LEVÍTICO 17

1Tzaj yolin Kman tuc'il Moisés ex tma: 2K'manxa te Aarón ex cye tcy'ajal ex cye cycyakil aj Israel cyja': Atzun orden lu ma tzaj tma'n Kman, chicuya: 3Nok alcye jun aj Israel ma cub byonte jun tor, ex ka jun tal tman ẍne'l, ex ka jun chip tuj campament ex ka ti'jxi, 4ex ka minti' ma tzul ti'n alumaj ttzi ja xbalun te mojbabl tibil tu'n ttzaj tk'o'n te jun oyaj weye twitz njaye, at til ti'j chic' otok tz'el tu'n, ex bi'x c'elex lajet tu'ntzun mi'n ttentl cyxol t-xjalil. 5Aju til ley lu, tu'n mi'n tcub cybyo'n aj Israel alumaj tuj cojbil, nok o'cx ctzajel cyk'o'n te jun chojbil weye, ex tu'n t-xi cyi'n tuc'il pal ttzi ja xbalun te mojbabl tibil, tu'ntzun ttzaj tk'o'n weye te jun chojbil te mojbabl tibil. 6Atzunte pal cxel ttx'ito'n chic' tibaj altar tcub nwitze, ttzi ja xbalun te mojbabl tibil, ex cbel tpatun t-sebyil alumaj te jun oyaj at tc'oc'jal in chin tzalaje ti'j. 7Ex mi'ntl txi cyk'o'n ke chojbil cye ju'ẍ, aju o che c'ulun cywitz ex o che el tzpet cyu'n. Atzun ley lu cyjel ten cyuc'ile te jumajx tu'n tajben cyeye ex wikinwik cyjel cyma'ne cye cyc'wa'le. 8Ax icx k'manxa cye cyja': Ka at jun aj Israel ex ka jun stranjer xjal najl cyxole ma txi tk'o'n jun oyaj patun in cub ex ka nok alcyexcu juntl chojbil, 9ex ka mi'n ma pon ti'n ttzi ja xbalun te mojbabl tibil tu'n ttzaj tk'o'n weye, bi'x c'elex lajet tu'ntzun mi'n ttentl cyxol t-xjalil. 10Ka at jun aj Israel ex ka jun stranjer xjal najl cyxole ma txi cychyo'n tchc'el nok alcyexcu jun alumaj, ctzajel nk'oje ti'j; cbel tcastiw wu'ne, ex bi'x c'elex lajet tu'ntzun mi'n ttentl cyxol t-xjalil, 11porque atzun ta' cychwinklal cycyakil alumaj tuj cychc'el, ex o txi nk'o'ne jlu cyeye tu'n tcub tx'itet tibaj altar tu'n tchjet cyile, tu'ntzun tclet cychwinklale; porque aju chic' in chjet til xjal tu'n. 12Cyja'tzun in xi nma'ne cye aj Israel: Mi jun cyeye ex mi jun stranjer xjal najl cyxole ba'n t-xi tchyo'n chic'. 13Nok alcyexcu jun aj Israel ex ka jun stranjer xjal najl cyxole ma cub tbyo'n jun jil ex ka jun chyu'j ba'n cychyo'njtz, il ti'j tu'n tel cyko'n tchc'el ex tu'n tic'x cymaku'n tibaj tu'n tx'otx', 14porque aju chic', atzunju in k'onte cychwinklal cycyakil keju itz'ke. Cyja'tzun ma txi nma'ne cyeye tu'n mi'n t-xi cychyo'ne chic', porque atzunju in k'onte cychwinklal cycyakil keju itz'ke, ex nok alcye jun ma txi chyo'nte, bi'x c'elex lajet tu'ntzun mi'n ttentl cyxol t-xjalil. 15Nok alcye jun aj Israel ex ka jun stranjer xjal ma txi chyonte tchibjal jun jil tajx otok cyim, ex ka tu'n jun txcup te tjak' c'ul otok baj tzakin, c'oquel cyk'o'ne te tz'il, ex il ti'j tu'n tjatz ttx'jo'n ti'j t-xbalun ex tu'n tchin, ex max c'oquel te sak ocxi ttzaj klolj. 16Katzun mi ma jatz ttx'jo'n ti'j t-xbalun ex ka mi ma chin, axte cxel ikante til.

will be added

X\