LEVÍTICO 25

1Tzaj yolin Kman tuc'il Moisés twi witz Sinaí ex tma: 2K'manxa cye aj Israel cyja': Oc cyocxe tuj tx'otx' cxel nk'o'ne cyeye, aju tx'otx' c'ojlal junjun maj te jun nimbil weye. 3Kak abk'i che awale cyuj cycojbile ex kak abk'i ba'n tu'n tbaj cypodarine ke tkan cy-uvaye ex tu'n tjaw cychmo'ne twitz, 4atzun tuj twukin abk'i c'ojlal tx'otx' cyu'ne te jun nimbil weye. Mi'n che awane cyuj cycojbile tuj abk'i lu, mi'n baj cypodarine ke tkan cy-uvaye 5ex mi'n jaw cychmo'ne t-xpok'l triw tajx ctzajel ch'iy, ax icx twitz uva mya podarimaj, tu'ntzun tojlan tx'otx' jun abk'i. 6Aju twitz awal tzul tk'o'n tx'otx' tu'nx tib tuj abk'i te ojlabl, atzunju c'ajbel te cywaye, te cywa ke cymajene xinak ex cymajene xu'j, te cywa ke ak'nal ex te cywa ke stranjer xjal najl cyxole, 7te cywa cywacẍe ex te cywa ke txcup te tjak' c'ul ate' tuj cytx'otx'e. Tcyakil twitz awal ctzajel tk'o'n tx'otx' tu'nx tib c'ajbel te cywaye. 8Aju wuk abk'i, ba'n tu'n t-xi cyajla'ne wuk maj, tu'ntzun tjapun jun tajlal te 49 abk'i, 9ex tuj tlajin tajlal twukin xjaw, atzunju k'ij te najsbil il; c'oqueltzun cyk'ajtza'ne tcach ẍne'l cyuj cycyakil cytanmiye. 10Aju abk'i 50 c'oquel cyk'o'ne te xjan, ex tujtzun abk'i lu c'elex tkanil tu'n cytzokpet cycyakil keju najl tuj tx'otx'; atzunju abk'i te tzokpibl. Cycyakil xjal che oquel te tajwil cytx'otx' juntl maj ex che ajel meltz'aj tu'n cypon cyxol ke xjal at cyxilen cyuc'il. 11Aju abk'i 50, atzun jun abk'i te tzokpibl, ex tuj abk'i lu mi'n cu'x cyawane awal, mi'n jaw cychmo'ne t-xpok'l triw tajx ctzajel ch'iy tuj cycojbile ex mi'n jaw cychmo'ne twitz uva mya podarimaj, 12porque atzun abk'i lu te tzokpibl cyeye ex c'oquel cyk'o'ne te xjan. O'cx cxel cywa'ne aju tu'nx tib tx'otx' ctzajel tk'o'n. 13Tuj abk'i te tzokpibl, cycyakile che etzale juntl maj ti'j cytx'otx'e. 14Ka at jun xjal ma tzaj tlak'o'n ex ka ma txi tc'ayin jun piẍ tx'otx' te jun tuc'il, mi'n cub t-sbu'n tuc'il ti'j jlu. 15Oc ttzaj cylak'o'ne tx'otx', cxel cychjo'ne ic tza'nx tajlal abk'i tbajlen abk'i te tzokpibl, ex oc t-xi cyc'ayine tx'otx' cye cyuc'ile, cxel cykanine tu'n ttzaj cychjo'n ic tza'nx tajlal abk'i tu'n tjaw chmet twitz awal. 16Ka mas nim abk'i tu'n tjaw chmet twitz awal, ax mas nim twi'; ex ka nic'xi abk'i taj, ax icx nok nic'xi twi', porque tza'nx tajlal abk'i tu'n tjaw cychmo'ne twitz awal tuj tx'otx', icxtzun twi' cxel cyk'o'ne. 17Mi'n cub cysbu'ne jun cyuc'ile. Che xobe nwitze porque akine Cymane ex Cydiose. 18Japunx ke nleye cyu'ne, cynimanxe ke nmandamyente ex japunx cyu'ne tu'ntzun cyank'ine tuj tzalajbil tuj tx'otx' cxel nk'o'ne cyeye, 19ex ctzajeltzun tk'o'n tx'otx' tu'n cywa'ne ti'j ocxi tnoj cyc'u'je, ex che ank'ile tuj tx'otx' tuj tzalajbil. 20Ex ka ma cymaye cyja': ¿Titzun cxel kwa'n tuj twukin abk'i, ka mi'n cu'x kawa'n kawal ex ka mi'n jaw kchmo'n twitz?, ka che chiye, 21ctzajel nsama'ne ncy'iwbile cyibaje tuj tkakin abk'i, ex aju twitz cyawale cjawil cychmo'ne tuj abk'i lu, ccanitel te ox abk'i. 22Cyja'tzun che wa'le ti'j twitz awal otok baj cyc'u'ne, acux nnu'l canun tu'n cyawane ti'j ac'aj twitz awal tuj twajxakin abk'i, ex cucx che wa'le tuj tbelaji'n abk'i ti'j twitz awal otok baj cyc'u'ne, acuxtzun nnu'l tk'ijlalil tu'n tjaw cychmo'ne twitz cyawale tuj tbelaji'n abk'i. 23Aju tx'otx' mlay txi c'ayit te jumajx porque weye tx'otx', atzun cyeye nok betin xjal keye ex stranjer xjal keye. 24Cyja'tzun, nok alcyex tx'otx' ma tz'oc te cyetzbile, il ti'j tu'n taj cyk'o'ne cye tnejel tajwil, tu'ntzun cyc'monte juntl maj cytx'otx'. 25Ka at jun cyxole ma tz'oc te meba ex ka ma txi tc'ayin jun piẍ ttx'otx', aju terman mas at t-xilen tuc'il, atzunju ba'n tcyaj co'pinte tx'otx' otok txi tc'ayin terman te juntl xjal. 26Katzun at jun cyxjalile minti' jun terman tu'n tcyaj co'pinte tetzbil ex ka ma chmet twi' tu'n tu'n tcyaj tco'pin tu'nx, 27cxeltzun tajla'n jte'xi abk'i t-xilen tc'ayin ex c'ajel tk'o'n te lok'ol aju tajlal pwak jte' abk'i atx taj tu'n tjapun abk'i te tzokpibl, ex c'oqueltzun juntl maj te tajwil tetzbil. 28Katzun minti' ma cnet pwak tu'n tu'n tcyaj tco'pin tetzbil, cyjeltzun ten tx'otx' lu tuj tcwent lok'ol max tuj abk'i te tzokpibl; maxitzun ctzokpetel tetzbil, ex aju xi c'ayinte etzbil c'oquel juntl maj te tajwil. 29Ka at jun ma txi tc'ayin jun ja tuj tnam tocsa'n muro ti'j, o'cx jun abk'i at toclen ti'j tu'n tcyaj tlak'o'n juntl maj; o'cx jun abk'i at toclen ti'j tu'n tcyaj tco'pin. 30Katzun minti' ma cyaj co'pin ja at tuj tnam tocsa'n muro ti'j oc tel jun abk'i, cyjeltzun ten te jumajx tuj tcwent lak'olte ex tuj cycwent ke tiyjil in che ul itz'j te tibajxi. Mlayx tz'aj k'ot te tnejel tajwil tuj abk'i te tzokpibl. 31Atzun ke ja ate' tuj tnam minti' muro tocsa'n cyi'j, ax cbantel cyi'j ic tza'n in bant cyi'j ke cojbil, jacu bant tu'n cycyaj co'pit, ex che ajel k'ot juntl maj cye tnejel cyajwil tuj abk'i te tzokpibl. 32Atzun cye aj Leví cucx ctel cyoclen tu'n tcyaj cyco'pin ke ja ate' cyujx cye cytanmi. 33Ba'n tu'n tcyaj cyco'pin aj Leví cyja; ex ka mi'n, il ti'j tu'n tcyaj tcolin lok'ol ja tuj abk'i te tzokpibl, tu'n taj tk'o'n ja cye aj Leví, porque aju cyetzbil aj Leví at cyxol aj Israel, atzunju cyja at tuj cyex cytanmi. 34Ke cojbil ate' cyi'jele cytanmi aj Leví mlay che'x c'ayit, porque atzun cyetzbil ex cucx ctel te cye te jumajx. 35Ka at jun cyxjalile ma tz'oc te meba ex ka minti' tza'n tten tu'n tank'in, ex ka ma pon cyuc'ile, il ti'j tu'n t-xi cyonine, ic tza'n jun stranjer xjal ex betin xjal, ex ax ba'n tu'n tcyaj ten cyuc'ile. 36Mi'n tz'el cykanine ta'l cypwake cxel cyk'o'ne te tch'ex, nok o'cx che xobe twitz Dios ex cyc'mome tu'n tten cyxjalile cyuc'ile. 37Mi'n tz'el cyi'ne ta'l cypwake cxel cyk'o'ne te tch'ex ex mi'n jax cylak'ba'ne twi' twa. 38Akine Cymane ex Cydiose aju etz k'inte cyeye tuj Ejipt tu'n t-xi nk'o'ne tx'otx' Canaán cyeye ex tu'n woque te Cydiose. 39Ka at jun cyxjalile ma tz'oc te meba ex ka ma tzaj tc'ayin tib cyeye tu'nju at nim tc'as cyuc'ile, mi'n cub cyk'o'ne ak'untl cyuwxix tibaj, ic tza'n jun majen tc'ayin tib; 40nok o'cx c'oquel cyk'o'ne ic tza'n jun ak'nal chjo'n tk'ij ex ka ic tza'n jun betin xjal, ex max tuj abk'i te tzokpibl cxel tcolin tu'n tak'nan cyuc'ile. 41C'elextzun tuj cyjaye junx cyuc'il ke tc'wa'l, tu'ntzun taj juntl maj cyxol ke tiyjil ex tuj cyetzbil keju at cyxilen tuc'il. 42Porque weye nmajen ke aj Israel; wu'ne e je'tz wi'ne tuj Ejipt ex mlay bant tu'n cyxi c'ayit te majen; 43mi'n che baj cyyajla'ne; nok o'cx che xobe nwitze. 44Ka cyajbile tu'n tten cymajene xinak ex ka cymajene xu'j, ba'n tu'n ttzaj cylak'o'ne cyuj ke nasyon ate' cyi'jeleye. 45Ax icx ba'n tu'n ttzaj cylak'o'ne te cymajene ke stranjer xjal ax najl cyxole, ex ke cyc'wa'l che ul itz'j acux ate' tuj cytx'otx'e. Atzun ke ba'n tu'n ttzaj cylak'o'ne tu'n cyoc te cyeye, 46ex tu'n tcyaj cyk'o'ne cye cyc'wa'le oc cycyime, ex cucx che ajbel te cye. Atzun cyeye, akeye aj Israel, mi jun cyeye ccawil tibaj jun terman, ex mi'n che cub cyyajla'ne cyermaniye junx cyiyjile cyuc'il. 47Ka at jun stranjer xjal najl tuj cytx'otx'e ma tz'oc te k'inun, ex ka at jun cyxjalile tvesin tib tuc'il ju xjal lu ma tz'oc te meba, ex ka ma txi tc'ayin tib te xjal lu ex ka te juntl xjal at t-xilen tuc'il, 48at oclenj te tu'n tchjet tzokpibl te t-xilenxi tc'ayin tib. Jacu co'pj tu'n jun terman; 49ka tu'n jun terman tman, ka tu'n jun tcy'ajal terman tman ex ka tu'n juntl xjal at t-xilen tuc'il. Ax icx jacu co'pj tu'nx tib, ka ma cnet pwak tu'n. 50Ex cjawil ti'n jun tajlal tuc'il xjal xi lak'onte te, atxix tuj abk'i tej t-xi tc'ayin tib ocxi tpon tuj abk'i te tzokpibl; aju twi' cxel k'it, ic tza'nx cyajlal abk'i ex aju tyemp otok tz'ak'nan, cjawil k'it tajlal ic tza'nx chojbil te jun ak'nal. 51Ka nim abk'i atx taj, c'ajel tk'o'n twi' ic tza'nx t-xilen tc'ayin tib, tu'ntzun tcyaj tco'pin tib tza'nx tajlal abk'i atx taj; 52katzun nic'xi taj tu'n tul canun abk'i te tzokpibl, cxel tk'o'n te co'pbilte jun tajlal ic tza'nx tajlal abk'i atx taj. 53C'oquel cyk'o'ne ic tza'n jun ak'nal tuj abk'iyin; mi'n cyak'e ambil tu'n cybaj yajla'n. 54Katzun minti' tumel tu'n tetz tco'pin tib tu'nx ex ka tu'n juntl, maxitzun ctzokpetel tuj abk'i te tzokpibl junx cyuc'il ke tc'wa'l, 55porque weye nmajen ke aj Israel, wexixe nmajen ke; wu'ne e je'tz wi'ne tuj Ejipt. Akine Cymane ex Cydiose.

will be added

X\