LEVÍTICO 20

1Tzaj yolin Kman tuc'il Moisés ex tma: 2K'manxa cye aj Israel cyja': Ka at jun aj Israel ex ka jun stranjer xjal najl cyxole ma txi tk'o'n jun tc'wa'l tu'n tcub patit te jun oyaj te Moloc aju tilbilal nno'c cydiosin xjal, il ti'j tu'n tcyim; c'oquel xo't tu'n abj cyu'n tnam xjal. 3Ctzajel nk'oje ti'j xjal lu, ex bi'x cymel wu'ne tu'ntzun mi'n ttentl cyxol t-xjalil, tu'nju otok baj ttz'ilsa'n Njaye ex otok tz'oc tk'o'n Nbiye Xjan te minti' tajben, tu'nju tcublen tpatun jun tc'wa'l twitz Moloc aju tilbilal nno'c cydiosin xjal. 4Ka minti' ma che k'ajt xjal ti'j jlu ex minti' otok cub cyk'o'n t-sentens xjal tu'n tcyim, 5ctzajeltzun nk'oje ti'j xjal lu ex cyi'j keju ate' tuj tja, ex bi'x cymel wu'ne junx cyuc'il keju otok che'x lpe' ti'j tu'n cyc'ulun twitz Moloc, tu'ntzun mi'n cytentl cyxol cyxjalil. 6Ka at jun xjal ma txi tkanin jun t-xjel cye ke xjal ba'n che txocon cyi'j cyanmi cyimni, ex ka ma txi' cyuc'il chman, ctzajel nk'oje ti'j xjal lu ex bi'x cymel wu'ne tu'ntzun mi'n ttentl cyxol t-xjalil. 7Cyxjansamxix cyibe nwitze, ex che oque xjan, porque akine Cymane ex Cydiose. 8Cynimanxe ke nleye ex japunxix cyu'ne. Akine Cymane aju xjansalte cyeye. 9Alcye jun ma yolin mya ba'n ti'j tman ex ka ti'j ttxu', cbel t-sentens tu'n tcyim tu'nju otok yolin mya ba'n ti'j tman ex ka ti'j ttxu'. Ax te at til ti'j tcamic. 10Ka at jun xinak ma tbincha aj pajil tuc'il t-xu'jil tuc'il, cycabil cbel cysentens tu'n cycyim, tza'nx te xinak ax icx te xu'j. 11Ka at jun xinak ma cub tan tuc'il juntl t-xu'jil tman, cbel tk'o'n tch'ixwi tman tu'n jlu. Cyja'tzun cbel t-sentens xinak tu'n tcyim tuc'ix xu'j, ex ax ke at cyil ti'j cycamic. 12Ka at jun xinak ma cub tan tuc'il tlib, cycabil cbel cysentens tu'n cycyim, ex ax ke at cyil ti'j cycamic porque ic'bilxix aju otok cybincha. 13Ka at jun xinak ma cub tan tuc'il juntl xinak ic tza'nx in cub tan tuc'il jun xu'j, cycabil cbel cysentens tu'n cycyim, ex ax ke at cyil ti'j cycamic porque ic'bilxix aju otok cybincha. 14Ka at jun xinak ma jaw xu'jlante jun xu'j ex tuc'ix ttxu' xu'j ma jaw t-xu'jla'n, tu'n jlu in cybincha'n jun mya ba'n ic'bilxix; cyja'tzun cyoxil che bel patit tu'ntzun mi'n tten mya ba'n ic'bilxix cyxole. 15Ka at jun xinak ma cub tan tuc'il jun alumaj, cbel t-sentens tu'n tcyim. Ax icx alumaj bi'x cbel byet. 16Ka at jun xu'j ma txi tk'on tib te jun alumaj, cycabil che bel byet; tza'nx te xu'j ax icx te alumaj. Ax ke at cyil ti'j cycamic. 17Ka at jun xinak ma jaw t-xu'jla'n tanb, ka o'cx cyman junx ex ka o'cx cytxu', ex ka ma cub cymojban cyib, cycabil che bel byet cywitz ke cyxjalil, porque aju tu'n tjaw tmojban tib jun tuc'ilx tanb, jun ch'ixbil jlu, ex alcye ma tbincha icju ax te at til ti'j tcamic. 18Ka at jun xinak ma cub tan tuc'il jun xu'j otok tzul ẍwo'j ti'j, cycabil che elex lajet tu'ntzun mi'n cytentl cyxol cyxjalil, porque minti' otok txi cyniman aju in tma'n ley tu'n mi'n tcub tan xinak tuc'il xu'j oc nnu'l ẍwo'j ti'j. 19Mi'n cub tana tuc'il jun xu'j terman ttxu'ya mi tuc'il tanb tmana, porque at t-xilena cyuc'il ex cycabile at cyile ti'j jlu. 20Ka at jun ma cub tan tuc'il t-xu'jil terman tman, tu'n jlu in cub tk'o'n tch'ixwi terman tman; cycabil at cyil ti'j jlu ex octzun cycyim, minti'x cyc'wa'l otok tzaj. 21Ka at jun ma jaw t-xu'jla'n t-xu'jil terman, tu'n jlu in cub tk'o'n tch'ixwi terman. Ic'bilxix binchben lu, ex minti'x cyc'wa'l ctzajel. 22Cynimanxe ke nleye ex ke nmandamyente; japunx tcyakil cyu'ne tu'ntzun mi'n cyetz nlajo'ne tuj tx'otx' jatum che pol wi'ne tu'n cynajane tuj. 23Mi'n che oc lpe'ye ti'j cycostumr xjal che elex nlajo'ne cywitze; porque o cybincha cycyakil ke jlu, ex tu'ntzunju o che el wic'une. 24O txi ntziyane cyeye tu'n cyoque tajwil cytx'otx'; ax kine chin xel k'onte tx'otx' lu cyeye te cyetzbile, aju tx'otx' lu k'inun tx'otx'xix ex tbanilxix. Akine Cymane ex Cydiose ma chin el pa'nte cyeye cyi'j mastl nasyon. 25Cyja'tzun, ax icx cyeye ba'n tu'n tel cynic'e cyi'j ke jil sak ex cyi'j ke jil tz'il, ex cyi'j ke chyu'j sak ex ke chyu'j tz'il. Mi'n baj cytz'ilsan cyibe cyu'n ke jil, ke chyu'j ex keju in xi cyjaku'n cyc'u'j twitz tx'otx', akeju ma che oc nk'o'ne te tz'il. 26Che ocxe xjan nwitze, porque akine Cymane xjan kine, ex ma che el npa'ne cyi'j ke mastl nasyon tu'ntzun cyoque te weye. 27Ka at jun xinak ex ka jun xu'j ba'n txocon ti'j cyanmi cyimni, ex ka ba'n k'ijin, il ti'j tu'n tcyim. C'oquel cyxo'ne tu'n abj ex ax te at til ti'j tcamic.

will be added

X\