Judas 1

1Akine Judas tmajen Jesucrist kine ex titz'in Jacobo kine. In xi ntz'ibane jlu cyeye, akeye ma che txconjtze tu'n Kman Dios, ex c'ujla'n keye tu'n, ex cwentin keye tu'n Jesucrist. 2Awt Kman Dios tzaj k'ak'an tc'u'j cyi'je ex tu'n tke'xix cyc'u'je, ex tu'n tten cyc'ujlalile nimxix. 3Akeye erman at nc'u'je cyi'je, nimxix o wajbeye tu'n t-xi ntz'ibane cyeye ti'j ju colbil ke kcyakil; pero ja'lo ilxix ti'j tu'n t-xi ntz'ibane cyeye ex tu'n t-xi nk'o'ne cynable tu'n toc tililxix cyu'ne tu'n mi'n tnaj kocslabl; aju yol ma kocsla, te jumajx ma tzaj tokxenan Dios ke, akeko' ocslal ko'. 4Porque at junjun xjal sbul ma tz'ocx cyk'on cyib cyxol ocslal; bi'x cyaj bant ti'j ojtxi tu'n tcub cysentens xjal lu, porque mya nimal Dios ke, in cyaj cycolin t-xtalbil Kdios, ex in xi cyk'on cyib tu'n cybinchante tcyakilju cyajbil, minti' cyjuc'bil cyib ex minti' cyaj ti'j tu'n cyten tjak' tcawbil Dios o'cxte Dios Tajaw Tcyakil, ex minti' cyaj ti'j tu'n cyten tjak' tcawbil Kajaw Jesucrist. 5Cyja'tzun wajbile tu'n ttzaj nna'ntle juntl maj cyeye, masque bi'majtl tcyakil jlu cyu'ne, e naj ke xjal aj Israel tu'n Kman, akeju minti' xi cyniman tyol, ex otok che clet tu'n nej tej cyetz ti'n tuj tx'otx' Ejipt. 6Ax icx jun c'loj anjel cyaj cyk'o'n cyoclen ex cyaj cycolin cyex cynajbil, cyja'tzun presin ke tu'n Dios, ex c'alo'n ke tu'n caden tuj klolj te jumajx, tzyu'n ke tu'n tcub cycastiw tuj tk'ijlalil jwisi tuj jun k'ij ma' toclen. 7Ic tza'n ke xjal tuj tnam Sodoma ex tuj tnam Gomorra cyuc'ix ke mastl tnam ti'jele, e yaẍin ex xi cyk'on cyib tuj achbil aju elni ti'j cwent, ex tzaj jun castiw cyibaj, e naj tu'n k'ak' te jumajx, tu'n cyoc te jun yec'bil cye cycyakil xjal, ic tza'n o baj cyi'j jun c'loj anjel tzaj jun castiw cyibaj. 8Icxtzun cyten ke xjal lu, mer ic tza'n in che witzcy'an, in baj cytz'ilsa'n cychibjal; cyc'i' tu'n cycub cawin tu'n Kman, ex in che yasun cyi'j keju at mas cyoclen tuj cya'j. 9Pero mya ic tten tmod Miguel aju nejenel cye anjel, porque tej tk'ojin Miguel tuc'il tajaw il e jaw cub tuc'il yol ti'j t-ximlal Moisés, minti' oc tnimarin tib Miguel tu'n toc ten yasul ti'j tajaw il, ex minti' cub t-sentens tu'n, nok o'cx tma: Awt Kman mayonte teya. 10Atzun ke xjal lu in che yolin mya ba'n ti'j ju minti' ojtzki'n cyu'n; ex atzunju cyachbil ojtzki'nxix cyu'n cytzajlenx, mas in che naj tu'n ic tza'n ke jil minti' cynabl. 11Bec'bil cywitz porque in cybincha'n ic tza'n te Caín o tbincha. Ex ma che el txalpuj ic tza'n te Balaam, nok tu'n tcnet cycambabl; ex ma che naj tu'nju in che k'ojin ti'j Dios ic tza'n te Coré. 12Ake jlu ic cyten ic tza'n jun tz'il cyxole, in tzaj cych'ixwiye cyu'n oc nno'c nintz wa'n cyu'ne; in che wa'n cyuc'ile minti' in tzaj ch'in cych'ixwi, ic cyten jlu ic tza'n ke pastor ẍne'l minti' in che oc cycwentin ke cyẍne'l, ex o'cx in che ximan cyi'jx tu'n toc cyc'a'chan cyib. Ic cyten jlu ic tza'n muj minti' a' tuj, nok jachak in pon k'i'n tu'n cyk'ik'; ic cyten ic tza'n jun tze' tzkij minti' t-xak ex minti' twitz; cyimni ke te jumajx ex bako'maj ke. 13Ic cyten ic tza'n mar in xtulk'in in k'ojl wen ex in cyaj tk'o'n swac, ic tten cybinchben xjal lu ic tza'n t-swaquil mar puro ch'ixbajil cybinchben. Ic cyten ic tza'n ke che'w in che txalpuje'; banimaj jun lugar cye xjal lu tu'n cyxi k'o'n tuj klolj puro kxopin te jumajx. 14O yolin Enoc cyi'j xjal lu, ax Dios tzaj k'mante te. Ate Enoc tal tchman Adán, tiyjil twukin c'loj xjal. Chi Enoc tma cyja': Lu tzul Kman cyuc'ix ke t-anjel xjan nimxix cyajlal. 15Tzul Kman k'ol jwisi cyibaj cycyakil ex tu'n tel tuj k'ancha'l cybinchben xjal mya nimal Dios ke ex mya ba'n cybinchben, ex tu'n tel tuj k'ancha'l cyyol ke aj il mya nimal Dios ke, akeju ma che yolin cyuw ti'j Kman, chi Enoc. 16Ke xjal lu nok in che wululun ti'j ju in baj, ex minti' jun ba'n nne'la tuj cywitz, o'cx at cygan ti'j cyex cyajbil. Nim in che yolin ti'j cynimbil cyib, mejor che xmoxin cyi'j xjal tu'n tcub cyi'j xjal cyu'n tu'ntzun cycambante jun ti'xti. 17Atzun cyeye erman at nc'u'je cyi'je, cyna'ntze ke yol cyaj cyma'n ke apostl te Kajaw Jesucrist ojtxi. 18Porque che chi apostl o cyma cyeye: Tuj mancbil tk'ijlalil che ul ke xmayil in cybincha'n cyex cyajbil mya ba'n, che chi apostl. 19Atzun ke jlu in che cub k'onte pabl tib cyxol xjal; o'cx toc cyximbetz ti'j ju te twitz tx'otx', minti' T-xew Dios tuj cyanmi. 20Atzun cyeye erman at nc'u'je cyi'je, cycyuwsam cyibe tuj cyocslable, aju cyocslable xjan, ex che na'ne Dios ic tza'n in tma'n Xewbaj Xjan. 21Ax che tencje tuj tc'ujlalil Dios; che ayone ti'j Kajaw Jesucrist, tu'n ttzaj k'ak'an tc'u'j cyi'je tu'n ttzaj tk'o'n cychwinklale te jumajx. 22At junjun in jawje' cyc'u'j; cycyuwsame cynabl. 23Ex cyi'metze junjuntl tuj k'ak' tu'n cyclet; ex k'ak'anx cyc'u'je cyi'j junjuntl, pero atwit cyxobile, ex atwit cycwente ti'j tu'n mi'n cytz'ilixe tu'n tajbil cychibjal xjal lu; ic tten jlu ic tza'n jun xbalun puro tz'il. 24Ate Dios at tipumal tu'n cyoc cwentine tu'n, tu'n mi'n cycub tz'ake, ex at tipumal tu'n cyxi k'i'ne tu'n, tu'n cytene twitz tuj t-spic'umal tuc'il nim tzalajbil ex minti' cypaltile. 25O'cxte Dios at tnabl, atzun Clol keju; nimanxwit ju tbi ex tu'n tten tchiylal tuj cywitz cycyakil, ex awt tu'n tcawin tibaj tcyakil, ex tenwt tipumal tibaj tcyakil, nok tu'n Kajaw Jesucrist, ojtxi ex ja'lo ex tuj tcyakil tabk'iyil te jumajx. Icxwitju.

will be added

X\