Lucas 1

1Nimcu xjal o cyajbe tu'n tcub cytz'iban ke yol tuj tumelxix ti'j tcyakilju o baj kxole. 2Ic tza'n ma ko xnak'tzanjtze cyu'n keju e que'yinte atxix ttzajlen xe't, ex e oc pacbal ti'j tkanil ba'n. 3Tbajlenxi nque'yine tcyakil tuj tumelxix atxix t-xe tnejel, ax icx weye ba'n ela tuj nwitze tu'n t-xi ntz'ibane tcyakil teya tuj tumelxix, aya Teófilo ma' toclena, 4tu'ntzun telxix tnic'a ti'j ka axix toc tcyakilju o xnak'tzanjtza ti'j. 5Tej toctok Herodes te rey tuj tx'otx' Judey, attok jun pal cye xjal judiy, Zacarías tbi, at toclen cyxol jun c'loj pal tiyjil Abías. Aju t-xu'jil Zacarías Elisabet tbi, ax tiyjil pal Aarón. 6Cycabil tz'aklxix ke twitz Dios, ex in che ank'in minti' cypaltil, porque in xi cyniman cycyakil tmandamyent Kman tuc'ix ju tley. 7Pero minti' jun cyc'wa'l at, porque miban alin Elisabet, ex cycabil otok che tijin. 8Tej tpon k'ij tu'n cyajben Zacarías cyuc'ix ke tuc'il tuj tja Dios, 9ic tza'nx cymod ke pal cye judiy, tc'ulbacu a Zacarías tu'n tocx tuj tja Dios patulte storac. 10Ex cycyakil xjal in che na'ntok Dios ttxa'n pe'n tuj or tej matok in tz'e'y storac. 11Ex cub tyec'un tib jun t-anjel Kman twitz Zacarías, wa'ltok ju anjel lu tuj bank'abaj ttxlaj altar jatum in cub patit storac. 12Tej tque'yinte Zacarías ju anjel, jaw sec'paj ex tzaj nim t-xobil. 13Atzunte anjel xi tma'n te: —Mi'n xoba Zacarías; porque tzul tk'o'n Dios aju xi tkanina te, ex ctzajel jun tc'wa'la ti'j t-xu'jila Elisabet, ex Juan tbi c'oquel tk'o'na. 14Ctzalajela nimxix ti'j, ex nimcu xjal che tzalajel oc titz'j c'wa'l lu; 15porque nim toclen ju tc'wa'la twitz Dios. Mi'n txi tc'a'n vin mi k'e'n, ex cnojel tuj tanmi tu'n Xewbaj Xjan tzajnix bant na'nxtok tul itz'j. 16Ex nimcu aj Israel che ajetz meltz'aj tu'n Juan tu'n cyul tuc'il Kman aju Cydios. 17Ate Juan cxe'l nej twitz Kajaw, ax toclen ex tipumal ic tza'n te Elías aju t-sanjel Dios, tu'ntzun tbant cyten ke mambaj cyuc'il cyc'wa'l, ex tu'n tbant cyniman keju miban che niman. Cyja'tzun nok banin cyten xjal tu'n Juan tu'ntzun tc'met Kajaw cyu'n oc tul, chi anjel. 18Xitzun tkanin Zacarías te anjel: —¿Tza'n tten c'elel nnic'e ti'j jlu ka ax toc? Porque weye ma chin tijine, ax icx nxu'jile, chi Zacarías. 19Xitzun ttzak'we'n anjel: —Akine Gabriel in chin ajbene te Dios; axte Dios ma tzaj samante weye tu'n nyoline tuc'ila, ex tu'n t-xi nma'ne aju ba'n tkanil lu teya. 20Pero ja'lo c'oquela men ex mlay bant tyolina; maxi cbantel tyolina ocxi tul itz'j tc'wa'la, c'oquela men porque minti' ma txi tocsla'na aju ma txi nma'ne teya, aju cjapunel oc tpon tk'ijlalil, chi anjel. 21Atzun cye xjal in che ayontok ti'j Zacarías ttxa'n pe'n ex in che labin ti'j tu'nju nim tuj o ten tuj tja Dios. 22Tejtzun tetz Zacarías minti' bant tyolin cyuc'il xjal; eltzun cynic' xjal ti'j ka at jun otok tzaj yec'un te ic tza'n tuj witzic' tuj tja Dios. Atzunte Zacarías nok tu'n tk'ab xi tyec'un cye, porque otok tz'oc te men. 23Tejtzun tjapun baj k'ij tu'n tajben Zacarías tuj tja Dios, ajtzun tja. 24Tbajlenxitzun jlu, oc ten tal Elisabet aju t-xu'jil Zacarías, ex cyaj ten jwe' xjaw tuj tja minti' ex betel, in ximan ti'j chi cyja': 25Ma tbincha Kman jun xtalbil weye ja'lo, tu'ntzun mi'n nch'ixwiye mastl cyxol xjal, chi Elisabet. 26Tbajlenxitzun kak xjaw, tzaj t-sama'n Dios aju anjel Gabriel, ul tuj jun tnam Nazaret tbi tuj tx'otx' Galiley. 27Ul tja jun k'apoj na'nxtok tlonte xinak, banin ti'j tu'n tmoje' tuc'il jun xinak José tbi, ate José tiyjil rey David; atzun tbi k'apoj Mariy. 28Ocxtzun ju anjel jatum ta' Mariy ex xi tma'n te: —In xi nk'olbena, nim t-xtalbil Dios ma tzaj tk'o'n teya. Ate Kman at tuc'ila. [Mas ma cub cy'iwla'na tu'n Dios cywitz cycyakil xu'j.] 29Tej tque'yinte Mariy ju anjel, bi'x naj tnabl tu'nju yol lu, ex cub t-ximan tiku'n in k'olbenjtz icju. 30Atzunte anjel xi tma'n te: —Mi'n xoba Mariy, porque ma tzaj tk'o'n Dios t-xtalbil teya. 31Ex ja'lo c'oquel ten tala, ex tzul itz'j jun tala, ex JESUS tbi c'oquel tk'o'na. 32Ma' toclen C'wa'l lu; ex c'oquel k'ma'n tbi Tc'wa'l Dios, aju Dios Ma'xix Toclen; cxel tk'o'n Kman Dios toclen tu'n toc te rey ic tza'n te David, porque atzun t-xe'chel. 33Ccawil cyibaj tiyjil Jacob te jumajx; ex aju tcawbil minti' bajsbil te, chi anjel. 34Atzunte Mariy xi tkanin te anjel: —¿Tza'n tten jlu? Porque weye na'nx nmoje'ye tuc'il xinak. 35Xitzun ttzak'we'n anjel: —Aju Xewbaj Xjan tzul tuc'ila, ex cyjel tena tjak' tipumal Dios Ma'xix Toclen; cyja'tzun aju ne' tzul itz'j o'cx c'ajbel te Dios, ex c'oquel tbi Tc'wa'l Dios. 36Ax icx aju ttzica Elisabet tzul itz'j jun tal masque ma tijin; ex ma bant-xi kak xjaw toclen ten tal, aju in k'manjtz ti'j ka miban alin. 37Porque minti' jun ti'xti mlaywit bant tu'n Dios, chi anjel baj tma'n. 38Xitzun tma'n Mariy te anjel: —Lu kine lu akine tmajen Kman; bant-xwit wi'je tu'n Dios ic tza'nx ma tmaya, chi Mariy. Ex eltzun tpa'n tib anjel ti'j. 39Cyujtzun ke k'ij lu ex Mariy ex jurat xi' tuj tiwitz tx'otx' tuj jun tnam tuj tx'otx' Judey; 40ex ocx tuj tja Zacarías, ex xi k'olben Mariy te Elisabet. 41Tej tbinte Elisabet aju k'olbebl te tu'n Mariy, jaw yucch tal ne' tuj talbil, ex o noj tuj tanmi Elisabet tu'n Xewbaj Xjan. 42Ex jaw tk'ajk'ajel twi' Elisabet cyuwxix ex tma: —Mas ma cub cy'iwla'na cyxol cycyakil xu'j, ex ma cub cy'iwla'n ju tala. 43¿Ti woclene tu'nju ma tzula visitaril weye, aya ttxu' Wajawe? 44Porque o'cx tej xi nbi'ne tk'olbebla, ma jaw yucch tal ne' tu'n tzalajbil tuj walbile. 45At tzalajbil teya tu'nju ma txi tocsla'na, porque tcyakilju o tma Kman teya cjapunel, chi Elisabet. 46Atzunte Mariy tma: In tnimsa'n wanmiye tbi Kman, 47ex in tzalaj wanmiye ti'j Dios aju Clol weye. 48Porque ma tzaj tque'yin Dios mans kine, akine tmajen; ex texju ja'lo cucx oc cyma' cycyakil xjal weye: At tzalajbil teya, che chilo. 49Porque nimxix ma binchanjtz weye tu'n Dios aju at nim tipumal, ex Xjan ju tbi. 50Ex cucx in k'ak'an tc'u'j cyi'j keju in che niman te. 51Nimxix ma tbincha tu'nju at tipumal; ex keju in jaw cyniman cyib, ma cub tk'uchin Dios cyximbetz. 52Ma tz'el ti'n cyoclen ke cawil at nim cyipumal, ex ma che jaw tnimsa'n keju mans. 53Keju nne'l cyc'u'j ma tzaj tk'o'n nimcu cye, atzun cye k'inun minti' ch'in ma tzaj k'o'n cye. 54Ma onin cyi'j aj Israel akeju tmajen; minti' ma tzic' tna'l tu'n tu'n ttzaj k'ak'an tc'u'j cyi'j, 55ic tza'n tzaj ttzi'yan cye kxe'chel, tzaj ttziyan te Abraham ex cye tiyjil te jumajx, chi Mariy. 56Axtzun cyaj ten Mariy tuc'il Elisabet balo ox xjaw; ex te tibajxi aj tja. 57Tej tpon k'ij tu'n tul itz'j tal Elisabet, k'a jun tal ul itz'j. 58Ke tvesin ex keju at cyxilen tuc'il e tzalajxix junx tuc'il tej cybinte otok tzaj k'ak'an tc'u'j Dios ti'j. 59Ex tuj twajxakin k'ij e tzaj tu'n t-sircunsidarinjtz ju ne'; ex o cyajbe tu'n toc cyk'o'n tbi Zacarías ic tza'nx tbi tman. 60Atzunte ttxu ne' tma: —Mi'n, Juan c'oquel tbi. 61—¿Tiku'n Juan c'oquel tbi? Baka at jun cyxol ke termaniya ic tbi ic tza'n jlu, che chi. 62Ex xi cyyec'un tu'n cyk'ab tu'n t-xi cykanin te tman ne' alcye tbi ne' tu'n toc. 63Tzaj tkanin Zacarías jun tal tz'lom ex cub ttz'iban twitz cyja': Juan c'oquel tbi, chi ju cub ttz'iban. Cycyakiltzun e labin ti'j. 64Jurattzun bant tyolin Zacarías, ex xi tk'o'n chjonte te Dios. 65Cycyakiltzun ke vesin tzaj nim cyxobil ti'j jlu, ex tuj tcyakil tiwitz tx'otx' tuj tx'otx' Judey e yolin xjal ti'j jlu. 66Ex cycyakil keju o cybi tkanil ti'j jlu, e ximan ti'j ex in cyma'n cyxolx: ¿Titzun c'oquel ju c'wa'l lu? Che chi. Porque oc cwentin ju c'wa'l tu'n tipumal Kman. 67Atzunte Zacarías aju tman tal ne' o noj tuj tanmi tu'n Xewbaj Xjan, xi tchic'ba'n ju yol tzaj tma'n Dios te ex tmatzun cyja': 68Nimanxwit tbi Kman aju Kdios aj Israel ko', porque ma tzul kuc'il onil ke etzan ko' tu'n, ex ma ko colpet tu'n. 69Ma tzaj tk'o'n jun Clol ke nim tipumal, atzun ma tzaj cyxol ke tiyjil David aju tmajen. 70Ic tza'nx tzaj ttziyan Dios atxix ojtxi nok tu'n cyyol ke t-sanjel xjan: 71Tzaj tma'n tu'n kclet tu'n tuj cyk'ab aj k'oj ki'j, ex tuj cyk'ab keju in ko el ic'un cyu'n; 72ex tu'n ttzaj k'ak'an tc'u'j cyi'j kxe'chel, ex tu'n ttzaj tna'n aju yol xjan cyaj bant ti'j tu'n Dios cyuc'il. 73Atzun yol jlu tzaj ttziyan Dios tu'nx tib te kxe'chel Abraham: 74Ka tu'n kclet tu'n tuj cyk'ab aj k'oj ki'j, tu'ntzun kajben te Dios minti' kxobil. 75tu'n koc xjan ex tz'aklxix twitz Dios tcyakil k'ij te kank'ibl. 76Atzun teya tal nc'wa'l, c'oquel tbiya t-sanjel Dios, aju Dios Ma'xix Toclen, porque cbel neja twitz Kajaw binchalte tbe, 77tu'n t-xi tk'o'na tkanil colbil cye ke xjal etzan ke tu'n Dios, tu'ntzun tnajset cyil. 78Ate Kdios nim in k'ak'an tc'u'j ki'j ex nim tc'ujlalil, ma tzul koptz'aj t-spic'umal kibaj ma tzaj tuj cya'j, 79tu'n tk'onjtz spic'un cyibaj keju ate' tuj klolj ex tjak' tipumal camic, ex tu'n tyec'unte kbe tu'n kbet minti' kxobil, chi Zacarías. 80Ex aju tal c'wa'l in ch'iytok, ex nno'cxi tnabl; ex o ten tuj lugar minti' cynajbil xjal tuj, maxitzun ajtz tuj lugar tuj k'ij tej ttzyet tak'un cyxol aj Israel.

will be added

X\