JUECES 7

1Ate Gedeón aju otok tz'oc k'o'n tbi Jerobaal jaw we' primxix wen cyuc'ix cycyakil xjal ate' tuc'il, ex e je'xtzun tu'n cycub ten jatum ta' ju twi a' Harod. Atzun ke aj Madián otok che cub ten tumlal tbank'ab k'ij tuj chk'ajlaj t-xe witz More. 2Xitzun tma'n Kman te Gedeón: Nim xjal uc'in tu'na, ex ka ma che'x nk'o'ne ke aj Madián tuj cyk'ab tu'n tcub cyi'j cyu'n, jaculo bant tjaw cyniman cyib nwitze, ex jaculo cyma ka tu'n cyex cyipumal otok che clet. 3K'manxa cye xjal cyja': Alcye keju in che lu'lun tu'n cyxobil, ba'n tu'n cycu'tz twi witz Galaad ex tu'n cyaj cyja. E ajtzun 22 mil xjal cyja ex nok laj mil e cyaj ten. 4Pero tzaj tma'ntl Kman: Ax nim jlu. K'inxa ke tu'n cyc'an a', ex atzunwe kin chin oquel k'onte cye tuj malbil ma chixin, ex cxel nma'ne teya alcyeke che xe'l tuc'ila ex alcyeke mi'n che'x. 5E je'xtzun ti'n Gedeón ke xjal tu'n cyc'an a', ex tzaj tma'n Kman te cyja': Pa'n ela keju jato'n in jatz cyc'a a' tu'n cyk'ab ex lek'an che c'an ic tza'n tx'yan, ax icx pa'n ela keju in che cub ẍmeje' tu'n cyc'an a'. 6Ox syent bant cybet keju jato'n jatz cyc'a a' tu'n tocx tuj cytzi' ex lek'an che c'an. Atzun ke mastl e cub ẍmeje' tu'n cyc'an a'. 7Tzajtzun tma'ntl Kman te Gedeón: Cyu'n keju ox syent xinak lu, akeju lek'an che c'an a', che cletele wu'ne, ex che xel nk'o'ne ke aj Madián tuj cyk'abe tu'n tcub cyi'j cyu'ne. Atzun ke mastl ba'n tu'n cyaj cyja. 8Xitzun tma'n Gedeón cye mastl xjal tu'n cyaj cyja, pero na'nxtok cyaj tu'n tcyaj cyk'o'n cywa ex ke tcach ẍne'l cye cyuc'il. O'cx keju ox syent xinak otok che jaw t-sc'o'n e cyaj ten tuc'il, ex e cubtzun ten max cyibajxi ke aj Madián akeju otok che cub ten tuj chk'ajlaj. 9Tujtzun konic'an lu tzaj tma'n Kman te Gedeón: We'ctza ex tcu'xa tu'n toc tzokpaja cyi'j aj Madián, porque che xel nk'o'ne tuj tk'aba tu'n tcub cyi'j tu'na. 10Katzun at t-xobila tu'n toc tzokpaja cyi'j, ba'n tu'n tcu'x naja tuj cycampament aj Madián tuc'ix Fura aju tmajena, 11ex bina cyi'j ti in cyma'n, ex tu'ntzun jlu oc tna'ya c'oquel mastl tipuna tu'n toc tzokpaja cyi'j. Cu'xtzun Gedeón tuc'ix Fura aju tmajen max jatum cycub ke xk'ukil, ti'jele cycampament aj k'oj. 12Nojnitok tuj chk'ajlaj cyu'n aj Madián, aj Amalec ex ke xjal te tjawitz k'ij, mer ic tza'n txkan ẍplon nim cybaj. Attok nim cychej camey, mer ic tza'n ttxa tz'a'n ttzi mar. 13Tejtzun tpon lak'e' Gedeón nikayin ti'j lugar jatum cycub aj k'oj, o tbi lu jun soldad in k'ma'ntok ti'j jun twitzic' te juntl, ex chi cyja': —Ma tz'oc yec'un tuj nwitze lu jun pan sebad in tol toctz tuj kcampament, ex tej sul tz'ak ti'j xbalun ja, bi'x xcub tz'ak xbalun ja tu'n. 14Atzunte tuc'il tzaj ttzak'we'n: —A jlu mya tilo t-xilen; aju pan, atzun t-xilen t-spad Gedeón aju tcy'ajal Joás aju aj Israel. Ate Dios cxel k'onte cye aj Madián tuj tk'ab Gedeón, cyuc'ix cycyakil ke cyuc'il, tu'n tcub cyi'j tu'n. 15Tejtzun tbaj tbi'n Gedeón tza'n tten witzic xi k'ma'n ex tza'n tten pujbil ti'j, oc ten c'ulul te Kman. Te tibajxi jlu aj meltz'aj Gedeón tuj cycampament aj Israel ex xi tma'n cye: —Che we'ctze, porque ma che tzaj tk'o'n Kman ke aj Madián tuj kk'ab. 16E cubtzun tpa'n Gedeón keju ox syent xinak te ox c'loj, ex xi tk'o'n jun tcach ẍne'l ex jun ẍok' te teyle junjun. Akeju ẍok' minti' a' cyuj, nok o'cx ttxa'n tzaj in c'ant cyuj. 17Ex xi tma'n cye: —Oc npone tuj juntl pac' cycampament aj k'oj, bix chinx cyque'yine ex cybinchame ic tza'n weye cbantel wu'n. 18Octzun toc kk'ajtza'ne cach, bixtzun tz'oc cyk'ajtza'n cyeye ti'jele tcyakil cycampament aj k'oj, ex bix che jaw sch'ine cyja': Tu'n Kman ex tu'n Gedeón, che chicuye. 19Cyja'tzun tten, ate Gedeón cyuc'ix jun syent xinak uc'in tu'n, e pon tuj juntl pac' cycampament aj k'oj tej matok cybajlen ch'expu'n keju in che xk'ukin tu'n tpon te tmij ak'bil. Octzun cyk'ajtza'n ke tcach ẍne'l ex e cub cypa'n ke ẍok' k'i'n cyu'n, 20ex junx e oc k'ajtza'n ke tcach ẍne'l cyu'n ox c'loj xjal ex e cub cypa'n ke ẍok'. K'i'mlex ttxa'n tzaj cyu'n tuj cynayaj ex atzun ke tcach ẍne'l k'i'n tu'n cybank'ab, ex e jaw sch'in cyja': Aju k'oj lu tu'n Kman ex tu'n Gedeón. 21Minti' e yucch ke aj Israel tuj cylugar ti'jele cycampament aj Madián, ex cycyakiltzun soldad aj Madián e jaw sch'in ex e je'l ok. 22Atzun cye ox syent aj Israel cucx oc cyk'ajtza'n ke tcach ẍne'l, ex tu'n Kman e oc ten ke aj k'oj k'ojlel tu'n spad cyxolx tuj cycampament, ex e je'ltzun ok tu'n cypon max tuj lugar Bet-sita tuj be in xi' tumlal Zerera, ex max e pon ok tuj tmojonil lugar Abel-Mehola aju tcub junx tuc'il lugar Tabat. 23E tzajtzun txco'n ke tiyjil Neftalí, cyuc'ix ke tiyjil Aser ex cycyakil ke tiyjil Manasés tu'n cyxi lpe' k'ojlel cyi'j aj Madián. 24Xi t-sama'n Gedeón ke t-sanjel tuj tiwitz tx'otx' cye aj Efraín, ex xi cyma'n tu'n cycu'tz ke xinak k'ojlel cyi'j aj Madián, ex tu'n cycub ten ttzi nima Jordán jatum at ke xajbil a', ex tu'n cypon max tuj lugar Bet-bara acux na'nxtok cypon ke aj Madián. Cybinchatzun ke tiyjil Efraín ic tza'n otok tzaj k'ma'n cye. 25E tzyet cabe nejenel cye aj Madián cyu'n, jun Oreb tbi, atzun juntl Zeeb tbi. Ate Oreb, atzun cub byo'n twi' jun pic Oreb tbi, atzunte Zeeb, atzun cub byo'n tuj putz'bil uva Zeeb tbi. E oc lpe' k'ojlel cyi'j aj Madián tu'n tcub cyi'j, ex xi cyi'n twi' Oreb tuc'ix twi' Zeeb tuc'il Gedeón, max jlajxi nima Jordán.

will be added

X\