1 Tuj tk'ijlalil tej minti'tok rey cyxol aj Israel, attok jun aj Leví najl mas najchak tuj tiwitz tx'otx' cye aj Efraín tzaj ti'n jun xu'j aj Belén tuj cytx'otx' aj Judá, tu'n toc te tcab t-xu'jil. 2 Pero tzaj tk'oj xu'j ti'j tchmil ex aj juntl maj najal tuc'il tman tuj Belén. Tbajlenxi cyaje xjaw tponlen xu'j ma chixin, 3 xi'tzun aj Leví max tuc'il tu'n tcub tc'u'j tu'n, ex tu'n tajtl juntl maj t-xu'jil tuc'il. Xi tuc'in jun tmajen ex xi ti'n cabe bur, ex o c'monjtz tu'n xu'j tuj tja tman. 4 Ax icx o c'monjtz tu'n tman xu'j tuc'il tzalajbil, ex xi tma'n tu'n tcyaj ten cyuc'il. Atzunte aj Leví tuc'ix tmajen e cyaj ten ox k'ij tja tman xu'j, in che wa'n, in che c'an ex ax e tan. 5 Tuj tcyajin k'ij e jaw we' primxix tu'n tcub be cyu'n, pero tej ch'ixtok cyaj, xi tma'n tman txin te tji': —Wa'na nej na'nxtok taja, tu'ntzun toc tipuna, ex te tibajxi jlu ba'ntzun tu'n taja. 6 E cubtzun ke' cycabil ex e oc ten wa'l ex c'al, ex atzunte tman xu'j xi tma'n te tji' tu'n tcyaj ten juntl ak'bil tu'ntzun ttzalaj. 7 Jawtzun we' aj Leví tu'n taj meltz'aj, pero tu'nju oc k'o'n il ti'j tu'n tji', cyja'tzun cyaj ten juntl konic'an. 8 Tuj tjwe'yin k'ij jaw we' aj Leví primxix tu'n tcub be tu'n, pero oc ten juntl maj tman xu'j cubsal twitz te tu'n twa'n na'nxtok taj meltz'aj, tu'ntzun toc tipun; cyja'tzun e wa'n junx acux in bet t-xi' k'ij. 9 Tejtzun tjaw we' aj Leví tu'n tcub be tu'n tuc'ix t-xu'jil ex tuc'ix tmajen, atzunte tji' xi tma'n te cyja': Ma tz'oc kax ex ch'ix koc yupj, ax tcyaj tena juntl konic'an tu'ntzun ttzalaja, ex te prim nchi'j jacu cub be cyu'ne tu'n cyaje cyjaye. 10 Atzunte aj Leví minti' cub tuj twitz tu'n tcyaj ten juntl konic'an, nok o'cx tzyet be tu'n, tuc'ix t-xu'jil, ex cyuc'ix ke cabe tbur tocsa'n cysiy. 11 Tejtzun cycanun ttxlaj tnam Jebús ex ka Jerusalén, xi tma'n tmajen aj Leví te: —¿Myape ba'n tuj twitza tu'n tex ak'bil ku'n tuj tnam lu, aju cytanmi aj Jebusey? 12 Atzunte aj Leví xi ttzak'we'n: —Mi'n, mlay ko cyaj ten tuj jun tnam ka mya cye aj Israel. Ba'n tu'n t-xi ki'n kbe tu'n kpon tuj tnam Gabaa. 13 Ko' ch'intl tu'n tex ak'bil ku'n tuj tnam Gabaa ex ka tuj Ramá. 14 Cyja'tzun xi cyi'ntl cybe, ex ch'ixtok tex k'ij tej cypon tuj Gabaa jun tnam cye tiyjil Benjamín. 15 Eltzun cypa'n cyib ti'j be k'i'n cyu'n, ex e ocx tuj tnam Gabaa tu'ntzun tex ak'bil cye, ex e cub ke' tuj plas tuj tnam porque mi jun tzaj k'onte cyposad. 16 Tej otok tz'oc konic'an, ic' jun tij xjal ajnintz tuj tak'un tuj cojbil. Aju tij xjal lu atzun ta'tok ttanmi tuj tiwitz tx'otx' cye aj Efraín, pero atzun najltok tuj tnam Gabaa ic tza'n jun betin xjal, porque akeju najlke tuj tnam Gabaa tiyjil Benjamín ke. 17 Tejtzun ttil tij xjal aju betin xjal k'ukltok tuj plas, xi tkanin te: —¿Jatum tzajniya ex tza'n t-xi'ya? 18 Atzunte aj Leví xi ttzak'we'n: —Nok betin xjal ko'ye. Tzajni ko'ye tuj Belén tuj tx'otx' Judá, ex ma ko'xe tuj tiwitz tx'otx' mas najchak cye aj Efraín jatum najl kine. Ma chin tene tuj Belén, atzun ja'lo ma chin ajtz meltz'aje tu'n nxi'ye njaye, pero na'nx tcnet jun xjal wu'ne tzalu tu'n ttzaj k'o'n ch'in nposadiye tu'n. 19 K'i'n cywa nburre ku'ne, tuc'ix ttxa triw, ex k'i'n pan ex ta'l twitz uva ku'ne tu'n tajben te keye; te nxu'jile, te nmajene ex te weye. Minti' juntl atx taj keye. 20 Atzunte tij xjal xi ttzak'we'n: —Ba'nwt ma tzula. Jacu wile tcyakil aju at tajben teya. Mlay txi nk'o'ne ambil teya tu'n tex ak'bil tu'na tuj plas. 21 E je'xtzun k'i'n tu'n tij xjal max tja ex xi tk'o'n cywa ke bur. Te tibajxi baj cytx'jo'n ke betin xjal cykan ex e octzun ten wa'l ex c'al junx. 22 Pero tej matok in che tzalaj, attok junjun xinak jumajx mya ba'n ke ate' tuj tnam, baj cytxolban cyib ti'jele ja, ex e oc ten k'ajtzal cyuw twitz tpwertil ja, ex xi cyma'n te tij xjal aju tajaw ja: —K'i'metza aju xinak ma tzul tuc'ila. Kajbile tu'n kcub tane tuc'il. 23 Atzunte tajaw ja etz, oc ten cubsal cywitz ex tma: —Akeye wuc'il mi'n cybinchaye icju. Mi'n cybinchaye aju mya ba'n lu, aju xinak lu ma nc'ame tu'n tposadiyin wuc'ile. 24 Cybintze, lu nme'jele lu na'nx tlonte xinak, ax icx lu t-xu'jil xinak lu. Che elex wi'ne ex cybinchame cyi'j nok alcye cyajbile, atzun te xinak lu mi'n cybinchaye mya ba'n ti'j. 25 Atzun cye minti' xi cybi'n tyol tij xjal, cyja'tzun tzaj ti'n aj Leví t-xu'jil ex ex tk'o'n tuj cay, atzun cye xinak lu baj cyyajla'n, ex e oc ten ti'j xu'j tuj enter konic'an tejxi tcub k'ij. Ex cyajtzun cyk'o'n. 26 Ch'ixtok tcub k'ij tej tul meltz'aj xu'j tja tij xjal jatum ta'tok tchmil, ex axtzun cub tz'ak ttzi ja ex cyim. 27 Tejtzun tjaw we' tchmil, ocx tjako'n tlamel ja tu'ntzun t-xi ti'ntl tbe, o til lu t-xu'jil palch cub ttzi ja, cycubsa'n ke tk'ab tibaj tmarquil ja. 28 Xitzun tma'n te: —Chux we'ctza ex ko'tzun. Atzunte xu'j minti' tzaj ttzak'we'n. Jawtzun ti'n t-ximlal xu'j ex jax tk'o'n tibaj jun tbur, ex tzyet be tu'n tu'n t-xi' tja. 29 Tejtzun tpon tja, tzaj ti'n jun cchil ex baj tpaẍu'n t-ximlal ktzan t-xu'jil, te cablaj piẍ ela tu'n ex xi t-sama'n tuj tcyakil tx'otx' cye aj Israel. 30 Cycyakil keju e que'yinte jlu o cyma: —Atxix tej cyetz aj Israel tuj Ejipt, na'nx tilwaj ex na'nx tbant jun maj icju ic tza'n jlu. Ba'n tu'n kximan ti'j ex tu'n tbant ti'j alcye cbantel ku'n ti'j jlu, che chi.
