JUECES 18

1Tuj tk'ijlalil lu minti'tok rey cyxol aj Israel. Ax icx tuj tk'ijlalil lu na'nxtok cyc'monte ke tiyjil Dan jun piẍ cytx'otx', cyja'tzun in che jyontok jatum tu'n cycub ten najal. 2Cyja'tzun, akeju tiyjil Dan e tzaj cysama'n jwe' xinak cyuwxix cyc'u'j tuj k'oj aj Zora ex aj Estaol ke, que'yilte tza'n tten tx'otx', ex bajtzun cyque'yin aju tten tx'otx'. Ex otok txi cyma'n cye: Cyxi'ye que'yilte tx'otx'. Akeju jwe' xinak lu e pon tuj tiwitz tx'otx' cye aj Efraín jatum ta' tja Micaía, ex axtzun e cyaj ten tu'n tex ak'bil cye. 3Ex tej ch'ixtok cypon tja Micaía, el cynic' ti'j tk'ajk'ajel twi' cu'xun aj Leví, ex e ocxtzun kanilte te: —¿Alcye ul k'inte teya tzalu? ¿Ti nbaj teya tuj lugar lu? ¿Ti in tjyo'na tzalu? Che chi. 4Atzunte aj Leví xi tma'n cye aju trat otok tbincha Micaía tuc'il, ex tza'n tten otok bant ti'j tu'n Micaía tu'n toc te tpal. 5Xitzun cyma'n te aj Leví: —Kaninxa te Dios tu'n tel knic'e ti'j ka ba'n c'elel kbeye lajo'n. 6Atzunte pal aj Leví xi ttzak'we'n: —Cyxi'ye tuc'il tzalajbil, ate Kman c'oquel cwentinte cyeye tuj cybeye. 7E ic'tzun ke jwe' xinak ex e je'x tuj tnam Lais. Ke xjal ate' tuj tnam lu in che ank'intok tuj txubtxaj, ex minti'tok in baj cyc'u'j ic tza'nx cycostumr ke xjal aj Sidón; mi a'ltok jun in labt cyi'j ex minti' jun atx taj cye. Najchak cyelsa'n cyi'j aj Sidón, ex minti'tok cymojbabl cyuc'il ke txkantl tnam ate' nikayin. 8Tejtzun cypon meltz'aj jwe' xinak tuj tnam Zora ex Estaol, xi cykanin ke cyuc'il cye: —¿Alcye tkanil k'i'n cyu'ne? Atzun cye xi cytzak'we'n: 9—Ma baj kbetine tcyakil tx'otx' ma chixin ex aju tx'otx' ma kile tbanilxix wen. Chux keye, che we'ctze. Ko'ke tu'n koc tzokpaj cyi'j. Mi'n ax che cyaj tene nok cucx tu'n tex cyk'ije. Ko'ke tzyulte tx'otx' lu. 10Oc cypone ma chixin, che cnetel ke xjal cyu'ne minti' in baj cyc'u'j, at nim cytx'otx' ex minti' juntl atx taj cye. Ctzajel tk'o'n Dios tx'otx' lu te cyetzbile, che chi. 11Kak syent xinak tiyjil Dan e etz tuj tnam Zora ex Estaol, banin cyten tuc'il cymacbil in che ajben tuj k'oj. 12ex e pon tuj cytx'otx' aj Judá, ex atzun e cub ten tuj telex k'ij te tnam Quiriat-jearim, cyja'tzun oc tbi lugar lu, Campament te Dan, ex ax tbi toc ja'lo. 13Te tibajxi e je'x tu'n cypon tuj tiwitz tx'otx' cye aj Efraín ex e pon tja Micaía. 14Atzun keju jwe' xinak otok che'x aj que'yilte tx'otx' te tnam Lais xi cyma'n cye cyuc'il: —Cybintze, tuj ja lu at jun capiẍay in ajben cyu'n pal, ex at ke tilbilal nno'c cydiosin xjal tuj cyja, tuc'ix jun tilbilal lo'tzimaj ti'j tu'n sak pwak. Cyque'yinxe alcye cbantel cyu'ne. 15Cyja'tzun akeju xinak otok che'x aj que'yilte tx'otx' el cypa'n cyib cyi'j ke cyuc'il, ex e je'x tja Micaía jatum ta' tja cu'xun aj Leví, ex xi cyk'olbe'n. 16Atzun ke kak syent soldad tiyjil Dan, banin cyten tuc'il cymacbil in che ajben tuj k'oj ax e cyaj ten ttzi tpwertil muro toc ti'j ja. 17Atzun keju jwe' xinak otok che'x aj que'yilte tx'otx' e ocx naj tuj ja, ex etz cyi'n tilbilal lo'tzin ti'j tu'n sak pwak, tuc'ix ju capiẍay ex cyuc'ix mastl tilbilal nno'c cydiosin xjal tuj cyja, atzunte pal attok ttzi tpwertil muro toc ti'j ja cyuc'il ke kak syent soldad. 18Tej ttil pal ke jwe' xinak otok che ocx tuj tja Micaía ex otok tz'etz cyi'n tilbilal lo'tzin ti'j tu'n sak pwak, tuc'ix capiẍay ex cyuc'ix junjun tilbilal nno'c cydiosin xjal, xi tma'n cye: —¿Ti nbaj cyeye? 19Atzun cye xi cytzak'we'n: —Mi'n k'ajta, tzaja kuc'ile. Kajbile tu'n toca te kpale ex tu'n toca ic tza'n jun mambaj te keye. ¿Myape mas ba'n tuj twitza tu'n toca te pal te cye jun c'loj tiyjil Israel twitzju tu'n tajbena te jun ja xjal? 20Ba'n e'la jlu tuj twitz pal, tzaj ti'n tilbilal, tuc'ix ju capiẍay, cyuc'ix junjun tilbilal nno'c cydiosin xjal tuj cyja, ex xi'tzun cyuc'il ke tiyjil Dan. 21Tzyettzun cybe juntl maj; ex ake c'wa'l, ke wacẍ ex tcyakilju at cye, e cub nej cyu'n. 22Otok che lak'e' tej tbaj cychmon cyib Micaía cyuc'il ke tvesin, ex e je'xtzun lpe' cyi'j. 23Tejtzun cybinte ke tiyjil Dan aju sich' in jaw cyu'n ke xjal lepchix cyxi' cyi'j, ajtztzun cyque'yin ex xi cykanin te Micaía: —¿Ti ma baj ti'ja? ¿Tiku'n ma che tzaj tchmo'na xjal k'ojlel ki'je? 24Atzunte Micaía xi ttzak'we'n: —Ma tzaj cyi'ne ke ndiose, akeju wu'ne e bant, ax icx ma tzaj cyi'ne npale, ex ma chin cyaj cyk'o'ne minti' at weye. ¿Tza'ntzun tten in tzaj cykanine weye: ¿Ti ma baj ti'ja? 25Atzun cye tiyjil Dan xi cytzak'we'n: —Mi'n k'ajta ki'je, mya yajcu at junjun keye baj cypasens ex jacu che oc tzokpaj cyi'je, ex jacu naja cyu'n, cyuc'ix keju at cyxilen tuc'ila. 26Ke tiyjil Dan xi cyi'ntl cybe, ex tej tque'yinte Micaía nimcu cybaj, aj meltz'aj tja. 27Akeju tiyjil Dan k'i'ntok ke ti'xti cyu'n, akeju otok che baj tbincha'n Micaía, tuc'ix tpal Micaía uc'in cyu'n, e pon max tuj tnam Lais. Ke xjal ate' ma chixin in che ank'in tuj txubtxaj ex minti' in baj cyc'u'j, cyja'tzun e cub byo'n cycyakil tu'n spad cyu'n ke tiyjil Dan, ex oc cyk'o'n tk'ak'al tnam. 28Aju tnam lu najchak telsa'n ti'j tnam Sidón, ex minti'tok cymojbabl cyib xjal aj Lais cyuc'il ke txkantl tnam ate' nikayin; cyja'tzun mi a'l jun o colon cyi'j. Atzun ta' tnam lu tuj chk'ajlaj nikayin ttxlaj lugar Bet-rehob. Te tibajxi jaw cybincha'n tiyjil Dan juntl maj tnam, ex axtzun e cyaj ten najal tuj. 29Aju tbi tnam toctok nej Lais, ex atzun cye oc cyk'o'n tbi Dan te jun nimbil tbi ktzan cyxe'chel, aju tcy'ajal Israel. 30Cub cyk'o'n ke tiyjil Dan aju tilbilal lo'tzin ti'j tu'n sak pwak, tu'ntzun cyc'ulun twitz, ex ate Jonatán oc te cypal, aju tcy'ajal Gersón ex tal tchman Moisés. Ex te tibajxi ax ke tiyjil Jonatán e oc te cypal ke tiyjil Dan, tejxi cyxi k'i'n pres. 31Aju tilbilal cub tbincha'n Micaía ax o ten cyxol tiyjil Dan tuj tcyakil tyemp tej tten tja Dios tuj Silo.

will be added

X\