JUECES 12

1Baj cychmon cyib ke xinak tiyjil Efraín, e ic'x tuj nima Jordán tumlal lugar Zafón, ex xi cyma'n te Jefté: —¿Tiku'n xi'ya tu'n toc tzokpaja cyi'j aj Amón ex minti' o tmaya keye tu'n kxi'ye tuc'ila? Atzun ja'lo cbel kpatune tjaya tuc'ix aya tocx tuj. 2Atzunte Jefté xi ttzak'we'n: —Ke nxjalile ex akine cub ten jun k'oj kxole cyuc'il aj Amón, ex e tzaj ntxco'n keye, atzun cyeye minti' e tzaje colol ki'je. 3Tej tel nnic'e ti'j minti' tu'n cytzaje onil keye, xi woyin wibe tu'n ncyime ex in oc tzokpaje cyi'j aj Amón. Ate Kman e tzaj k'onte cye tuj nk'abe. ¿Tiku'ntzun ma che tzaje k'ojlel wi'je ja'lo? 4E bajtzun tchmo'n Jefté cycyakil ke xinak aj Galaad, ex oc ten k'ojlel cyi'j ke tiyjil Efraín ex o cub cyi'j tu'n. Ke tiyjil Efraín in cyma'ntok cye aj Galaad, akeju najl cyxol tx'otx' cye aj Efraín ex cye aj Manasés, che chi cyja': Cyeye nok o che ex oke kxole. 5Ke aj Galaad el cyi'n ke xajbil a' te nima Jordán cye ke tiyjil Efraín, ex octzun tpon jun aj Efraín in oktok ex in xi tkanin permis tu'n tic'x, atzun cye aj Galaad in xi cykanin te ka aj Efraín te; katzun ma tma ka mya aj Efraín, 6entons in xi cykanin te tu'n ttzaj tma'n ju yol ẍibolet. Ka ma tma sibolet, tu'nju minti' otok bant tu'n, in tzajtzun cytzyu'n ex axtzun in cub byo'n ttzi xajbil a' te nima Jordán. Tuj tk'ijlalil lu e cyim 42 mil xinak aj Efraín. 7Kak abk'i o ten Jefté te nejenel cye aj Israel. Tej tcyim, atzun cu'x maku'n tuj Galaad tuj tnam jatum o itz'j. 8Tcyimlenxi Jefté oc Ibzán te nejenel cye aj Israel, aju aj Belén. 9Ate Ibzán tzaj 30 tcy'ajal ex 30 tme'jel, ex cycyakil ke jlu e jaw tmojba'n cyuc'il ke xjal te junxitl tnam. Wuk abk'i o ten Ibzán te nejenel cye aj Israel, 10ex tej tcyim cu'x maku'n tuj Belén. 11Tcyimlenxi Ibzán, ate Elón aju tiyjil Zabulón oc te nejenel cye aj Israel. Laj abk'i o ten Elón te nejenel 12ex tej tcyim, cu'x maku'n tuj tnam Ajalón tuj cytx'otx' aj Zabulón. 13Tcyimlenxi Elón, ate Abdón aju tcy'ajal Hilel aju aj Piratón, oc te nejenel cye aj Israel, ex wajxak abk'i o ten te nejenel. 14Ate Abdón tzaj 40 tcy'ajal ex 30 tal tchman, ex teyle junjun cye tibaj bur in che bet. 15Tejtzun tcyim Abdón, cu'x maku'n tuj tnam Piratón aju at tuj cytx'otx' aj Efraín, tuj tiwitz tx'otx' cye aj Amalec.

will be added

X\