JUECES 6

1E oc ten aj Israel juntl maj binchal mya ba'n twitz Kman, ex tuj wuk abk'i e je'x k'o'n tu'n Kman tuj cyk'ab aj Madián tu'n cycawin cyibaj. 2Tu'nju cyuw in che yajlantok aj Madián cyi'j aj Israel, cyja'tzun tzaj cyxobil aj Israel cywitz aj Madián, ex e jax ewal cyib tuj cypaxil witz ex cyuj toy' pic ex cyuj ke lugar mas cyuw tu'n cycnet. 3Tcyakil maj oc tcu'x cyawa'n aj Israel cyawal, in che ul aj ke aj Madián, ke aj Amalec ex ke xjal najlke tuj tjawitz k'ij elk'alte twitz cyawal. 4Oc in che pon ke xjal lu tuj cytx'otx' aj Israel, in baj naj twitz cyawal aj Israel cyu'n, ex max in che pon ẍtic'al tuj lugar Gaza. Misicyer cywa aj Israel in cyaj cyclo'n, ex mi jun cyẍne'l, mi jun cywacẍ ex mi jun cychej bur in cyaj cyk'o'n. 5Oc in che pon cyuc'ix ke cyalun in cub cyk'o'n cyja xbalun, ex tcyakil in baj naj cyu'n tuj tcyakil cytx'otx' aj Israel. Nim cybaj oc cypon cyuc'ix ke cychej camey, mer ic tza'n txkan ẍplon. 6Tu'n cylaj ke aj Madián, e oc ke aj Israel puro tal yaj; cyja'tzun e oc ten cubsal twitz Kman tu'n cytzaj onin tu'n. 7Tej cyoc ten aj Israel kanil onbil te Kman tu'n cyclet tuj cyk'ab aj Madián, 8tzajtzun t-sama'n Kman jun t-sanjel ex tma cye cyja': Chi Kman Dios cyja': Akine etz k'inte cyeye tuj Ejipt jatum ate'toke te majen; 9mya nok o'cx e clete wu'ne tjak' cycawbil aj Ejipt, ax icx e clete wu'ne tjak' cycawbil cycyakil keju e yajlante cyeye. Cywitzxe e bje'x nlajo'ne ke xjal tuj tx'otx' lu ex xitzun nk'o'ne cytx'otx' te cyeye. 10Ex xi nma'ne cyeye cyja': Akine Cymane Dios: Mi'n che c'ulune cywitz cydios aj Amorrey jatum najlkeye ja'lo, nchiye, pero atzun cyeye minti' ma txi cynimane nyole, chi Dios, chi t-sanjel. 11Ultzun t-anjel Kman ex cub ke' tjak' tze' c'ol tuj tnam Ofra. Aju tze' lu te Joás aju tiyjil Abiezer. Ex lu te Gedeón aju tcy'ajal Joás in xupintok tuj triw tuj ewaj tuj lugar jatum nne'l yatz'o'n ta'l twitz uva, tu'ntzun mi'n tilwaj cyu'n aj Madián. 12Cubtzun tyec'un tib t-anjel Kman twitz Gedeón ex xi tma'n te cyja': —A Kman at tuc'ila, aya xinak at nim tipuna ex cyuw tc'u'ja tuj k'oj. 13Atzunte Gedeón xi ttzak'we'n: —Tat, ka a Kman at kuc'ile, ¿tiku'ntzun ma tzaj tcyakil mya ba'n lu ki'je? ¿Jattzun ke binchben ma' cyxilen, akeju in che yolin ke kmane ti'j, oc in cyma'n ka a Kman etz k'inte keye tuj Ejipt? Ma ko cyaj coline tu'n Kman, ex ma ko'x k'o'ne tuj cyk'ab aj Madián tu'n cycawin kibaje. 14Tzajtzun tque'yin Kman ti'j Gedeón ex tma: —Tu'nju tipuna at, txi'ya colpil cye aj Israel tjak' cycawbil aj Madián. Akine in chinx samante teya. 15Atzunte Gedeón xi ttzak'we'ntl: —Tat, pero ¿tza'n tten tu'n cyclet aj Israel wu'ne? Ke xjal at nxilene cyuc'il atzun ke mas tal yaj ke cyxol tiyjil Manasés, ex akine mas ch'in woclene cywitz ke mastl wermaniye. 16Atzunte Kman tzaj ttzak'we'n: —Cbantel tu'na porque akine chin tele tuc'ila. Cbel cyi'j aj Madián tu'na mer ic tza'n oc in cub ti'j junx xjal. 17Xitzun tma'n Gedeón te: —Ka ma ncambaye xtalbil teya, yec'untza jun techal weye, tu'ntzun tel nnic'e ti'j ka axix toc aya in yolin wuc'ile. 18Binchama xtalbil, mi'n tzic' naja tzalu, chin tayoma ocxi wule tuc'il jun oyaj waje txi nk'o'ne teya. Atzunte Kman tzaj ttzak'we'n: —Chin ayole ti'ja tzalu ocxi tul meltz'aja. 19Xi'tzun Gedeón, cub tbyo'n jun tal chip ex baj ttzk'ajsa'n; ax icx baj tbincha'n ke pan minti' t-samel tuj tu'n tjaw mal tc'u'j tu'n jun arrob arin, cu'xtzun tk'o'n chibj tuj jun chi'l, atzun ta'l chibj cu'x tk'o'n tuj jun c'il, ex xitzun ti'n tcyakil max jatum ta' tze' c'ol. 20Atzunte t-anjel Dios xi tma'n te Gedeón: K'oncuya chibj tibaj pic lu, tuc'ix pan minti' t-samel tuj, ex konxa ta'l chibj tibaj, chi. Tbinchatzun Gedeón icju. 21Atzunte anjel oc tk'o'n twi tcy'ako'ch ti'j chibj ex ti'j pan, ex tujtzun pic etz koptz'aj k'ak'; bi'x baj tz'e'y chibj ex pan tu'n, ex cubtzun naj ju t-anjel Kman twitz Gedeón. 22Tejtzun tel tnic' Gedeón ti'j ka t-anjel Kman jlu, o xob wen ex tma: —Aya Nman Dios, acu t-anjela ma wile. 23Atzunte Kman tzaj ttzak'we'n: —Mi'n xoba porque mlay cyima. Ke' tc'u'ja. 24Jawtzun tbincha'n Gedeón jun altar te Kman ex oc tk'o'n tbi altar cyja': “Ate Kman k'ukbalte kc'u'j.” Aju altar jaw tbincha'n Gedeón ax ta' ja'lo tuj tnam Ofra, aju cytanmi tiyjil Abiezer. 25Ax konic'an jlu tzaj tma'n Kman te Gedeón: —K'intza jun tor cyxol ke twacẍ tmana, aju tcabin tor te wuk abk'i, ex k'uchin cuba t-altar Baal aju te tmana, ex tx'emin jawa tze' aju tilbilal xu'j dios Asera aju tcub junx tuc'il altar te Baal. 26Binchan jawa jun altar te weye aju Tdiosa max twi pic matij twa'l. K'inxa ju tor, aju tcabin, ex patun cuba te jun chojbil, ex ax ju tze' aju tilbilal xu'j dios Asera aju otok jaw ttx'emina, c'ajbel tu'na te si' tu'n tcub patit chojbil. 27E tzajtzun ti'n Gedeón laj tmajen ex tbincha ic tza'nx otok tma Kman te; nok o'cx minti' tbincha k'ijl sino konic'an, tu'nju in xob cywitz ke terman tman ex cywitz mastl xinak aj tnam. 28Te prim tuj juntl k'ij tej cyjaw we' xjal aj tnam, lu t-altar Baal otok cub xitj, ax icx otok jaw tx'emin aju tze' tilbilal xu'j dios Asera aju junx tcub ttxlaj altar, ex otok cub patun jun tor te chojbil tibaj ac'aj altar. 29In che xjelintok xjal cyxolx ex in cyma'n: ¿Alcye ma binchante jlu? Tbajlenxi cyxjelin nim, o cybi ka tu'n Gedeón aju tcy'ajal Joás otok bant jlu, ex xitzun cyma'n te Joás: 30—K'i'metza tcy'ajala porque il ti'j tu'n tcub kbyo'ne, tu'nju ma cub t-xitun aju altar te Baal ex ma jaw ttx'emin ju tze' tilbilal xu'j dios Asera aju junx tcub ttxlaj altar, che chi xjal te Joás. 31Atzunte Joás xi ttzak'we'n cye xjal cyja': —¿Maj che onile ti'j Baal? ¿Maj che colile ti'j? Nok alcye jun taj colin ti'j Baal, ba'n tu'n tcyim na'nxtok kskix. Ka dios te Baal, cyk'oncje tu'n tclonte tib tjunalx te, porque tetzun Baal aju altar ma cub xitun. 32Atxixtzun tuj k'ij lu oc k'o'n tbi Gedeón Jerobaal, ex in cyma'ntok xjal cyja': Ba'n tu'n tclonte tib Baal te Gedeón. Cyma jlu tu'nju cub t-xitun Gedeón t-altar Baal. 33Bajtzun cychmon cyib cycyakil aj Madián ex aj Amalec, cyuc'ix ke xjal najl tuj tjawitz k'ij, e ic'tz tuj nima Jordán ex atzun e cub ten tuj chk'ajlaj Jezreel. 34Pero ul T-xew Kman tuc'il Gedeón, ex oc tk'ajtza'n Gedeón jun tcach ẍne'l tu'n toc cychmon cyib ke tiyjil Abiezer tuc'il; 35ax icx xi t-sama'n Gedeón ke sanjel txcol cye ke tiyjil Manasés, ke tiyjil Aser, ke tiyjil Zabulón ex ke tiyjil Neftalí, tu'n cytzaj ex tu'n toc cychmon cyib tuc'il. 36Xitzun tma'n Gedeón te Dios: Ka axix toc chin ajbele tu'na tu'n cyclet aj Israel ic tza'nx ma tmaya, 37cbel nk'o'ne jun ttz'umal ẍne'l tuj lugar jatum nne'l bujet triw. Katzun ac'naj tz'u'm tu'n tk'ab che'w oc tjawil k'ij, ex atzunte tx'otx' puro tzkij, atzun c'elel nnic'e ti'j ka chin ajbele tu'na tu'n cyclet aj Israel ic tza'nx ma tmaya. 38Tbinchatzun Kman aju o tkani Gedeón. Tej tjaw we' Gedeón te prim, el tyatz'o'n a' ti'j tz'u'm, ex jun lak bant tk'ab che'w tej tel yatz'o'n ti'j tz'u'm. 39Pero xi tma'n Gedeón juntl maj te Dios: Mi'n tzaj tk'oja wi'je tu'nju cucx in chin wuline ti'ja; nok juntl techal waje tu'n tbant. Atzun ja'lo binchama tu'n mi'n tac' tz'u'm, ex atzunte tx'otx' e tt'ake' tu'n tk'ab che'w, chi Gedeón. 40Tuj konic'an lu bant tu'n Dios icju. Tujtzun juntl k'ij te prim, aju tz'u'm puro tzkij ta', ex atzunte tx'otx' puro nojni tibaj tu'n tk'ab che'w.

will be added

X\