LEVÍTICO 18

1Tzaj yolin Kman tuc'il Moisés ex tma: 2K'manxa cye aj Israel cyja': Akine Cymane ex Cydiose. 3Mi'n che'x lpe'ye cyi'j cycostumr aj Ejipt, tuj tx'otx' jatum e najane nej. Mi'n che oc lpe'ye cyi'j cycostumr aj Canaán, tuj tx'otx' jatum che pol wi'ne, ex mi'n cybinchaye ic tza'nx cye cyley. 4Japunx ke nmandamyente ex ke nleye cyu'ne ex che ank'ine ic tza'nx in cyma'n. Akine Cymane ex Cydiose. 5Cybinchame tcyakilju in cyma'n ke nleye ex ke nmandamyente. Aju xjal cjapunel tu'n, c'ank'il. Akine Cymane. 6Mi jun xinak ba'n tu'n tcub tan tuc'il jun xu'j at t-xilen tuc'il. Akine Cymane. 7Mi'n cub tk'o'na tch'ixwi tmana tu'n tcub tana tuc'il ttxu'ya. Mya ba'n tu'n tbinchanteya icju, porque ttxu'ya jlu. 8Mi'n cub tk'o'na tch'ixwi tmana tu'n tcub tana tuc'il juntl t-xu'jil tmana. 9Mi'n cub tana tuc'il tanba. Ka jun tanba o'cx tmana junx tuc'il ex ka nok o'cx ttxu'ya junx tuc'il, ka ax otok tzul itz'j tuj ja ex ka ti'jxi, pero mi'n cub tana tuc'il. 10Mi'n cub tk'o'na tch'ixwiya tu'nx tiba tu'n tcub tana tuc'il jun tchmana xu'j, ka tme'jel jun tcy'ajala ex ka tal jun tme'jela. Pero mi'n cub tana tuc'il. 11Mi'n cub tana tuc'il jun tal juntl t-xu'jil tmana, porque a tmana otok tzaj c'wa'linte te, ex tanba jlu. Mi'n cub tana tuc'il. 12Mi'n cub tana tuc'il tanb tmana; porque terman tmana jlu. 13Mi'n cub tana tuc'il jun xu'j terman ttxu'ya; porque terman ttxu'ya jlu. 14Mi'n cub tk'o'na tch'ixwi terman tmana tu'n tcub tana tuc'il t-xu'jil, porque t-xu'jil terman tmana jlu. 15Mi'n cub tana tuc'il tliba, porque t-xu'jil tcy'ajala jlu; cyja'tzun mi'n cub tana tuc'il. 16Mi'n cub tk'o'na tch'ixwi termaniya tu'n tcub tana tuc'il t-xu'jil. 17Mi'n cub tana tuc'il jun xu'j ex tuc'il jun tal ax xu'j, ex mi'n cub tana tuc'il jun tal tchman xu'j lu, ka tme'jel jun tal ex ka tal jun tal xu'j lu. Aju binchben lu jumajx mya ba'n, porque cypamili cyib ke jlu. 18Mi'n jaw t-xu'jla'na jun terman t-xu'jila, ex mi'n cub tana tuc'il acux itz'x t-xu'jila, tu'ntzun mi'n tcub ten k'oj cyxol. 19Mi'n cub tana tuc'il jun xu'j oc tul ẍwo'j ti'j. 20Mi'n cub tana tuc'il t-xu'jil jun tuc'ila, tu'ntzun mi'n ttz'ilixa tu'n jlu. 21Mi'n txi tk'o'na jun tc'wa'la tu'n tcub patit te jun oyaj te Moloc aju tilbilal nno'c cydiosin xjal. Mi'n tbinchaya jlu tu'ntzun mi'n cyyolin xjal mya ba'n ti'j Nbiye. Akine Cymane. 22Mi'n cub tana tuc'il jun xinak ic tza'n in cub tana tuc'il xu'j, porque ic'bilxix jlu. 23Mi'n cub tana tuc'il jun alumaj, tu'ntzun mi'n ttz'ilixa. Ax icx mya ba'n tu'n t-xi tk'on tib jun xu'j te jun alumaj, porque ic'bilxix jlu. 24Mi'n baj cytz'ilsan cyibe cyu'n ke jlu, porque cyu'ntzun ke jlu ma baj cytz'ilsan cyib ke xjal, akeju che elex nlajo'ne cywitze, 25ex tuc'ix cytx'otx' ma tz'ilix; cyja'tzun ma cub cycastiw wu'ne ti'j cybinchben mya ba'n ex ma che ex nlajo'ne tuj cytx'otx'. 26Atzun cyeye, akeye aj Israel ex ke stranjer xjal najl cyxole, japunx ke nleye ex ke nmandamyente cyu'ne, ex mi'n cybinchaye ke binchben lu, akeju ic'bilxix, 27porque tcyakil aju mya ba'n lu o cybincha' ke xjal najlketok tuj tx'otx' nej, ex aju tx'otx' bi'x o tz'ilix cyu'n. 28Mi'n cybinchaye ke jlu tu'ntzun mi'n cyex nlajo'ne tuj tx'otx' lu, ic tza'nx ma che ex nlajo'ne ke xjal najlketok tuj nej. 29Alcye jun xjal ma tbincha nok alcyexcu jun cyxol keju mya ba'n lu, akeju ic'bilxix, bi'x c'elex lajet tu'ntzun mi'n ttentl cyxol t-xjalil. 30Cyja'tzun, japunx ke nmandamyente cyu'ne ex mi'n cybinchaye mya ba'n lu, akeju ic'bilxix in cybincha'n xjal tuj tx'otx' jatum che pole, ex mi'n baj cytz'ilsan cyibe cyu'n ke jlu. Akine Cymane ex Cydiose.

will be added

X\