LEVÍTICO 23

1Tzaj yolin Kman tuc'il Moisés ex tma: 2K'manxa cye aj Israel cyja': Ke nink'ij nim cyoclen te weye tu'n tcub cybuyin cyibe ex tu'n cyc'ulune nwitze, atzun ke jlu. 3Kak k'ij che ak'nale tuj seman, atzunju twukin k'ij mi jun ak'untl cbantel cyu'ne, porque k'ij xjan te buyj tibil jlu. Atzun jun k'ij lu te ojlabl cxel cyk'o'ne te nimbil weye nok jaxja che tele. 4Ax icx cbel cybuyin cyibe tuj k'ij banin ti'j ex cbel cyic'sa'ne ke k'ij lu nimxix toclen te nimbil weye: 5Tuj cyajlaj tajlal tnejel xjaw te kale, atzun k'ij tu'n tcub cyic'sa'ne Xjan K'ij te nimbil weye. 6Atzun tuj t-olajin k'ij tex xjaw lu, atzun k'ij tu'n tcub cyic'sa'ne tk'ijlalil pan minti' t-samel tuj tu'n tjaw mal tc'u'j. Wuk k'ij che wa'le cyi'j pan lu te nimbil weye. 7Ex tuj tnejel k'ij te nink'ij lu, c'oquel jun buyj tibil xjan cyu'ne, ex minti' jun ak'untl cbantel cyu'ne. 8Tuj enter wuk k'ij lu cbel cypatune chojbil te Kman, atzun tuj twukin k'ij c'oquel juntl buyj tibil xjan cyu'ne ex mi jun ak'untl cbantel cyu'ne. 9Tzaj yolin Kman tuc'il Moisés ex tma: 10K'manxa cye aj Israel cyja': Oc cypone tuj tx'otx' cxel nk'o'ne cyeye, oc tjaw triw cyu'ne, ctzajel cyi'ne aju tnejel che'l te pal. 11Te juntl k'ij tbajlenxi k'ij te ojlabl, cxel tyucun pal tnejel twitz awal lu nwitze, tu'ntzun tc'met wu'ne cyeye. 12Ax k'ij oc ttzaj cyk'o'ne tnejel twitz awal weye, ctzajel cyi'ne jun tal tman ẍne'l minti' tpaltil ex te jun abk'i, tu'n tcub patit te jun oyaj weye. 13Ax icx ctzajel cyi'ne cyaje libr arin tbanilxix smo'n tuc'il aseyt, tu'n ttzaj cyk'o'ne weye te jun oyaj patun in cub at tc'oc'jal tbanilxix. Ax icx ctzajel cyi'ne jun litr ta'l twitz uva tu'n tcub ket te jun oyaj weye. 14Ttzajlenxi cyk'o'ne oyaj lu weye, ba'n tu'n cywa'ne ti'j twitz cyawale, ka triw tx'i'limaj ex ka cha'x, ex ka pan, pero nej otok tzaj cyk'o'ne cyoyaje weye. Atzun jun ley lu cyjel ten cyuc'ile te jumajx ex wikinwik cyjel cyma'ne cye cyc'wa'le nok jaxja che tele. 15Tujx k'ij t-xilen cyk'o'ne cyoyaje otok txi yuquet nwitze, ex ka ewtok tbajlen k'ij te ojlabl, cxel cyajla'ne wuk seman cabal. 16Octzun tjapun wuk seman tbajlen k'ij te ojlabl, tuc'ix juntl k'ij, atzun ctz'aketel 50 k'ij. Maxitzun ctzajel cyi'ne ac'aj cyoyaje twitz awal weye. 17Ex cybinchan baje cabe pan ma cyjaye, te cyaje libr talil junjun ex at t-samel tuj tu'n tjaw mal tc'u'j, tu'n ttzaj yucut nwitze, ex a arin c'ajbel cyu'ne te pan aju mas tbanilxix, atzun jun cyoyaje ctzajel cyk'o'ne weye ti'j tnejel twitz cyawale. 18Junx cyuc'il ke pan ctzajel cyi'ne wuk tal tman ẍne'l minti' cypaltil, te jun abk'i ke, tuc'ix jun tal tor ex cabe tman ẍne'l, tu'ntzun cycub patit te oyaj weye at tc'oc'jal in chin tzalaje ti'j. Atzun cyoyaje jlu ctzajel cyi'ne te tmoj twitz awal ex ta'l twitz uva. 19Ax icx ctzajel cyk'o'ne jun tman chip te chojbil cyile ex cabe tal tman ẍne'l te jun abk'i ke, te jun oyaj te mojbabl tibil. 20Che xel tyucun pal ke cabe tal tman ẍne'l lu nwitze junx tuc'il pan ti'j tnejel twitz awal, ex che xjansetel ke oyaj lu te weye, tu'ntzun tajben te pal. 21Ax k'ij lu cbel cybuyin cyibe tuj jun buyj tibil xjan ex mi jun ak'untl cbantel cyu'ne. Atzun jun ley lu cyjel ten cyuc'ile te jumajx, ex wikinwik cyjel cyma'ne cye cyc'wa'le nok jatum che tele. 22Oc tjaw cychmo'ne twitz cyawale, il ti'j cyjel cyk'o'ne ch'in ttxa'nile cojbil ex mi'n che aje sacwilte aju otok cyaj tz'ak. Cyk'oncje jlu cye meba ex cye betin xjal. Akine Cymane ex Cydiose. 23Tzaj yolin Kman tuc'il Moisés ex tma: 24K'manxa cye aj Israel ke yol lu: Tuj tnejel k'ij te twukin xjaw c'oquel jun nink'ij te ojlabl cyu'ne, tuc'ix jun buyj tibil xjan, tu'n ttzaj cyna'ne t-xtalbil Dios tuc'il tk'ajk'ajel twi chun. 25Cbel cypatune jun oyaj te weye ex mi jun ak'untl cbantel cyu'ne. 26Ax icx tzaj yolin Kman tuc'il Moisés ex tma: 27Tuj tlajin k'ij tex ju twukin xjaw, atzun k'ij tu'n tnajset cyile. Atzun k'ij lu tu'n toc cybuyin cyibe tuj jun buyj tibil xjan, ex tuj k'ij lu cbel cyyo'ne we'yaj ex cbel cypatune oyaj te nimbil weye. 28Mi jun ak'untl cbantel cyu'ne tuj k'ij lu, porque atzun k'ij tu'n tnajset cyile nwitze, akine Cymane ex Cydiose. 29Ka at jun xjal minti' ma txi tniman tu'n tcub tyo'n we'yaj tuj k'ij lu, bi'x c'elex lajet tu'ntzun mi'n ttentl cyxol t-xjalil. 30Ex ka at jun xjal ma tz'ak'nan tuj k'ij lu, bi'x cnajel wu'ne tu'ntzun mi'n ttentl cyxol t-xjalil. 31Mi jun ak'untl cbantel cyu'ne tuj k'ij lu. Atzun ley lu cyjel ten cyuc'ile te jumajx, ex wikinwik cyjel cyma'ne cye cyc'wa'le nok jatum che tele. 32Aju k'ij lu, k'ij te ojlabl te cyeye ex tu'n tcub cyyo'ne we'yaj, ctzyetel te kale tuj belaj tajlal xjaw ex cpol baj tuj juntl k'ij te kale. 33Tzaj yolin Kman tuc'il Moisés ex tma: 34K'manxa cye aj Israel cyja': Tuj t-olajin tajlal twukin xjaw, ctzyetel nink'ij cyi'j tal ja t-xak tze'yin cywi', ex wuk k'ij cbel cyic'sa'ne te nimbil weye. 35Tuj tnejel k'ij nink'ij c'oquel jun buyj tibil xjan ex mi jun ak'untl cbantel cyu'ne tuj k'ij lu. 36Wuk k'ij ctzajel cyk'o'ne oyaj weye patun in che cub, atzun tuj twajxakin k'ij c'oquel juntl buyj tibil xjan cyu'ne, ax icx ctzajel cyk'o'ne oyaj weye patun in cub. Atzun jun nink'ij lu ma' toclen ex mi jun ak'untl cbantel cyu'ne tuj k'ij lu. 37Atzun ke nink'ij jlu ma'xix cyoclen te weye; cyujtzun ke nink'ij lu c'oquel buyj tibil xjan te weye cyu'ne, ex cyujtzun ke k'ij lu ctzajel cyk'o'ne weye oyaj patun in che cub, ke oyaj te chojbil cyile, ke oyaj ti'j twitz cyawale, ke oyaj te chojbil weye, tuc'ix oyaj ti'j ta'l twitz uva; teylex te junjun cxel cyk'o'ne tuj k'ij banin ti'j. 38Atzun ke nink'ij lu part ke, part ke nink'ij te ojlabl, ex atzun ke oyaj lu tu'n ttzaj cyk'o'ne weye, part ke, part ju oyaj tziyimaj cyu'ne ex ke oyaj ctzajel cyk'o'ne tu'n cyexe cygan. 39Tuj t-olajin tajlal twukin xjaw, oc tjaw baj cychmo'ne twitz cyawale, c'oquel wuk k'ij nink'ij cyu'ne te weye. Aju tnejel k'ij jun k'ij te ojlabl, ax icx twajxakin k'ij, ax juntl k'ij te ojlabl. 40Tuj tnejel k'ij ctzajel cyi'ne tk'ab tze' tbanilxix tuc'ix twitz, cyuc'ix ke tk'ab xa'j, cyuc'ix ke tk'ab tze' puro pin cyxak, cyuc'ix ke tk'ab chjaj at ttzi a' ex wuk k'ij che tzalajele nwitze. Akine Cymane ex Cydiose. 41Tcyakil abk'i c'oquel wuk k'ij nink'ij cyu'ne nwitze tuj twukin xjaw. Atzun jun ley lu cyjel ten cyuc'ile te jumajx ex wikinwik cyjel cyma'ne cye cyc'wa'le. 42Cyujtzunju ke wuk k'ij te nink'ij lu, cycyakil aj Israel ax che itz'jel tuj tx'otx' jatum che najale che tel cyuj tal ja t-xak tze'yin cywi', 43tu'ntzun tel cynic' cycyakil cyiyjile ti'j, akeju che ul itz'j te tibajxi, tej cyetz wi'ne cyxe'chel tuj Ejipt nok cyuj tal ja t-xak tze'yin cywi' e najan wu'ne. Akine Cymane ex Cydiose. 44Atzun ke yol lu xi tma'n Moisés cye aj Israel cyi'j ke nink'ij ma' cyoclen te Kman.

will be added

X\