LEVÍTICO 24

1Tzaj yolin Kman tuc'il Moisés ex tma: 2K'manxa cye aj Israel tu'n tul cyi'n aseyt tbanilxix tuc'ila, aju nne'l ti'j twitz tze' olivo, tu'ntzun cyc'ant ke candil tcyakil tyemp, 3ex ate Aarón cbajel binchante cyten cycyakil kale, tu'ntzun cyc'ant nwitze tcyakil konic'an ti'jtzi xbalun tcubsa'n te makbil tuj ja xbalun te mojbabl tibil, twitz cax c'ubl nleye. Atzun ley lu cyjel ten cyuc'ile te jumajx ex wikinwik cyjel cyma'ne cye cyc'wa'le. 4Il ti'j tu'n tbaj tbincha'n cyten ke candil tibaj cycubil aju ttx'otx'il k'an pwak, tu'ntzun cyc'ant nwitze tcyakil konic'an. 5Ctzajel ti'na arin mas tbanil ex cbajel ttzk'ajsa'na cablaj pan nimak, te cyaje libr arin ttx'otx'il junjun, 6ex che bel tk'o'na tibaj mes lotz'imaj ti'j tu'n k'an pwak, aju tcubsa'n nwitze, ex te cabe txol c'elel tu'na, kakchak pan tuj junjun txol. 7Ex k'on cuba tbanil storac ttxlaj junjun txol pan, tu'n cucx tu'n ttzaj na't pan, ex te jun oyaj patun in cub te weye. 8Tuj tcyakil k'ij te ojlabl cbel k'ot jlu nwitze, tu'ntzun ttzaj na't aju yol cyaj bant ti'j wu'ne te jumajx cyuc'il aj Israel. 9Atzun ke pan lu te Aarón c'ajbel ex cye tiyjil; atzun ke che xel wa'nte pan lu tuj jun lugar xjan, porque mas xjanxix ke jlu cywitz mastl oyaj in cub patit nwitze. 10Cyxol aj Israel attok jun xinak ax aj Israel ttxu', atzun tman aj Ejipt te. Aju ttxu' xinak lu, Selomit tbi ex tme'jel Dibri, aju tiyjil Dan. Aju xinak lu oc ten k'ojlel tuc'il jun xinak ax aj Israel tuj campament, atzunte xinak tal xu'j aj Israel o tma jun yol mya ba'n ti'j Kman. Xitzun k'i'n twitz Moisés, 12ex xi tma'n Moisés cye tu'n tocx cyk'o'n tuj pres, acux in tzaj tma'n Kman alcye tu'n tbinchet ti'j. 13Tzajtzun yolin Kman tuc'il Moisés ex tma: 14K'i'n exa ti'jxi campament aju xinak ma yolin mya ba'n wi'je, ex cycyakil keju e binte tyol, e tcub cyk'o'n cyk'ab tibaj twi' ex e toc cyxo'n cycyakil tnam xjal tu'n abj tu'n tcyim. 15Ex k'manxa cye aj Israel cyja': Ka at jun ma yolin mya ba'n wi'je akine Tdios, ax te at til ti'j tcamic, 16ex cymel tu'n abj cyu'n cycyakil tnam xjal. Ka stranjer xjal ex ka aj Israel, ka ma yolin mya ba'n wi'je akine Cymane, il ti'j cbel byet. 17Alcye ma cub byonte jun xjal, ax icx te il ti'j tu'n tcyim. 18Alcye jun xjal ma cub byonte talun juntl, il ti'j tu'n taj tk'o'n t-xel alumaj. 19Alcye jun xjal ma tbincha jun mya ba'n ti'j tuc'il, ax icx te cbinchetel jun mya ba'n ti'j ic tza'nx otok tbincha ti'j tuc'il. 20Alcye jun ma tokj tbakil tuc'il tu'n, ax icx te il ti'j tu'n ttokit tbakil; ka ma jatz tbak' twitz tuc'il tu'n, ax icx te il ti'j tu'n tjatz tbak' twitz, ex ka ma tz'etz twitz te' tuc'il tu'n, ax icx te il ti'j tu'n tetz twitz te'. Il ti'j tu'n tc'ixbiset ic tza'n otok tbincha ti'j tuc'il. 21Alcye jun xjal ma cub byonte talun juntl, il ti'j tu'n taj tk'o'n t-xel alumaj, pero alcye jun ma cub byonte jun xjal, icx te il ti'j tu'n tcyim. 22Aju ley lu c'ajbel cye stranjer xjal tza'nx cye aj Israel. Akine Cymane ex Cydiose. 23Xitzun tma'n Moisés cye aj Israel aju otok tzaj tma'n Dios te, ex extzun cyi'n ti'jxi campament aju xinak otok yolin mya ba'n ti'j Dios, ex oc cyxo'n tu'n abj tu'n tcyim. O cybincha aj Israel ic tza'nx otok tzaj tma'n Kman te Moisés.

will be added

X\