JUECES 10

1Tcyimlenxitzun Abimelec at jun xinak tiyjil Isacar Tola tbi, tcy'ajal Fúa ex tal tchman Dodo, jaw sc'o'n tu'n Dios tu'n tcolon cyi'j aj Israel. Atzun najltok Tola tuj tnam Samir, tuj tiwitz tx'otx' cye aj Efraín. 2O cawin Tola cyibaj aj Israel 23 abk'i, ex tejtzun tcyim, cu'x maku'n tuj tnam Samir. 3Te tibajxi jaw sc'o'n Jair tu'n Dios, aju aj Galaad, ex 22 abk'i o cawin cyibaj aj Israel. 4Ate Jair attok 30 tcy'ajal, ex teyle junjun attok jun tbur ex in che chejin tibaj, ex attok jun tnam te junjun tuj tx'otx' Galaad. Akeju 30 tnam lu tnam te Jair cybi, ex ax cybi tocsa'n ja'lo. 5Tejtzun tcyim Jair, atzun cu'x maku'n tuj lugar Camón. 6Atzun cye aj Israel e oc ten juntl maj binchal mya ba'n twitz Kman, e oc ten c'ulul cywitz tilbilal Baal ex cywitz tilbilal Astarté, ax icx cywitz cydios aj Siria, cywitz cydios aj Sidón, cywitz cydios aj Moab, cywitz cydios aj Amón ex cywitz cydios aj Filistey. Cyaj cycolin Kman ex minti'tl e c'ulun twitz. 7Cyja'tzun tzaj tk'oj Kman cyi'j, ex e je'x tk'o'n tuj cyk'ab aj Filistey ex tuj cyk'ab aj Amón. 8Cycyakil aj Israel akeju najlke tuj Galaad jlajxi nima Jordán tuj cytx'otx' aj Amorrey, e yajlanjtz wajxaklaj abk'i cyuwxix wen cyu'n aj Filistey ex cyu'n aj Amón. 9Ax icx e jic'tz aj Amón tuj nima Jordán tu'n cyul k'ojlel cyi'j tiyjil Judá, cyi'j tiyjil Benjamín ex cyi'j tiyjil Efraín, cyja'tzun cyuwxix yajbil tzaj cyi'j aj Israel. 10E octzun ten aj Israel cubsal cywitz te Kman, ex xi cyma'n cyja': Kman Dios, ma ko binchane il twitza porque ma cyaj kcolina, ex ma ko c'ulune cywitz ke tilbilal Baal. 11Atzunte Kman tzaj ttzak'we'n: —Tej cycub yajla'ne cyu'n aj Ejipt, cyu'n aj Amorrey, cyu'n aj Amón, cyu'n aj Filistey, 12cyu'n aj Sidón, cyu'n aj Amalec ex cyu'n aj Madián, e oc tene cubsal cywitze weye ex e clete wu'ne. 13Masque icju, atzun cyeye ma chin cyaj cycoline ex ma che oc tene c'ulul cywitz junxitl dios; cyja'tzun mlay chin tzajtle clol cyeye. 14Cyxi'ye ex cykaninxe onbil cye keju dios ma jaw cysc'o'ne. E cycolin cyi'je tuj yajbil cyeye, chi Kman. 15Xitzun cytzak'we'n aj Israel te Kman: Ma ko binchane il twitza. Binchama ki'je nok alcye ba'n tuj twitza, pero binchama xtalbil ko tcloma ja'lo, che chi. 16Eltzun cyi'n aj Israel ke cydios, akeju cydios junxitl nasyon, ex e ajben juntl maj te Kman. Atzunte Kman tzaj ta'w tuj tanmi tu'nju cucxtok cyyajlanjtz aj Israel. 17Bajtzun cychmon cyib aj Amón tu'n cyk'ojin ex e cub ten tuj Galaad. Ax icx cye aj Israel baj cychmon cyib ex e cub ten tuj Mizpa. 18Atzun cye aj Israel akeju najlke tuj Galaad, cyuc'ix ke nejenel cyxol, e oc ten yolil cyxolx: Alcye jun ma cub nej kwitz tu'n tk'ojin cyi'j aj Amón, atzunju c'oquel te nejenel kxol kcyakil ako' najlko' tuj Galaad, che chi.

will be added

X\