LEVÍTICO 21

1Tzaj tma'n Kman te Moisés cyja': K'manxa cye pal akeju tcy'ajal Aarón tu'n mi'n toc cymaco'n t-ximlal jun cyimni cyxol ke cyxjalil, tu'ntzun mi'n cytz'ilix. 2O'cx at cyoclen tu'n toc cymaco'n t-ximlal cytxu' ex ka cyman ex ka cycy'ajal ex ka cyme'jel ex ka jun cyerman xinak, 3ex ka jun cyanb na'nx tmoje' ex ax ta' tuj cycwent, masque che tz'ilixtel ke tu'n tlaj otok tz'oc cymaco'n cyximlal ke jlu. 4Pero mi'n tz'oc cymaco'n t-ximlal juntl xjal aju nok otok moje' tuc'il jun cyerman, tu'ntzun mi'n cytz'ilix. 5Mi'n tz'el cyc'oẍin ti'j cywi', mi'n tz'el cymatzo'n twi cyxmatz ex mi'n baj cykesin cyximlal, 6nok o'cx tu'n tbaj cyxjansan cyib nwitze tu'ntzun mi'n toc cyk'o'n nbiye te minti' tajben, porque atzun ke che tzajel k'onte ke oyaj patun in che cub nwitze, ex ax ke che tzajel k'onte ke pan te weye, akine Cydios; cyja'tzun cucx tu'n cyten xjan ke. 7Ax icx mya ba'n tu'n cymoje' tuc'il jun xu'j jawni twitz cyuc'il xinak, mi tuc'il jun xu'j otok cub tpa'n tib tuc'il tchmil, porque xjansamaj ke pal tu'n cyajben weye. 8Che cypa'n ela ke, porque atzun ke che tzajel k'onte tcyakil txcaj oyaj weye, ex xjan che oquel ke te cyeye, porque akine Cymane xjan kine, ex wu'ne che oquel te xjan. 9Ex ka at jun cyme'jel pal jawni twitz cyuc'il xinak, tu'n jlu cbel tk'o'n tch'ixwi tman; il ti'j cbel patit. 10Aju tnejel pal ma tc'am toclen tu'nju aseyt te xjansabl cub ko'n tuj twi' ex ma tc'am toclen tu'n toc tk'o'n xbalun xjansamaj, cyja'tzun mlay tz'el tchitpu'n ttzmal twi' ex mlay tz'el t-sbit'un t-xbalun ti'j tu'n tlaj tbis; 11ex mlay tz'ocx que'yilte jun cyimni masque ka a tman ex ka ttxu', tu'ntzun mi'n ttz'ilix. 12Mi'n tz'etz tuj njaye ex mi'n baj ttz'ilsa'n, porque o cub ko'n aseyt te xjansabl tibaj twi', tu'n tajben te weye. Akine Cymane. 13Il ti'j tu'n tmoje' tuc'il jun xu'j na'nx tlonte xinak. 14Mi'n jaw ti'n jun meba xu'j te t-xu'jil, mi jun xu'j otok cub tpa'n tib tuc'il tchmil, mi jun xu'j otok til xinak, ex mi jun xu'j jawni twitz cyuc'il xinak. Aju xu'j na'nx ttil xinak, atzunju ba'n tu'n toc te t-xu'jil, ex ax cyxol ke tiyjil, 15tu'ntzun mi'n ttzaj jun tal xu'j mya te pal tcy'ajal; porque akine Cymane ma chin baj xjansante te. 16Tzaj yolin Kman tuc'il Moisés ex tma: 17K'manxa te Aarón cyja': Ka at jun tiyjil at ttzacaj, mi'n txi k'ot ambil te tu'n ttzaj tk'o'n tcyakil txcaj oyaj weye. 18Porque mijun xinak at ttzacaj jacu tzaj k'onte oyaj weye: Ka moẍ, ka cox, ka tzcaj ta' ttxa'n ex ka t-ẍcyin, 19ka toknaj jun tkan ex ka tk'ab, 20ka yuc' ti'j, ka ch'in twa'l, ka muj cyi'j tbak' twitz, ka at tx'a'c ti'j, ka at sal ti'j ex ka tzcaj ke tbak'. 21Mi jun tiyjil pal Aarón tzcaj ta' jacu tzaj k'onte oyaj patun in cub te weye. Tu'nju at ttzacaj, mlay tzaj tk'o'n tcyakil txcaj oyaj weye. 22Ba'n tu'n twa'n ti'j oyaj lu ex cyi'j ke ti'xti xjan ex keju mas xjanxix, 23pero mlay tz'ocx ti'jxi xbalun tcub tuj ttzi Njaye ex mlay pon lak'e' ti'j altar tu'nju at ttzacaj, tu'ntzun mi'n tbaj ttz'ilsa'n Njaye. Akine Cymane o chin xjansante cye, chi Dios. 24Atzunte Moisés xi tma'n tcyakil yol lu te Aarón ex cye ke tcy'ajal ex cye cycyakil aj Israel.

will be added

X\