JUECES 15

1Eltzun k'ij, ex tuj tk'ijlalil tu'n tjaw chmet twitz triw, xi' Sansón betzalte t-xu'jil, ex xi ti'n jun tal chip tu'n t-xi tk'o'n te. Tejtzun tpon, xi tma'n cyja': —Chin oquexe que'yilte nxu'jile tuj tcwart. Atzunte tji' minti' ocx ttzokpi'n, 2nok o'cx xi tma'n te: —Cub nximane ka ya minti'tl taja ti'j, cyja'tzun xi nk'o'ne te jun tuc'ila, pero at jun titz'in txin mas mejor que'yin, ba'n tu'n tjaw ti'na te t-xu'jila te t-xel ttzic. 3Atzunte Sansón xi ttzak'we'n: —Ja'lo mya kine at wile ti'j ju mya ba'n cbantel wu'ne cyi'j aj Filistey. 4Xi'tzun Sansón ex e tzaj ttzyu'n ox syent wech, oc tc'alo'n cyje' te cabcaj cyten, tuc'ix jun ttxa'n tzaj oc tc'alo'n ttxa'n cyje' junjun moj wech. 5Octzun tkoptz'i'n k'ak' ti'j ttxa'n tzaj, aju c'alo'n ttxa'n cyje' wech, ex e je'xtzun ttzokpi'n tuj cycojbil aj Filistey jatum awa'n cyawal. Cyja'tzun tten baj tz'e'y triw tu'n Sansón, aju triw otok jaw chmo'n, tuc'ix triw na'nxtok tjaw chmo'n; tuc'ix tkan uva tz'e'y ex cyuc'ix ke tze' olivo. 6Tejtzun t-xi cykanin aj Filistey alcye otok binchante jlu, tzaj k'ma'n cye ka a Sansón otok binchante tu'n t-xelin tu'n aju otok tbincha tji' ti'j, aju aj Timnat, tu'nju otok tz'el k'i'n t-xu'jil ex otok txi k'o'n te jun tuc'il. Cyja'tzun e je'x aj Filistey ex cub cypatun ju xu'j tuc'ix tman. 7Xitzun tma'n Sansón cye: —Tu'nju ma cybinchaye mya ba'n lu, cxel nma'ne jun yol axix toc cyeye: Ax icx weye cbantel mya ba'n wu'ne cyi'je, mlay tzaj chewix nc'u'je ex maxi cxel ncoline ocxi t-xelin wu'ne cyi'je. 8Octzun tzokpaj cyi'j tuc'il ttx'u'jil ex nim xjal e cub tbyo'n. Te tibajxi jlu, xi' najal tuj toy' pic Etam. 9E tzajtzun aj Filistey, e cub ten tuj Judá, ex e ocx lak'e' mas tuj lugar Lehi, 10atzun cye aj Judá xi cykanin cye: —¿Tiku'n ma che ule k'ojlel ki'je? Atzun cye xi cytzak'we'n: —Ma ko tzaje tu'n ttzyet Sansón ku'ne, tu'ntzun t-xelin ku'ne ti'j aju ma tbincha ki'je. 11Tejtzun cybinte aj Judá jlu, e je'x ox mil xinak ma jatum ta' toy' pic tuj Etam, ex xi cyma'n te Sansón: —¿Baka minti' ba'n tu'na ka ake aj Filistey in che cawin kibaj? ¿Tiku'n ma tzaj ti'na mya ba'n lu kibaje? Atzunte Sansón xi ttzak'we'n: —Ic tza'n cye ma cybincha mya ba'n wi'je, ax icx weye ma nbinchaye mya ba'n cyi'j. 12Atzun cye xi cyma'n te Sansón: —Ma ko tzaje tu'n ttzyeta ku'ne ex tu'n t-xi kk'o'ne tuj cyk'ab aj Filistey. Atzunte Sansón xi ttzak'we'n: —Cymantze jun yol axix toc weye, ka mya ax keye che bel byonte weye. 13Atzun cye xi cytzak'we'n: —Mi'n, mlay cub kbyo'ne. Nok o'cx kaje tu'n ttzyeta ku'ne ex tu'n t-xi kk'o'ne tuj cyk'ab aj Filistey. Bajtzun c'alo'n Sansón cyu'n tu'n cabe sakbak ac'aj, ex etz cyi'n tuj toy' pic. 14Tejtzun cypon tuj lugar Lehi, e etztzun aj Filistey canul ti'j Sansón, ex e jaw sch'in tuc'il tzalajbil. Pero tzaj k'o'n tipumal Sansón tu'n T-xew Kman, ex e baj tlakin ke sakbak ate'c te c'albil tk'ab, ic e tenba tu'n ic tza'n jun nok' otok tz'e'y tu'n k'ak'. 15Jawtzun ti'n Sansón jun tbakil tjak' ttzi bur na'nxtok ttzkij, tcub tuj lugar ma chixin, ex tu'ntzunju bak lu e cub tbyo'n jun mil aj Filistey. 16Te tibajxitzun jlu tma: Tu'n tbakil tjak' ttzi' jun bur ma che cub jun ex ka cabe byuj xjal wu'ne; tu'n tbakil tjak' ttzi bur ma cub nbyo'ne jun mil xinak. 17Tbajlenxitzun tma'n ke yol lu, xi t-xo'n tbakil tjak' ttzi bur. Cyja'tzun tten oc tk'o'n tbi lugar lu Ramat-lehi. 18Tzajtzun nim txketle'n ti'j Sansón, ex tu'ntzun jlu oc ten cubsal twitz Kman ex xi tma'n te: Nman Dios, ma onina wi'je tu'n tcub cyi'j txkan xjal wu'ne, ex atzun ja'lo, ¿maj chin cyjel tk'o'na tu'n ncyime tu'n txketle'n, ex tu'n ncyime tuj cyk'ab ke xjal mya ocslal ti'ja? 19Jakettzun jun toy' jul tu'n Dios, aju at tuj lugar Lehi, ex atzun c'an Sansón ti'j a' in jatz tuj jul, ex o tna' oc mas tipun. Cyja'tzun En-hacore oc k'o'n tbi twi a', ex atx ja'lo tuj lugar Lehi. 20Winkin abk'i o ten Sansón te nejenel cyxol aj Israel tuj tk'ijlalil tej cycawin aj Filistey cyibaj.

will be added

X\