1 Tcyimlenxitzun Aod, e oc ten aj Israel juntl maj binchal mya ba'n twitz Kman. 2 Cyja'tzun tten e je'x tk'o'n Kman ke aj Israel tuj tk'ab Jabín tu'n tcawin cyibaj. Ate Jabín jun rey cye aj Canaán in cawintok tuj tnam Hazor. Aju nejenel cye t-soldad, Sísara tbi, ex atzun najl tuj tnam Haroset-goim. 3 Ate Jabín attok belaj syent tcarwaj c'uxbil ke, ex tuj winkin abk'i e yajlanjtz aj Israel tu'n cyuwxix wen. Maxitzun e oc ten aj Israel cubsal cywitz te Kman tu'n cytzaj onin tu'n. 4 Tuj tk'ijlalil lu, toctok Débora aju t-sanjel Dios ex t-xu'jil Lapidot te cawil cyxol aj Israel. 5 Atzun in cub ke' Débora tjak' jun wi' tkan xa'j aju toc tbi tkan xa'j te Débora, ex atzun in che pon aj Israel binchalte ti'j cyxtis tuc'il. Aju lugar lu atzun ta' cyxol tnam Ramá tuc'il tnam Betel, tuj tiwitz tx'otx' cye aj Efraín. 6 At jun k'ij xi txocbaj Barac aju tcy'ajal Abinoam tu'n Débora. Ate Barac najltok tuj tnam Cedes cyxol tiyjil Neftalí, ex xi tma'n Débora te Barac cyja': —Ate Kman aju Cydios aj Israel in tma'n teya tu'n tbaj tchmo'na laj mil xinak cyxol tiyjil Neftalí ex cyxol tiyjil Zabulón, ex cyxi'tzune twi witz Tabor. 7 Wu'ne ctzajel wi'ne Sísara aju nejenel cye t-soldad Jabín, tu'n tul tuj tk'ab xak Cisón, cyuc'ix ke tcarwaj ex ke t-soldad, tu'ntzun toc tzokpaj k'ojlel ti'ja. Pero che tzajel nk'o'ne tuj tk'aba tu'n tcub cyi'j tu'na, chi Dios teya, chi Débora. 8 —Jacu chinxe pero ka ma txi'ya wuc'ile, ex katzun mi ma txi'ya, ax mlay chinxe, chi Barac xi ttzak'we'n. 9 —Jacna chinxe tuc'ila, pero oc tcub cyi'j aj k'oj tu'na mya teya cxel k'o'n nimbil, porque tuj tk'ab jun xu'j tzul k'o'n Sísara tu'n Kman tu'n tcub ti'j, chi Débora, xi ttzak'we'n. Xi'tzun Débora tuc'il Barac tuj tnam Cedes. 10 E tzajtzun ttxco'n Barac ke tiyjil Zabulón cyuc'ix ke tiyjil Neftalí tuj tnam Cedes, ex baj tchmo'n laj mil xinak tu'n cyxi' k'ojlel tuc'il; ex tuc'ix Débora xi' cyuc'il. 11 At jun xinak aj Quenit Heber tbi, otok tz'el tpa'n tib cyi'j mastl aj Quenit akeju tiyjil Hobab aju tji' Moisés. Atzun tcubsa'ntok tja, xbalun ja, nikayin ttxlaj tnam Cedes, ttxlaj tkan c'ol tuj lugar Zaanaim tbi. 12 Tejtzun tbinte Sísara ka otok jax Barac aju tcy'ajal Abinoam twi witz Tabor, 13 bajtzun tchmo'n belaj syent tcarwaj c'uxbil cyuc'ix cycyakil ke t-soldad, ex tzyet be cyu'n tuj Haroset-goim tu'n cypon max tuj tk'ab xak Cisón. 14 Xitzun tma'n Débora te Barac cyja': —Chux txi'ya, porque ma pon or tu'n ttzaj k'o'n Sísara tuj tk'aba tu'n Kman, tu'n tcub ti'j tu'na, ex ya ma cub nej Kman twitza. Cu'tztzun Barac twi witz Tabor cyuc'ix laj mil t-soldad lepcho'c ti'j. 15 Tejtzun ttzyet tk'ojin Barac cyi'j, e baj sec'paj ke t-soldad Sísara tu'n Kman ex e bje'l sputj cycyakil cyuc'ix ke cycarwaj; ax icx te Sísara cu'tz tuj tcarwaj ex el ok. 16 Atzunte Barac cyuc'ix ke t-soldad e oc lpe' cyi'j ke t-soldad Sísara ex cyi'j ke cycarwaj, tu'n cyk'ojin cyi'j, tejxi cypon tuj tnam Haroset-goim. Tuj k'ij lu mi jun t-soldad Sísara cyaj ank'in, cycyakil e baj cyim. 17 Atzunte Sísara el ok tu'n tpon tclon tib max tja Jael aju t-xu'jil Heber aju aj Quenit, porque ba'ntok cyten Jabín aju rey te Hazor cyuc'il keju ate' tuj tja Heber. 18 Etztzun Jael canul ti'j Sísara ex xi tma'n te: —Tzaja tzalu, tat, tzaja wuc'ile; mi'n xoba. Ocxtzun Sísara tuja ex cub tk'o'n Jael jun xbalun tibaj. 19 Xitzun tkanin Sísara ch'in tc'a a' te Jael porque attok nim txketle'n ti'j; atzunte Jael jaw tjako'n ttzi bols tz'u'm jatum c'u'n lech, ex xi tk'o'n te tc'a; te tibajxi cyaj muk'an juntl maj Sísara tu'n. 20 Xitzun tma'n Sísara te Jael: —We'cuya ttzi ja xbalun, ex ka at jun xjal ma tzul ex ka ma tzaj tkanin teya ¿kape at jun xjal at tzalu?, ka chi: Minti', chicuya. 21 Pero otok sict Sísara wen, cyja'tzun, bi'x tzyet tc'u'j tu'n watl. Atzunte Jael tzaj ti'n jun pajbil, tuc'ix jun piẍ tze' aju in ajben te stac tu'n ttzaj kitz'et ttxa'n xbalun ja ti'j, chebatzun pon lak'e' xu'j ttxlaj Sísara, ex ak'pontzun tpajo'n stac t-xe t-ẍcyin ex bi'x cupun twitz tx'otx'. Cyja'tzun tten cyim Sísara. 22 Tej in jyontok Barac ti'j Sísara, etz naj Jael canul ti'j ex xi tma'n te: —Tzaja tzalu ex cxel nyec'une teya aju xinak in jyona ti'j. Ocxtzun Barac tuj ja xbalun, ex cnet Sísara tu'n palch twitz tx'otx', ya otok cyim, tuc'ix stac xi'yni pajo'n t-xe t-ẍcyin. 23 Cyja'tzun tten cub ti'j Jabín aju rey cye aj Canaán cyu'n aj Israel tuj k'ij lu, nok tu'n tipumal Kman. 24 Ex cucx e k'ojin aj Israel ti'j rey Jabín, ex teyle junjun maj mas cyuw e k'ojin ti'j tejxi tnaj cyu'n, cyuc'ix ke t-soldad.
