JUECES 17

1Tuj tiwitz tx'otx' cye aj Efraín najltok jun xinak Micaía tbi. 2Xi tma'n Micaía te ttxu' cyja': —Aju jun mil tuc' jun syent sak pwak xi elk'a'n teya, ex o nbiye tej t-xi tkanina mya ba'n tibaj elek', akine k'ilte pwak lu, akine inx elk'ante tpwaka, chi Micaía. Tmatzun ttxu' cyja': —Awt Kman cy'iwlante teya, wal. 3Ajtzun tk'o'n Micaía aju jun mil tuc'il syen sak pwak te ttxu', atzunte ttxu' tma: —Ax toc aju pwak lu cxel nk'o'ne te Kman tu'n tajben teya wal, tu'n tbinchanteya jun tilbilal lo'tzin ti'j tu'n sak pwak; ja'lotzun c'ajel nk'o'ne juntl maj tuc'ila. 4Atzunte Micaía aj tk'o'n juntl maj sak pwak te ttxu', ex atzunte ttxu' xi tk'o'n cabe syent sak pwak ti'j pwak lu te jun xjal ba'n binchan tilbilal, tu'ntzun tcub tbincha'n jun tilbilal lo'tzin ti'j tu'n sak pwak, ex ocx tk'o'n tuj tja Micaía. 5Attok jun lugar te c'ulbil tuj tja Micaía. Cub tbincha'n Micaía jun capiẍay in ajben cyu'n pal ex mastl tilbilal nno'c cydiosin xjal tuj cyja, ex oc tk'o'n jun tcy'ajal te pal. 6Tuj tk'ijlalil lu minti'tok rey cyxol aj Israel, ex teyle junjun in tbincha'ntok nok alcye ba'n tuj twitz. 7Tuj tnam Belén tuj tx'otx' cye aj Judá, attok jun cu'xun aj Leví nok in posadiyin. 8Aju cu'xun lu etz tuj tnam Belén tu'n t-xi' jyolte jun lugar jatum tu'n tnajan. Tej in bettok tuj tiwitz tx'otx' cye aj Efraín o pon tja Micaía. 9Xitzun tkanin Micaía te: —¿Jatum tzajniya? —Tzajni kine tuj Belén, aj Leví kine ex in chin jyone jun lugar jatum tu'n nnajane tuj, chi tcuba, xi ttzak'we'n. 10Xitzun tma'n Micaía te: —Tencja wuc'ile tu'ntzun tajbena weye te pal, ex tu'n toca ic tza'n aya nmane. Jacu txi nchjo'ne laj sak pwak tuj abk'i, ex jacu txi nk'o'ne t-xbaluna ex twaya, chi Micaía. Cubtzun tuj twitz aj Leví tu'n tcyaj ten najal tuc'il Micaía, ocxtzun tuja, ex oc ic tza'nx tcy'ajal Micaía. 12Octzun tk'o'n Micaía toclen cu'xun aj Leví te tpal, ex axtzun cyaj ten najal tuc'il. 13Tmatzun Micaía cyja': Ja'lo axix toc chin bel cy'iwla'ne tu'n Dios, porque at jun pal aj Leví wuc'ile.

will be added

X\