1 Xi tma'n Kman te Josué cyja': Mi'n xoba ex mi'n tzaj baj tc'u'ja. K'inxa cycyakil ke t-soldadiya ex txi'ya k'ojlel ti'j tnam Hai, porque cxel nk'o'ne rey te tnam lu tuj tk'aba, cyuc'ix ke t-xjalil. Aju cytanmi tuc'ix cytx'otx' che oquel te cyeye. 2 Ic cbantel tu'na ti'j tnam Hai ex ti'j t-rey, ic tza'nx tbinchaya ti'j tnam Jericó ex ti'j t-rey; atzun ke ti'xti cyuc'ix cyalun xjal, ba'n tu'n toc te cyeye. Samanxa ke soldad tu'n cyten tuj ewaj ti'jxi tnam, chi Dios. 3 Banttzun tten Josué cyuc'il cycyakil ke t-soldad tu'n cyxi' k'ojlel ti'j tnam Hai. Jaw t-sc'o'n 30,000 xinak cyuw cyc'u'j tuj k'oj, ex konic'an e je'x t-sama'n, 4 ex xi tma'n cye: Chin cybintze, cyja' cyxi'ye ti'jxi tnam ex cyewanx cyibe nikayin ttxlaj; list che tene tu'ntzun cyoc tzokpaje ti'j. 5 Atzun weye cyuc'ix mastl xjal ko xel lak'e'ye ti'j tnam, ex octzun cyetz xjal te tnam lu tu'n cyoc tzokpaj ki'je, ko eleltzun oke cywitz ic tza'n baj jun maj. 6 Atzun cye che oquel lpe' ki'je oc kel oke ti'j tnam, porque oclo cyma: Ma che el ok juntl maj kwitz, che chilo. 7 Atzun cyeye bix che etz naje jatum cyewan cyibe ex cbel ti'j tnam cyu'ne, porque ate Kman Dios ctzajel k'onte cye tuj cyk'abe. 8 Ex oc ttzyet tnam cyu'ne, bix tz'oc cyk'o'ne tk'ak'al ic tza'nx ma tma Kman. Atzun orden lu ma txi nk'o'ne cyeye, chi Josué. 9 Xi tk'o'n Josué orden tu'n tcub be cyu'n; e je'xtzun ex xi cyewan cyib cyxol tnam Betel tuc'il Hai, tumlal telex k'ij te tnam Hai; atzunte Josué ax ex ak'bil te cyxol tnam xjal. 10 Tuj juntl k'ij, primxix jaw we' Josué ex ic' twitz cyi'j ke t-soldad, cubtzun nej cywitz junx cyuc'il ke cytijil xjal aj Israel, ex e je'xtzun tu'n cyoc tzokpaj ti'j tnam Hai. 11 Cycyakil ke xinak uc'in tu'n e pon lak'e' twitz tnam, atzun e cub ten tumlal tbank'ab k'ij te tnam, ex cyaj ten chk'ajlaj cyxol tuc'il tnam. 12 Otok txi tewan Josué jwe' mil xinak t-xol tnam Betel tuc'il tnam Hai, tumlal telex k'ij te tnam, 13 cyja'tzun, te cabe c'loj e ela ke soldad, jun c'loj xi cyewan cyib tumlal telex k'ij te tnam, ex juntl c'loj e cyaj ten cyuc'il tnam xjal tumlal tbank'ab k'ij te tnam. Atzunte Josué xi lak'e' max tuj tmij chk'ajlaj tuj konic'an lu. 14 Tejtzun ttil rey te tnam Hai jlu, jurattzun etz naj junx cyuc'il cycyakil ke t-soldad, tu'n cyk'ojin cyi'j aj Israel tuj lugar max tibaj chk'ajlaj ttzi nima Jordán, ex minti'tok ba'n cyu'n ka ate'tok txkantl aj Israel cyewan cyib ti'jxi tnam. 15 Atzunte Josué cyuc'ix ke xinak ate' tuc'il, o cybincha mer ic tza'n otok che el ok cywitz aj Hai, cyja' e je'x ok tuj be in xi' tuj tzkij tx'otx', ex nok tten cyu'n. 16 Atzun cye soldad ate' tuj tnam Hai, o cyc'am orden tu'n cyoc lpe' cyi'j aj Israel, ex tejtzun cyxi lpe' ti'j Josué o cyaj ten tnam o'cx te, minti' soldad tuj. 17 Misicyer jun xinak aj Hai ex aj Betel miwt etz tu'n toc lpe' cyi'j aj Israel, ex tu'nju cyxilen lpe' cyi'j aj Israel, cyaj cate' tpwertil tnam cyu'n. 18 Tzajtzun tma'n Kman te Josué: Aju tlansa tzyu'n tu'n tk'aba chux yec'unxa tumlal tnam Hai, porque cxel nk'o'ne tuj tk'aba. Xitzun tyec'un Josué tlans aju tzyu'n tu'n tk'ab, tumlal tnam Hai, tu'ntzun ttzyet k'oj. 19 Jurattzun e etz keju cyewantok cyib, e je'x kelan jatum ta' tnam, cub ti'j cyu'n ex oc cyk'o'n tk'ak'al. 20 Tejtzun tajtz cyque'yin ke xinak aj Hai cyi'jxi, o cyil in jawtok sib tuj cytanmi. Ex ya minti'tl jatum tu'n cycolpaj, mi tuj jun pac' ex mi tuj juntl pac', porque ke aj Israel, akeju otok che je'x ok tuj tzkij tx'otx', e ajtz meltz'aj tu'n cyoc tzokpaj cyi'j. 21 Tejtzun ttil Josué ex cycyakil aj Israel otok cub ti'j tnam cyu'n keju cyewantok cyib ex otok tz'oc cyk'o'n tk'ak'al, e ajtztzun meltz'aj ex e oc tzokpaj cyi'j aj Hai. 22 Ex atzun keju otok tzyet tnam cyu'n, e etz tuj tnam tu'n cyoc tzokpaj cyi'j aj Hai; cyja'tzun, ke xjal aj Hai e cyaj ten cyxol cycabil c'loj aj Israel. E octzun tzokpaj ke aj Israel cyi'j aj Hai tejxi cycub baj cybyo'n cycyakil. 23 Nok o'cx aju rey te tnam Hai cyaj ank'in cyu'n, tzaj cytzyu'n ex xi cyi'n twitz Josué. 24 Tbajlenxitzun cybyo'n aj Israel cycyakil xjal aj Hai, akeju e je'x lpe' cyi'j tuj cojbil ex tuj tzkij tx'otx' e ajtzun meltz'aj juntl maj tuj tnam Hai, ex cub cybyo'n cycyakil keju ate'x tuj tnam. 25 Tuj k'ij lu e cyim cablaj mil xjal aj Hai, xinak ex xu'j, 26 porque cucxtok t-xi tyec'un Josué tlans cyi'j aj Hai, tu'n cyoc tzokpaj aj Israel cyi'j ocxi cycub baj cycyakil cyu'n. 27 Atzun ke alumaj oc te cye aj Israel, tuc'ix tcyakil ti'xti at tuj tnam, ic tza'nx otok tzaj tma'n Kman te Josué. 28 Cub tpatun Josué tnam Hai ex nok ttx'akan cyaj tk'o'n, tu'n cucx tcyaj ten te jumajx icju, ex ttenx ja'lo. 29 Atzunte rey te tnam Hai jaw yoban tu'n Josué ti'j jun tze' tu'n tten enter jun k'ij; ex tejtzun tex k'ij, xi tma'n Josué tu'n tcu'tz k'i'n t-ximlal rey twi tze', tu'n tcub k'o'n ttzi tpwertil tnam, ex tu'n tic'x buyba'n abj tibaj. Ex aju byuj abj lu cucx atx ja'lo. 30 Twi witz Ebal jaw tbincha'n Josué jun altar te Kman Dios, 31 ic tza'nx otok txi tma'n Moisés aju tmajen Kman cye aj Israel, jaw tbincha'n altar cyu'n abj mya xpe'lin cyi'j, ic tza'nx tz'ibamaj tuj tley Moisés. Xitzun cyk'o'n aj Israel ke oyaj patun in che cub tibaj altar, ex xi cyk'o'n ke chojbil te mojbabl tibil. 32 Cyi'jx ke abj te altar, ex cywitzx aj Israel, oc ttz'iban Josué aju tley Moisés otok cyaj tk'o'n cye. 33 Cycyakiltzun tnam xjal, tza'nx ke aj Israel, ax icx ke stranjer xjal, ex cycyakil cytijil xjal cyuc'ix keju at cyoclen ex ke jwes, e cub ten ke te tcabil pac' ttxlaj cax c'ubl tley Dios, cywitz ke pal aj Leví akeju k'ilte cax, tu'ntzun cycub cy'iwla'n tnam xjal aj Israel cyu'n ke pal; mij xjal e oc ten ti'j tc'u'j tal witz Gerizim, atzun mijtl e oc ten ti'j tc'u'j tal witz Ebal, ic tza'nx otok tma Moisés aju tmajen Kman. 34 Te tibajxi jaw t-sch'i'n Josué teyle junjun yol tz'iban tuj libro te ley, tza'nx ke yol in che yolin cyi'j cy'iwbil, ax icx ke yol in che yolin cyi'j mya ba'n tu'n ttzaj. 35 Minti' jun yol aju cyaj tma'n Moisés miwt jaw t-sch'i'n Josué cywitz cycyakil tnam xjal aj Israel, ex ajun ke xu'j e ten, cyuc'ix ke c'wa'l ex ke stranjer xjal ax najl cyxol.
