JUECES 8

1Atzun cye tiyjil Efraín tzaj cyk'oj ex tzaj cyyol ti'j Gedeón tu'nju minti' otok che tzaj ttxco'n tej t-xi' k'ojlel cyi'j aj Madián. 2Atzunte Gedeón xi ttzak'we'n: —Cyeye mas nim ma bant cyu'ne ic tza'n weye ma bant wu'n. Aju ch'in ma bant cyu'ne, akeye tiyjil Efraín, mas nim t-xilen twitz tcyakilju ma bant ku'ne. 3Ate Dios ma tzaj k'onte Oreb tuj cyk'abe, tuc'ix Zeeb, akeju nejenel cye aj Madián. Aju cyeye ma bant cyu'n, mas ma' t-xilen twitzju weye ma bant wu'n. Tejtzun cybinte ke tiyjil Efraín aju tyol Gedeón, o chewix cyc'u'j ti'j. 4Pontzun Gedeón ttzi nima Jordán cyuc'ix ox syent xinak tuc'il, ex e ic'x tuj nima masque otok che sict wen, pero cucx e je'x lpe' cyi'j aj k'oj tu'n tcub cyi'j cyu'n. 5Xitzun tma'n Gedeón cye xjal najl tuj tnam Sucot: —Cybinchame xtalbil, cyk'onxe ch'in cywa ke xjal uc'in wu'ne, porque nimxix ma che sict. Lepchko'que ti'j Zeba ex Zalmuna, akeju rey cye aj Madián tu'n cytzyet ku'ne. 6Atzun cye nejenel cye xjal tuj tnam Sucot xi cytzak'we'n: —¿Tza'n tten tu'n t-xi kk'o'ne cywa ke t-soldadiya? Baka ma che tzyet Zeba tuc'ix Zalmuna cyu'ne. 7Atzunte Gedeón xi ttzak'we'n: —Oc ttzaj k'o'n Zeba tuj nk'abe tu'n Kman, tuc'ix Zalmuna, chin ul meltz'aje cyuc'ile ex cbajel nluẍin cychibjale tu'n ch'i'x ex tu'n xoc ch'i'x in ch'iy tuj tzkij tx'otx'. 8Ic'tzun ex xi' tuj Peniel, ex xi tkanin wabj ic tza'n otok txi tkanin tuj Sucot. Atzun cye xjal tuj Peniel ax yol tzaj cyma'n ic tza'n otok cyma ke xjal tuj Sucot. 9Xitzun tma'n Gedeón cye: —Oc wul meltz'aje tcublenxi cyi'j ke rey wu'ne, cbel nxitune aju nintz ja ma' twa'l lu. 10Atzunte Zeba tuc'ix Zalmuna otok che canun tuj lugar Carcor tbi, cyuc'ix ke cysoldad; balo olaj mil cybet. O'cxtzun jlu e cyaj clet cyxol txkan soldad otok che tzaj tuj tjawitz k'ij, porque otok che baj cyim jun syent tuc' winkin mil. 11Aju tbe Gedeón xi ti'n tu'n toc tzokpaj cyi'j aj Madián tuj cycampament, atzunju nno'cx ttzi'yile lugar tzkij tx'otx', cytxlaj tnam Noba ex Jogbeha tuj tjawitz k'ij. Minti'tok ba'n cyu'n aj Madián ka cyja'tok cyoc tzokpaj ke cyajk'oj cyi'j. 12E je'l ok Zeba tuc'ix Zalmuna akeju cabe rey cye aj Madián, pero oc lpe' Gedeón cyi'j ex e tzyet tu'n, ex cycyakil soldad tzaj nim cyxobil ex e bje'l ok. 13Tejtzun tajtz Gedeón tuj k'oj, ic' t-xol witz tuj lugar Heres tbi, 14atzun tzyet jun cu'xun aj Sucot tu'n ex oc ten xjelil te. Tzajtzun ttz'iban cu'xun cybi 77 xjal nejenel ex ka tij xjal tuj Sucot. 15Xi'tzun Gedeón tuj Sucot ex xi tma'n cye xjal tuj tnam lu: —¿Na'npe cyu'ne tza'n tten e oc tene xmayil wi'je tu'n tlaj Zeba ex Zalmuna? ¿Ex na'npe cyu'ne tej minti' tzaj cyk'o'ne cywa ke xinak uc'in wu'ne otok che sict wen, ex o cymaye keye: Mlay txi kk'o'ne cywaye, porque baka ma che tzyet Zeba ex Zalmuna cyu'ne? Che chiye. Atzun ja'lo lu ke lu. 16Tzajtzun ti'n Gedeón ch'i'x tuc'ix xoc ch'i'x tuj tzkij tx'otx', ex atzun jlu ajben tu'n te c'ixbisabl cye ke cytijil xjal tuj tnam Sucot. 17Ax icx cub t-xitun aju ja ma' twa'l tuj tnam Peniel, ex e cub tbyo'n ke xinak tuj tnam lu. 18Xitzun tkanin Gedeón te Zeba ex te Zalmuna: —¿Tza'n che que'yin ke xjal e cub cybyo'ne twi witz Tabor? Atzun cye tzaj cytzak'we'n: —Ic che que'yin ic tza'n aya. Teyle junjun cye ic che que'yin ic tza'n tcy'ajal jun rey. 19Xitzun tma'n Gedeón cyja': —Atzun ke wermaniye, tal ntxu'ye ke. Cxel nma'ne cyeye jun yol axix toc twitz Kman, nokwit minti' e cub cybyo'ne ke wermaniye, icxwitlo weye mlaywitlo che cub nbyo'ne. 20Xi tma'n Gedeón te Jeter aju nej tcy'ajal: —We'ctza ex byoncuya ke jlu. Pero ate Jeter ne'xtok ta', tu'ntzunju tzaj tchi ti'j ex minti' jatz ti'n t-spad. 21Atzun te Zeba ex Zalmuna xi cyma'n te Gedeón: —Axa ba'n tu'n tcub byonte keye. Aju xinak nne'l nic'baj ti'j tu'n tipumal. Jawtzun we' Gedeón ex e cub tbyo'n, ex el ti'n ke uwj tbanilxix cotl tcub cykul ke chej camey te Zeba ex te Zalmuna. 22Atzun cye aj Israel xi cyma'n te Gedeón: —Yaque ma ko colpete tu'na tjak' cycawbil aj Madián, ja'lo kajbile aya tu'n toca te cawil kibaje, ax icx ke tiyjila che ul itz'j te tibajxi tu'n cyoc te cawil kibaje. 23Atzunte Gedeón xi ttzak'we'n: —Mya we kin ex mya we nc'wa'l ccawil cyibaje. Ate Kman ccawil cyibaje. 24Nok o'cx waje txi nkanine jun ti'xti cyeye: Teyle junjun tu'n ttzaj tk'o'n jun tuj ẍcyinbaj weye, cyxol keju ma tz'el cyi'ne cyi'j ke xjal tuj k'oj, chi Gedeón. Akeju tuj ẍcyinbaj lu k'an pwak cytx'otx'il ex in che ajbentok cye aj Madián, porque aj Ismael ke. 25Cubtzun cylic'un aj Israel jun xbalun twitz tx'otx', ex teyle junjun cub tk'o'n jun tuj ẍcyinbaj twitz xbalun, ex xi cyma'n te Gedeón: —Tu'n tcyakil kc'u'je cxel kk'o'ne tuj ẍcyinbaj teya, ex lu ke lu. 26Aju talil cycyakil tuj ẍcyinbaj k'an pwak ttx'otx'il, balo jun arrob tuc' wuklaj libr o bant, ex minti' e oc ke uwj te tajlal, mi ke tal abj puro tbanil ex mi ke xbalun ẍjulin che que'yin k'i'n cyu'n ke rey cye aj Madián, ex mi cyu ke chej camey. 27Tu'nju k'an pwak lu baj noj ti'j jun capiẍay tu'n Gedeón ic tza'n ju capiẍay in ajben cyu'n pal ttzi cyxu'c, ex xi tc'u'n Gedeón tuj ttanmi aju Ofra tbi, ex cycyakil aj Israel e je'l tzpet tu'n tlaj capiẍay lu, porque e c'ulun twitz ex oc te jun tolsabl te Gedeón ex cye keju ate' tuj tja. 28Cyja'tzun tten e cyaj aj Madián tjak' cycawbil aj Israel ex minti' oc juntl maj cyipun. Tuj tk'ijlalil tej tten Gedeón, puro tuj tzalajbil e ten aj Israel 40 abk'i. 29Ate Jerobaal aju ax juntl tbi Gedeón, xi' najal tuj tja, 30ex tzaj 70 tc'wa'l tu'nju ela'tok t-xu'jil at. 31At jun tcab t-xu'jil Gedeón o ten tuj tnam Siquem, ax icx o tzaj jun tcy'ajal ti'j ex oc tk'o'n tbi Abimelec. 32Otok tijin Gedeón wen tej tcyim, ex ocx maku'n ttxlaj tpantyón Joás aju ktzan tman, tuj tnam Ofra aju cytanmi ke tiyjil Abiezer. 33Tejtzun tcyim Gedeón, el cypa'n cyib aj Israel juntl maj ti'j Dios, e oc ten c'ulul cywitz nimcu tilbilal Baal, ex jaw cysc'o'n tilbilal Baal-berit tu'n toc te cydios. 34Ic'tzun tna'l Kman Dios cyu'n, aju otok clonte cye tuj cyk'ab cycyakil aj k'oj e ten cyi'jele, 35ex minti' o cybincha ba'n cyi'j ke tc'wa'l Gedeón te t-xel ju ba'n otok tbincha Gedeón cye.

will be added

X\