LEVÍTICO 11

1Tzaj yolin Kman tuc'il Moisés ex tuc'il Aarón, chi cyja': 2Cymanxe cye aj Israel alcye ke jil ba'n tu'n t-xi cychyo'n cyxol cycyakil ke jil ate' twitz tx'otx': 3Ba'n tu'n t-xi cychyo'n akeju ba'n che coc'san cywa ex pa'n tten t-xol t-xpac'il cykan; 4pero cyxol keju ba'n che coc'san cywa ex ka pa'n tten cyxol tpas cykan, mi'n txi cychyo'n ke jlu: Aju chej camey, masque ba'n coc'san twa, pero mya pa'n tten cyxol tpas tkan. Ba'n tu'n toc cyk'o'ne te tz'il. 5Icx jil cwatusa, masque ba'n coc'san twa, pero minti' t-xpac'il tkan pa'n tten. Ba'n tu'n toc cyk'o'ne te tz'il. 6Icx ẍic, masque ba'n coc'san twa, pero minti' t-xpac'il tkan pa'n tten. Ba'n tu'n toc cyk'o'ne te tz'il. 7Icx boch, masque at t-xpac'il tkan pa'n tten cyxol, pero miban coc'san twa. Ba'n tu'n toc cyk'o'ne te tz'il. 8Mi'n txi cychyo'ne cychibjal ke jil lu, ex mi'n tz'oc cymaco'ne cyximlal ka otok che cycyim. Ba'n tu'n toc cyk'o'ne te tz'il ke jil lu. 9Cyxol ke jil najl tuj a', ka tuj mar ex ka tuj nima, o'cx ba'n tu'n t-xi cychyo'ne akeju at cyk'ab ex at tpwakil cyi'j. 10Atzun keju minti' cyk'ab ex minti' tpwakil cyi'j, ba'n tu'n tel cyic'une, masque ate' tuj mar ex ka tuj nima, tza'nx ke coc' ax icx ke nmak. 11Mi'n txi cychyo'ne cychibjal; ba'n tu'n tel cyic'une ke jil lu, ax icx ba'n tu'n tel cyic'une cyximlal oc cycyim. 12Cycyakil txcup ate' tuj a', ka minti' cyk'ab ex minti' tpwakil cyi'j, ba'n tu'n tel cyic'une. 13Cyxol ke jil in che lipan twitz cya'j, akeju mya ba'n tu'n t-xi cychyo'ne ex ba'n tu'n tel cyic'une, atzun ke jlu: ke t'iw, ke quebrantawesos, ke c'utz, 14ke milano, tcyakil txcaj halcones, 15tcyakil txcaj joj, 16ke avestrús, ke xitx', ke gaviota, tcyakil txcaj k'anjan, 17ke tol, ke cormorán, ke ibis, 18ke cisne, ke pelícano, ke azor, 19ke cigüeña, tcyakil txcaj garza, ke tal chyu'j abubilla ex ke sotz'. 20Ex tcyakil tal jil ba'n che lipan ex ba'n che bet tu'n cyaje cykan, ba'n tu'n tel cyic'une, 21pero ba'n tu'n t-xi cychyo'ne junjun cyxol ke tal jil ba'n che lipan ex ba'n che bet tu'n cyaje cykan, pero ka at cycux ex ka at cykan tu'n tbant cyt'icpaj twitz tx'otx'. 22Ex atzun ke jlu ba'n tu'n t-xi cychyo'ne: Tcyakil txcaj ẍplon, ke coc' ex ke nmak, ke ch'i'l, cyuc'ix ke xtxil. 23Pero tcyakil mastl tal jil ba'n che lipan ex ba'n che bet tu'n cyaje cykan, ba'n tu'n tel cyic'une. 24Ax icx jacu che tz'ilixe cyu'n ke jlu: Nok alcye jun ma tz'oc maconte t-ximlal jun tal jil cyimni, bi'x ctz'ilixtel ex c'oquel juntl maj te sak ocxi ttzaj klolj. 25Nok alcye jun ma jaw k'inte t-ximlal jun tal jil cyimni, ctz'ilixtel; ba'n tu'n tbaj ttx'jo'n ti'j t-xbalun ex c'oquel juntl maj te sak ocxi ttzaj klolj. 26Cycyakil ke jil at tpas cykan, pero ka mya pa'n tten cyxol tpas cykan ex ka miban che coc'san cywa, ba'n tu'n toc cyk'o'ne te tz'il, ex ka at jun ma tz'oc maconte cyximlal oc cycyim, bi'x c'oquel te tz'il. 27Cycyakil jil at cyaje cykan ex in che bet tibaj tlakil cykan, ba'n tu'n toc cyk'o'ne te tz'il, ex nok alcye jun ma tz'oc maconte t-ximlal jun jil lu cyimni, bi'x ctz'ilixtel tu'n; ex c'oquel te sak juntl maj ocxi ttzaj klolj. 28Ax icx ka at jun ma jaw k'inte t-ximlal jun jil lu, ctel tuj ttz'ilil; ba'n tu'n tjatz ttx'jo'n ti'j t-xbalun ex c'oquel juntl maj te sak ocxi ttzaj klolj. Ba'n tu'n toc cyk'o'ne ke jil lu te tz'il. 29Ex cyxol ke jil in xi cyjaku'n cyc'u'j twitz tx'otx', ba'n tu'n toc cyk'o'ne te tz'il ke jlu: Ke sakbin, ke ich', tcyakil txcaj ẍal, 30ke xmatx ex tcyakil txcaj ẍula, ke lagarto, ke cocodrilo ex ke camaleón. 31C'oquel cyk'o'ne ke jil lu te tz'il; nok alcye jun ma tz'oc maconte cyximlal cyimni ke, bi'x ctz'ilixtel cyu'n ex max c'oquel te sak juntl maj ocxi ttzaj klolj. 32Ax icx ka ma cub tz'ak t-ximlal jun jil lu cyimni tibaj jun tze' at tajben, jun xbalun, jun tz'u'm, jun sac, ex ka nok alcyex jun macbil in ajben tuj ak'untl, bi'x ctz'ilixtel tu'n. Cbelex k'ot tuj a', porque otok tz'ilix, ex max c'oquel te sak juntl maj ocxi ttzaj klolj. 33Ka ma txi tz'ak t-ximlal jun jil lu cyimni tuj jun c'il tx'otx' ttx'otx'il, bi'x ctz'ilixtel tuc'ix tcyakilju at tuj, ex aju c'il lu, bi'x cbel pa't. 34Ka ma cu'x tz'ak jun jil tuj a' ex ka ma tz'ajben ch'in a' lu ti'j chibj ex ka ti'j c'abj, bi'x ctz'ilixtel chibj ex ka c'abj tu'n. 35Ka ma cub tz'ak t-ximlal jun jil lu cyimni tibaj nok alcyex jun ti'xti, bi'x ctz'ilixtel; ka tibaj jun jorni ex ka tibaj jun tcubil k'ak', il ti'j tu'n tcub xitit porque otok tz'ilix. 36Katzun ma txi tz'ak t-ximlal jun jil lu cyimni tuj jun twi a', ex ka jatum in chmet a', ate a' mlay tz'ilix, atzunte xjal cjawitz k'inte t-ximlal jil tuj a', bi'x ctz'ilixtel. 37Ka ma cub tz'ak t-ximlal jun jil lu cyimni tibaj iyaj tu'n tcu'x awat, ate iyaj cucx ctel sak; 38pero katzun otok ac'set iyaj oc tcub tz'ak t-ximlal jil lu cyimni tibaj, entons ctz'ilixtel iyaj tu'n. 39Ka ma cyim jun jil ba'n tchyo'njtz ex ka at jun xjal ma tz'oc maconte t-ximlal, bi'x ctz'ilixtel tu'n, max c'oquel te sak juntl maj ocxi ttzaj klolj. 40Ka at jun xjal ma txi chyo'nte tchibjal jil otok cyim, ctz'ilixtel tu'n; cjawitz ttx'jo'n ti'j t-xbalun ex c'oquel te sak juntl maj ocxi ttzaj klolj. Ex alcye jun ma jaw k'inte t-ximlal jil cyimni, ax icx ctz'ilixtel tu'n, cjawitz ttx'jo'n ti'j t-xbalun ex max c'oquel juntl maj te sak ocxi ttzaj klolj. 41Mi'n txi cychyo'ne ke jil jaku'n in xi' cyc'u'j twitz tx'otx', ic'bil ke jlu. 42Mi'n txi cychyo'ne cycyakil txcaj jil jaku'n in xi' cyc'u'j twitz tx'otx' ex ka in che bet tu'n cyaje cykan ex ka mas, porque ic'bil ke jlu. 43Mi'n tz'oc cyk'on cyibe te ic'bil ex te tz'il cyu'n ke jil jaku'n in xi' cyc'u'j twitz tx'otx', ex mi'n txi cyk'o'ne ambil tu'n cyoque te tz'il cyu'n. 44Akine Cymane ex Cydiose, cyja'tzun il ti'j tu'n cyoque sak ex xjan, porque xjan kine. Mi'n baj cytz'ilsan cyibe cyu'n ke jil jaku'n in xi' cyc'u'j twitz tx'otx'. 45Akine Cymane etz k'inte cyeye tuj Ejipt tu'ntzun woque te Cydiose. Cyja'tzun ba'n tu'n cyoque te xjan, porque xjan kine, chi Dios. 46Atzun ke ley lu cyi'j ke jil, ke chyu'j in che lipan twitz cya'j, cycyakil jil in che yucch tuj a', ex cycyakil jil jaku'n in xi' cyc'u'j twitz tx'otx', 47tu'ntzun tel cynic'e ti'j alcye sak ex alcye tz'il, ex tu'n tel cynic'e cyi'j alcye ke jil ba'n cychyo'njtz ex alcye ke miban cychyo'njtz.

will be added

X\