1 Nman, na'ntza aju ma baj ki'je, que'yintza aju nim mya ba'n ma tzaj ki'je, ma cub kch'ixwiye tu'n. 2 Aju ketzbile atzun ta' ja'lo tuj cyk'ab stranjer xjal; ke kjaye ma tz'el cyetzan ke xjal minti' ojtzki'n cywitz ku'ne. 3 Ma ko cyaje meba, o che cyim kmane; atzun ktxu'ye ma che cyaj ten meba xu'j. 4 Aju a' etzantok ku'ne nej, atzun ja'lo lok'aj nne'l ku'ne; aju si' etzantok ku'ne nej, atzun ja'lo in xi kchjo'ne twi'. 5 Cucx in ko yajlanjtze cyu'n, in ko sicte ex minti' in tzaj cyk'o'n ch'in ambil tu'n kojlane. 6 Ocx kk'on kibe tjak' cycawbil aj Ejipt ex tjak' cycawbil aj Asiria tu'n ttzaj cyk'o'n kwaye. 7 Ke kxe'chele o che binchan il ex o che cyim, ex ako'ye ma cub kcastiwoye tu'n cylaj. 8 In che cawin ke majen ki'je, ex mi a'l jun ba'n tclonte keye tuj cyk'ab. 9 Xi koyin kchwinklale tu'n tcnet kwaye, tu'nju atzun ate' ke elek' tuj lugar minti' cynajbil xjal tuj. 10 In julin ktz'umale tu'n cyak ic tza'n tuj jun jorni, tu'n tlaj cyak in tzaj ki'je tu'n we'yaj. 11 Ma che cub ipan ke xu'j najl tuj tnam Sión, ax icx ke k'apoj najl cyuj ke tnam tuj Judá. 12 Ke nejenel kxole ma che jaw yobin ti'j cyk'ab, ke tij xjal minti' in che'x niman. 13 Ke cu'xun ma che oc k'o'n te che'l triw; atzun ke tal k'a ma che cub tz'ak tjak' talil si'. 14 Minti'tl in che cub ke' ke tij xjal ttzi tpwertil tnam; minti'tl in binjtz cybitz ke cu'xun. 15 Minti'tl tzalajbil tuj kanmiye; aju kbixbile te tzalajbil ma tz'oc te bis. 16 Ma tz'el k'i'n koclene; bec'bil kwitze, ma ko binchane il. 17 Tu'n tlaj jlu at bis tuj kanmiye; ex cyja'tzun ma tz'oc muj ti'j tbak' kwitze. 18 Aju tnam Sión ma cub xitj ex mi a'l xjal at tuj; o'cx ke wech in che bet tuj. 19 Atzun teya Nman, cucx ctembila te jumajx; cucx ccawila tuj tcyakil tabk'iyil te jumajx. 20 ¿Tiku'n ma tzic' kna'njtze tu'na te jumajx? ¿Tiku'n ma ko cyaj tcolina nimcu k'ij? 21 Nman, ko ti'n aja tuc'ila, ex jacutzun ko aj meltz'aje. K'ontza tzalajbil keye ic tza'n o ko tzalaje nej. 22 Atzun teya ma ko el tic'una te jumajx; nimxix tk'oja ma tzaj ki'je.
