1 Ka at jun ma tzaj k'inte jun oyaj te Kman ti'j twitz awal, ba'n tu'n ttzaj ti'n aju arin mas tbanilxix, ex cbel tko'n aseyt tibaj tuc'ix storac; 2 ex cxel ti'n cyuc'il ke pal akeju tcy'ajal Aarón, ex atzun jun cye cxel ti'n jun yub arin tuc'ix aseyt, junx tuc'il tcyakil storac, ex cbel tpatun tibaj altar te jun oyaj cucx tu'n ttzaj na't xjal ti'j; jun oyaj patun in cub at tc'oc'jal in chin tzalaje ti'j. 3 Ex atzunju csobryil ti'j oyaj, c'ajbel te Aarón ex ke tiyjil. Aju oyaj lu xjansamajxix junx cyuc'il ke oyaj patun in che cub te nimbil weye. 4 Ka ma txi cyk'o'ne jun oyaj ti'j twitz awal tzk'ajsamaj tuj jorni, cybinchame ke pan ti'j tbanil arin xyok'amaj tuc'il aseyt, pero mi'n txi cyk'o'ne t-samel tuj tu'n tjaw mal tc'u'j, ex ka aju pan xaxj minti' t-samel tuj tu'n tjaw mal tc'u'j ex su'n aseyt cyi'j. 5 Ka ma txi cyk'o'ne cyoyaje twitz awal tzk'ajsamaj tuj sartén, cyk'onxe aju arin mas tbanil, xyok'amaj tuc'il aseyt ex minti' t-samel tuj tu'n tjaw mal tc'u'j; 6 cbel cypiẍune ex cbel cyk'o'ne aseyt tibaj, jun oyaj jlu ti'j twitz awal. 7 Ka ma txi cyk'o'ne cyoyaje twitz awal tzk'ajsamaj tuj xc'o'n, cyk'onxe aju arin mas tbanil tuc'ix aseyt tu'n t-xi' tuj. 8 Octzun tbant tten cyoyaje ctzajel cyk'o'ne weye cyi'j ke ti'xti lu, ba'n tu'n t-xi cyk'o'ne te pal, atzunte pal cxel k'inte te max twitz altar. 9 C'eleltzun ti'n pal ch'in ti'j oyaj lu tu'n tcub tpatun tibaj altar te jun oyaj cucx tu'n ttzaj na't xjal ti'j, patun in cub, at tc'oc'jal in chin tzalaje ti'j. 10 Ex atzunju csobryil ti'j oyaj c'ajbel te Aarón ex cye tiyjil. Aju oyaj lu xjansamaj cyxol ke oyaj in che cub patit te nimbil weye. 11 Mi'n txi cyk'o'ne t-samel tu'n tjaw mal tc'u'j tuj oyaj aju ctzajel cyk'o'ne weye ti'j twitz awal, porque mi jun wik t-samel ex mi ta'l cab cbel cypatune te jun oyaj weye. 12 Ba'n tu'n ttzaj cyk'o'ne weye aju oyaj at t-samel tuj tu'n tjaw mal tc'u'j ex ka ta'l cab, ic tza'n ke oyaj ti'j tnejel twitz awal, pero mlay cub patit tibaj altar ic tza'n oyaj at tc'oc'jal. 13 Ba'n tu'n toc cyk'o'ne atz'an cyi'j cycyakil cyoyaje twitz awal, ex mi'n tzic' tna'l cyu'ne tu'n toc atz'an ti'j cyoyaje; porque aju atz'an in ajben tu'n ttzaj na't aju yol o cyaj bant ti'j wu'ne cyuc'ile. Cyi'j cycyakil cyoyaje ba'n tu'n toc cyk'o'ne atz'an. 14 Ka ma tzaj cyk'o'ne cyoyaje weye ti'j tnejel twitz cyawale, ba'n tu'n ttzaj cyk'o'ne jun che'l tx'i'limaj tuj k'ak', ex pa'mx twi'. 15 Cbel cyk'o'ne aseyt tuc'ix storac tibaj, tu'nju oyaj ti'j twitz awal jlu. 16 Cbeltzun tpatun pal ch'in twitz awal otok baj pa'mx twi', tuc'ix ch'in aseyt ex tcyakil storac, te jun oyaj cucx tu'n ttzaj na't xjal ti'j, patun in cub te nimbil weye.
