LEVÍTICO 22

1Tzaj yolin Kman tuc'il Moisés ex tma: 2K'manxa te Aarón ex cye ke tcy'ajal tu'n tten cycwent cyi'j ke ti'xti xjan, aju in tzaj cyk'o'n aj Israel weye, tu'ntzun mi'n toc tk'o'n nbiye xjan te minti' tajben. Akine Cymane. 3K'manxa cye: Ic tza'nx ja'lo ax icx tuj tk'ijlalil tzul, ka at jun tiyjil Aarón ttz'ilsan tib ma pon lak'e' cyi'j ke ti'xti xjan aju ctzajel cyk'o'n ke aj Israel weye, bi'x c'elel toclen te pal, tu'n mi'n tajben weye. Akine Cymane. 4Ka at jun xinak tiyjil Aarón yab tu'n tx'a'c minti' k'anbil ti'j, ex ka in jaw poj twi ttz'a'lbil, mya ba'n tu'n twa'n cyi'j ke ti'xti xjansamaj; max cwa'l ti'j ocxi t-sakix. Ax icx ka at jun ma tz'oc maconte jun ti'xti tz'il, aju otok tz'oc tacl t-ximlal jun cyimni ti'j, ex ka ma tz'oc tmaco'n jun xjal yab tu'n poj in jaw twi ttz'a'lbil, 5ex ka ma baj ttz'ilsan tib tu'nju toclen tmaco'n jun jil jaku'n in xi' tc'u'j twitz tx'otx', ex ka ma tz'oc tmaco'n jun xinak ttz'ilsan tib tu'n nok alcyexcu ttz'ilil, 6bi'x ctz'ilixtel ex max c'oquel te sak juntl maj ocxi ttzaj klolj; mlay wa'n cyi'j ke ti'xti xjan ka na'nxtok tbaj chin. 7Csakixtel max ocxi tex k'ij. Te tibajxi ba'n tu'n twa'n cyi'j ke ti'xti xjansamaj, porque atzun twa. 8Mi'n txi tchyo'n tchibjal jun jil tajx otok cyim, ex ka tu'n jun txcup te tjak' c'ul otok cub byo'n, tu'ntzun mi'n ttz'ilix tu'n jlu. Akine Cymane. 9Il ti'j tu'n cyjapun ke nmandamyente cyu'n pal, tu'ntzun mi'n cybincha'n il ex tu'n mi'n cycyim tu'nju otok tz'oc cyk'o'n nmandamyente te minti' tajben, porque akine aju Cymane ma baj xjansante cye. 10Mi jun xjal mya tiyjil pal jacu wa'n cyi'j ke ti'xti xjansamaj, mi ju xjal cpol betzalte pal ex mi ju xjal in ak'nan tuc'il; mi jun ba'n tu'n twa'n cyi'j ke ti'xti xjansamaj. 11Pero ka at jun pal ma tlok' jun tmajen tu'n pwak, aju majen lu ba'n tu'n twa'n cyi'j ke ti'xti xjansamaj; ax icx ke majen ax otok che itz'j tuj tja pal, ba'n tu'n cywa'n ti'j wabj lu. 12Oc tmoje' jun cyme'jel pal tuc'il jun xjal mya pal, minti'tl toclen tu'n twa'n cyi'j ke oyaj in xi k'ot cye pal. 13Pero ka ma cyaj ten txin lu te meba xu'j ex ka ma cub tpa'n tib tuc'il tchmil ex minti' tal otok tzaj, ka ma pon meltz'aj tja tman juntl maj tjunalxte, ic tza'nx tten nej tej minti'tok tchmil, jacu wa'n ti'j wabj in xi' tu'n tman. Atzun ke xjal mya tiyjil pal, minti' cyoclen tu'n cywa'n ti'j. 14Katzun at jun xjal ma txi twa'n ke wabj xjansamaj ex minti' bi'n tu'n ka xjansamaj, cxel tk'o'n t-xel te pal, ex te tibajxi jlu cxel tk'o'n tjwe'yin tibaj; 15pero mi'n txi cyk'o'n pal ambil cye aj Israel tu'n toc cyk'o'n ke ti'xti xjansamaj te nok alcyex nic'bebl, aju ctzajel cyk'o'n xjal weye, 16tu'ntzun mi'n ttzaj mya ba'n cyibaj tu'n tlaj cyil ka ma txi cywa'n ke ti'xti xjansamaj. Akine aju Cymane ma baj xjansante cye. 17Tzaj yolin Kman tuc'il Moisés ex tma: 18K'manxa te Aarón ex cye tcy'ajal ex cye cycyakil aj Israel cyja': Ka at jun aj Israel ex ka jun stranjer xjal najl cyxol ctzajel tk'o'n jun alumaj te oyaj patun in cub nwitze, ka te jun oyaj oc tjapun jun yol tu'n aju otok txi ttziyan ti'j, ex ka jun oyaj tu'n tex tgan ctzajel tk'o'n, 19ba'n tu'n ttzaj tk'o'n jun tor ex ka jun tman ẍne'l ex ka jun tman chip minti' tpaltil, tu'ntzun tc'met wu'ne. 20Mi'n tzaj cyk'o'ne jun alumaj at tpaltil, porque a jlu mlay c'met wu'ne cyeye. 21Nok alcye jun taj tu'n ttzaj tk'o'n weye jun chojbil te mojbabl tibil wuc'ile, ka te jun oyaj oc tjapun jun yol tu'n aju otok txi ttziyan, ex ka jun oyaj tu'n tex tgan, il ti'j tu'n ttzaj tk'o'n jun wacẍ ex ka jun ẍne'l minti' tpaltil, tu'ntzun tc'met wu'ne. 22Mi'n tzaj cyk'o'ne weye jun alumaj moẍ twitz ex ka at c'ixblen ti'j, ka cox, ka at tx'a'c ti'j ex ka sal ti'j ex ka at juntl tyabil ttz'umal, ex mi'n txi cyk'o'ne tu'n tcub patit te jun oyaj tibaj n-altare. 23Te cyoyaje tu'n cyexe cygan, ba'n tu'n ttzaj cyk'o'ne ka jun wacẍ ex ka jun ẍne'l, ichak ẍtij, ex ka nok otok tzaj swec'j twitz tkan, pero mi'n tzaj cyk'o'ne te jun oyaj oc tjapun jun yol cyu'ne aju otok txi cytziyane, porque mlay c'met jlu. 24Ax icx mi'n tzaj cyk'o'ne weye akeju alumaj at ẍil ti'j cybak' ex ka at c'ixblen cyi'j ex ka o che el tzakin ex ka o che el kesin. Mi'n cybinchaye jlu tuj cytanmiye. 25Ax icx mi'n tzaj cyi'ne ke alumaj lu te jun stranjer xjal tu'n ttzaj cyk'o'ne weye, porque at cypaltil ex mlay che c'met wu'ne cyeye. 26Tzaj yolin Kman tuc'il Moisés ex tma: 27Oc tul itz'j jun tal wacẍ ex ka jun tal ẍne'l ex ka jun tal chip, il ti'j tu'n tcyaj ten wuk k'ij ti'j ttxu' tu'n tch'u'n; max tuj twajxakin k'ij jacu c'met wu'ne tu'n tcub patit te jun oyaj weye. 28Mi'n cub cybyo'ne jun vac ex ka jun ttxu ẍne'l tuj junx k'ij junx tuc'il tal. 29Oc ttzaj cyk'o'ne jun cyoyaje te ak'bil chjonte weye, cybinchame tujxix tumel tu'ntzun tc'met wu'ne, 30ex bi'x cbajel cychyo'ne tuj junx k'ij; mi'n cyaj cyk'o'ne ch'intl tuj juntl k'ij. Akine Cymane. 31Cynimanxe ke nmandamyente ex japunx cyu'ne. Akine Cymane. 32Mi'n tz'oc cyk'o'ne nbiye xjan te minti' tajben, nok o'cx chin oquel cyk'o'ne te xjan. Akine Cymane aju ma baj xjansante cyeye, 33ex ma che etz wi'ne tuj Ejipt tu'ntzun woque te Cydiose. Akine Cymane.

will be added

X\