JUECES 11

1Ate Jefté aju aj Galaad cyuwxix tc'u'j tuj k'oj, tal jun xu'j jawni twitz cyuc'il xinak ex tcy'ajal jun xinak Galaad tbi. 2Pero tu'nju e tzaj txkantl tcy'ajal Galaad ti'j ju merxix t-xu'jil, cyja'tzun tej tch'iy k'a lu, ex lajo'n Jefté cyu'n, ex xi cyma'n te cyja': Teya minti' toclena ti'j ju etzbil te kman tu'nju part teya ttxu'. 3Tu'ntzun jlu el ok Jefté cywitz ke terman ex xi' najal tuj tx'otx' Tob. Atzun baj tchmo'n jun c'loj xjal minti' cyak'un ex e oc lpe' ti'j. 4Tbajlenxi nim k'ij, e pontzun aj Amón k'ojlel cyi'j aj Israel, 5ex atzun cye nejenel cye aj Galaad xi txocbaj Jefté cyu'n tuj tx'otx' Tob, 6ex xi cyma'n te cyja': —Tzaja kuc'ile, kajbile tu'n toca te nejenel keye tu'n kk'ojin cyi'j aj Amón. 7Atzunte Jefté xi ttzak'we'n: —¿Myapetzun o chin el cyic'une ex oc cyk'o'ne il wi'je tu'n wetze tuj tja nmane? ¿Tiku'ntzun ma che tzaje jyolte weye tej ma tzaj yajbil cyi'je? Chi Jefté. 8—Ax toc ma ko tzaje jyolte teya tu'nju ma tzaj yajbil ki'je. Kajbile tu'n ttzaja kuc'ile tu'n toc tena k'ojlel cyi'j aj Amón, ex tu'n toca te nejenel kxole kcyakile ako'ye najl tuj Galaad, che chi nejenel. 9—Ka cyajbile tu'n waj meltz'aje tu'n nk'ojine cyi'j aj Amón, ex ka ma che tzaj k'o'n tuj nk'abe tu'n Kman, ¿axpe toc chin oquel cyk'o'ne te nejenel cyeye? Chi Jefté xi ttzak'we'n. 10Atzun cye nejenel aj Galaad xi cytzak'we'n: —Ate Kman testiw ki'je, cbantel ku'ne tcyakilju ma tmaya. 11Xi'tzun Jefté cyuc'il, ex atzun cye tnam xjal oc cyk'o'n Jefté te nejenel cye ex te nejenel cye tuj k'oj. Tuj lugar Mizpa ax yol xi tma'n Jefté te Kman, akeju yol otok tma tnejel. 12Te tibajxi xi t-sama'n junjun sanjel tuc'il rey cye aj Amón tu'n t-xi cyma'n te cyja': ¿Ti ma nbinchaye ti'ja tu'nju in tzaja k'ojlel tuj ntanmiye? 13Atzunte rey cye aj Amón tzaj ttzak'we'n cye ke t-sanjel Jefté: Akeye aj Israel, atxix tej cyetze tuj Ejipt el cyi'ne ktx'otx'e, xi'ynix ttzi nima Arnón, ponin baj max ttzi nima Jaboc ex max ttzi nima Jordán. Ja'lotzun, cyk'o'n ajtze juntl maj tuj cheba. 14Atzunte Jefté xi t-sama'n txkantl t-sanjel tuc'il rey cye aj Amón, 15tu'n t-xi cyma'n tkanil lu te: Atzunju tzak'webl lu tu'n Jefté: Minti' o tz'el ki'ne cytx'otx' aj Moab ex mi cytx'otx' aj Amón, ako'ye aj Israel. 16Tej ketze tuj Ejipt, atzun o ic'e tuj tzkij tx'otx' tu'n kpone ttzi mar Cyak Que'yin ex o pone max tuj Cades. 17E tzajtzun ksama'ne junjun sanjel tuc'il rey cye aj Edom, kanilte te tu'n ttzaj tk'o'n ambil keye tu'n kexe tuj ttx'otx'; atzunte minti' tzaj tk'o'n ambil keye tu'n kexe tuj ttx'otx'. Ax icx xi kkanine te rey cye aj Moab, pero ax icx te minti' tzaj tk'o'n ambil keye tu'n kexe tuj ttx'otx'. Cyja'tzun ax o cyaj tene tuj Cades. 18Te tibajxi, o ic'tle tuj tzkij tx'otx' ex el kcumin kibe ti'j cytx'otx' aj Edom ex aj Moab, tejxi kpone tuj tjawitz k'ij te tx'otx' Moab, ex atzun o cub tene ma chixin taj jlajxi nima Arnón; minti' o ic'xe tuj, porque atzun xi'yni ke' cytx'otx' aj Moab. 19Xitzun ksama'ne junjun sanjel tuc'il Sehón aju rey cye aj Amorrey, aju najl tuj tnam Hesbón, xi kkanine tu'n ttzaj tk'o'n ambil keye tu'n kexe tuj ttx'otx' tu'ntzun kpone tuj keye ktx'otx'. 20Atzunte Sehón minti' o ke' tc'u'j ki'je ex minti' tzaj tk'o'n ambil keye tu'n kexe tuj ttx'otx'; nok o'cx e baj tchmo'n cycyakil ke t-soldad ex e oc tzokpaj k'ojlel ki'je tuj tnam Jahaza. 21Pero ate Kman aju Kdiose tzaj k'onte cye tuj kk'abe, ex cub ti'j Sehón ku'ne cyuc'ix cycyakil ke t-soldad, ex o oque te tajwil tcyakil cytx'otx' aj Amorrey tuj lugar lu. 22Tzyet tcyakil cytx'otx' aj Amorrey ku'ne, tzajx ke' ttzi nima Arnón ex ponin baj max ttzi nima Jaboc; tzajni ke'tl tuj tzkij tx'otx' ex ponin baj max ttzi nima Jordán. 23Atzun ja'lo, ¿maj tajtzuna tu'n kex tlajo'na tuj tx'otx' o tz'el ti'n Kman cye aj Amorrey ex o tzaj tk'o'n keye? 24Ka ma tzaj tk'o'n Quemos aju tdiosa ch'in tetzbila, c'oquel jlu te teya, ¿jec ax? Ax icxtzun keye ma tz'oc kk'o'ne te keye aju ma tzaj tk'o'n Kman te ketzbile. 25¿Maspetzun ba'na tuj twitza twitz Balac aju tcy'ajal Zipor ex rey cye aj Moab? Minti' tzaj te k'ojlel ki'je. 26Ma bant-xi ox syent abk'i kcublen tene najal tuj tnam Hesbón, tuj tnam Aroer, cyuj aldey ate' cyi'jele ex cyuj cycyakil tnam ate' ttzi'yile nima Arnón. ¿Tiku'n minti' in che k'ajte cyi'j ke tx'otx' lu tuj tcyakil tyemp ma jatz? 27Bajx nbincha'ye jun mya ba'n ti'ja. Aya in tbincha'na mya ba'n tu'nju nno'c tzokpaja ki'je. Ate Kman c'oquel te jwes, ex ate cxel binchante cyi'j aj Israel ex cyi'j aj Amón, chi tkanil xi t-sama'n Jefté. 28Atzunte rey cye aj Amón minti' xi tk'o'n twi' ti'j tkanil pon t-sama'n Jefté. 29Tzajtzun k'o'n tipumal Jefté tu'n T-xew Kman, ex baj tbetin Jefté tuj tcyakil tx'otx' Galaad, ex tuj tcyakil cytx'otx' tiyjil Manasés, ex ic' aj tuj Mizpa te Galaad tu'ntzun toc tzokpaj cyi'j aj Amón. 30Atzunte Jefté xi ttziyan jun yol te Kman cyja': Ka ma che tzaj tk'o'na aj Amón tuj nk'abe, 31cxel nk'o'ne teya te jun oyaj patun in cub nok alcye jun ma tz'etz nej tuj njaye c'molte weye oc wul meltz'aje tuj k'oj, chi Jefté. 32Xi'tzun Jefté tuj cytx'otx' aj Amón ex oc tzokpaj cyi'j ex e tzaj k'o'n tuj tk'ab tu'n Kman. 33Nim aj k'oj e cub tu'n Jefté ex e tzyet winkin tnam tu'n, cycubsa'n cyxol tnam Aroer, Minit ex Abel-keramim. Cyja'tzun tten cub cyi'j aj Amón cyu'n aj Israel. 34Tejtzun tul meltz'aj Jefté tuj tja tuj Mizpa, etz tme'jel c'molte te, in bixuntok ex in k'ajtza'ntok ti'j jun wik tal chnab panderetas tbi, ex o'cxcu junx tme'jel at, minti' jun tcy'ajal at ex minti' juntl tme'jel, 35cyja'tzun, tej tque'yinte Jefté jlu, el t-sbit'un t-xbalun ti'j te jun techal ti'j tbis, ex xi tma'n te txin: —Ay nme'jel, ma'xix jun ta'w ma tzaj ti'na wi'je. Aya ma tzaj k'inte jun mya ba'n wi'je, porque ma txi ntziyane jun yol te Kman ex il ti'j tu'n tjapun wu'ne. 36Atzunte txin xi ttzak'we'n: —Tat, binchama wi'je aju ma txi ttziyana te Kman, yaque ma onin Kman tuc'ila tu'n tcub cyi'j aj k'oj ti'ja, akeju aj Amón. 37Ex xi tma'ntl te tman: K'ontza cabe xjaw ambil weye tu'n nxi'ye betel cywi' ke witz cyuc'il ke txin wamiwoye, tu'n k-ok'e tu'nju chin cymele na'nxtok nmoje'ye. 38Xitzun tk'o'n Jefté cabe xjaw ambil te, ex tuj cabe xjaw lu o bet txin cywi' ke witz cyuc'il ke tamiw, in che ok'tok tu'nju attok tcyimel na'nxtok tmoje'. 39Tbajlenxi cabe xjaw, ajtz meltz'aj txin tu'n tul tuc'il tman, ex o japun tu'n Jefté aju yol otok txi ttziyan te Kman. O cyim tme'jel Jefté na'nxtok tlonte xinak. 40Cyja'tzun cyaj ten jun costumr cyxol aj Israel: Cyaje k'ij in che'x ke txin ok'el ti'j tme'jel Jefté tcyakil abk'i.

will be added

X\