JOSUÉ 9

1Ake rey cye aj Hetey, cye aj Amorrey, cye aj Canaán, cye aj Ferezey, cye aj Hevey ex cye aj Jebusey o cybi aju otok baj. (Akeju rey lu, atzun najlke tumlal telex k'ij te nima Jordán, cywi' ke witz, tuj chk'ajlaj, tuj tcyakil mlaj tx'otx' te Nintz mar ex max ponin baj cytx'otx' t-xe witz Líbano.) 2O moje' cyyol cycyakil tu'n cyxi' k'ojlel ti'j Josué ex cyi'j aj Israel. 3Atzun cye aj Hevey akeju najlke tuj tnam Gabaón, tej cybinte aju otok tbincha Josué ti'j tnam Jericó ex ti'j tnam Hai, 4cub cyximan tu'n cyoc ten sbul ti'j Josué. Tzyettzun be cyu'n; oc cyk'o'n ttx'akan sac cyi'j ke cybur ex ke tz'u'm tcubil ta'l twitz uva ttx'akan ke ex xbukamaj ke; 5ax icx oc cyk'o'n cyxbalun ex cyxajab ttx'akan wen ex xbukamaj ke, ex aju cywa xi cyi'n tuj cybe tx'i'l wen ex otok jlet lan cyi'j. 6Tejtzun cypon tuj cycampament xjal tuj lugar Gilgal, xi cyma'n te Josué ex cye aj Israel: —Tzajni ko'ye tuj jun tx'otx' najchak. Cybinchame ti'j jun cyyole kuc'ile. 7Xitzun cytzak'we'n ke aj Israel cye aj Hevey: —Yajtzun ka ax najl keye nikayin ki'je, ¿tza'ntzun tten tu'n tbant ti'j jun yol ku'ne cyuc'ile? 8Atzun cye tzaj cyma'n te Josué: —Jacu ko oque te tmajena. Ex xi tkanin Josué cye: —¿Alcyetzun keye ex jatum tzajni keye? 9Atzun cye tzaj cytzak'we'n: —Najchak tzajni ko'ye wen nok tu'nju ba'nxix tbinx tkanil o kbiye ti'j Dios aju Tdiosa. O kbiye tcyakilju o tbincha tuj Ejipt, 10ex aju o tbincha cyi'j ke cabe rey cye aj Amorrey, akeju ate'tok jlajxi nima Jordán; ti'j Sehón aju rey te Hesbón, tuc'ix Og aju rey tuj tx'otx' Basán, aju najltok tuj tnam Astarot. 11Cyja'tzun, akeju nejenel keye ex keju najl tuj ktx'otx'e tzaj cyma'n keye: Cyi'nx cywaye tuj cybeye ex cyxi'ye jatum ate' ke aj Israel, ex cymanxe cye: Kaje ko oque te cymajene, ex kaje tu'n tcyaj bant ti'j jun cyyole kuc'ile, che chi tzaj cyma'n. 12Tej ketze jyolte cyeye, aju kwaye lu mek'mojxtok ta' tej ttzaj ki'ne, atzun ja'lo ma jlet lan ti'j ex puro tx'i'l ma tz'oc wen. 13Ax icx ke tz'u'm lu, ac'ajx ke tej cycu'x knojsa'ne tu'n ta'l twitz uva, atzun ja'lo ttx'akan ke. Ax icx ma che tenba ke kxbalune ex ke kxajbiye, ma che baj tu'n tlaj najchak ma ko tzaje, che chi xjal aj Gabaón. 14Atzun cye aj Israel xi cynic'be'n cywa aj Gabaón, pero minti' xi cykanin te Kman alcye tu'n cybinchante. 15Banttzun ti'j jun yol tu'n Josué cyuc'il, tu'n mi'n tten k'oj cyxol, ex xi ttziyan tu'n mi'n cycub tbyo'n; ax icx ke mastl nejenel cyxol aj Israel xi cytziyan tu'n tbant icju. 16Tbajlenxi ox k'ij o cybi aj Israel ka ake aj Gabaón ax najlke nikayin cytxlaj. 17E je'xtzun ke aj Israel jyolte cye aj Gabaón, ex tujxi toxin k'ij e pon cyuj ke tnam jatum ate' ke, ex atzun ke tnam jlu: Gabaón, Cafira, Beerot ex Quiriat-jearim. 18Ex minti' e cub byo'n ke cyu'n aj Israel, porque akeju nejenel cyxol otok txi cytziyan jun yol twitz Kman Dios tu'n mi'n tcub cybyo'n ke. Tu'ntzun jlu tzaj cyyol tnam xjal cyi'j ke nejenel ate' cyxol. 19Atzun cye nejenel xi cyma'n cye: —Ma txi ktziyane jun yol twitz Kman Dios tu'n mi'n cycub kbyo'ne. Cyja'tzun ja'lo mlay kbinchaye jun ti'xti mya ba'n cyi'j. 20Ba'n tu'n cycyaj ank'in ku'n, porque ka mi'n ma japun ku'n aju yol ma txi ktziyane, jaculo tzaj tk'oj Dios ki'j. 21Xi cyma'n ke nejenel cye aj Israel tu'n mi'n cycub byo'n, nok o'cx e oc k'o'n te ikal si' ex te ikal a' tu'n tajben cye cycyakil tnam xjal. Cyja'tzun o japun aju yol xi cytziyan ke nejenel. 22E tzajtzun ttxco'n Josué ke xjal aj Gabaón ex xi tkanin cye: —¿Tiku'n o ko cub cysbu'ne tu'nju o cymaye keye ka najchak otok che tzaje, ex axtok najl keye tzalu? 23Tu'ntzun jlu cbel cycastiwoye ex che oquele te majen te jumajx. Che tx'emile si' ex che ikale a' tu'n tajben tuj tja Ndiose. 24Atzun cye xi cytzak'we'n te Josué: —O kbinchaye icju porque tzaj nimxix kxobile cywitze; jaculo bant kcub cybyo'ne, ko chiye, porque o kbiye tkanil yol xi tma'n Kman aju Cydiose te Moisés aju tmajen, xi tma'n tu'n t-xi tk'o'n tcyakil tx'otx' lu te cyeye ex tu'n tcub cybyo'ne cycyakil xjal najl tzalu. 25Lu ko'ye ato'ye tuj cyk'abe; cybinchame ki'je nok alcye ba'n tuj cywitze, che chi. 26Cyja'tzun minti' xi tk'o'n Josué ambil cye aj Israel tu'n cynaj aj Gabaón cyu'n, 27pero e oc tk'o'n tu'n cytx'emin si' ex tu'n cyikan a' tu'n tajben cye tnam xjal, ex tu'n tajben ti'j ak'untl ttxlaj altar te Kman tuj lugar cjawil t-sc'o'n. Ex axtzun cyak'un aj Gabaón in bant ja'lo.

will be added

X\