaj Jesús, ex xi tma'n te: —Tat, ¿minti'pe nno'c tk'o'na cwent ti'j wermaniye, ma chin cyaj tk'o'n njunalxe ti'j ak'untl? K'manxa te tu'n tonin wuc'ile. 41Pero xi ttzak'we'n Jesús: —Marta, Marta, nimxix in bisuna ti'j tcyakil tak'una ex in baj tc'u'ja ti'j. 42Pero nok jun mas ilxix ti'j; ex aju mas ba'n, atzunju ma jaw t-sc'o'n Mariy, ex mlay tz'el k'i'n te.

will be added

X\