JOSUÉ 7

1Attok jun xinak cyxol tiyjil Judá Acán tbi, tcy'ajal Carmi, tal tchman Zabdi ex ttxca tchman Zera tzaj ti'n junjun ti'xti aju otok tma Dios bi'x tu'n tnaj, ex tu'n tlaj jlu cycyakil aj Israel e oc te at cyil twitz Kman. Cyja'tzun tzaj nimxix tk'oj Kman cyi'j aj Israel. 2Xi t-sama'n Josué junjun xinak tuj tnam Jericó tu'n cypon tuj tnam Hai, aju tcub tuj tjawitz k'ij te Betel, nikayin ttxlaj tnam Bet-avén, tu'n tbaj cyque'yin lugar. E je'xtzun ke xinak ex baj cyque'yin tnam Hai, 3ex tej cyul meltz'aj xi cyma'n te Josué: Mya il ti'j tu'n cyxi' cycyakil xjal tu'n cyoc tzokpaj ti'j tnam Hai, cabal ka ma txi' cab ex ka ox mil xinak tu'n ttzyet tnam lu. Mi'n txi t-sama'na cycyakil tnam xjal porque nic'xi cybaj xjal ate' tuj tnam lu, che chi. 4Cyja'tzun, balo ox mil xinak aj Israel xi' tu'n cyoc tzokpaj ti'j tnam Hai, pero ake cub cyi'j cyu'n ke xjal te tnam Hai ex e bjel ok ke cyu'n; 5cub cybyo'n balo 36 aj Israel ex e oc lpe'tl cyi'j mastl, tzyet-x max ttzi tpwertil tnam tejxi cypon max tuj lugar Sebarim tbi, ex tuj be in cu'tz cubl atzun cub cyi'j cyu'n. Tu'ntzun jlu tzaj baj cyc'u'j aj Israel ex el cyipun. 6Atzunte Josué cyuc'ix ke cytijil xjal aj Israel, el cysbit'un cyxbalun cyi'j ex jax cyk'o'n kuk tuj cywi' te jun techal cybis, ex e cubtzun ẍmeje' twitz cax c'ubl tley Dios tejxi tpon tacl tibaj cywitz twitz tx'otx', ex cucx cyten icju tejxi toc kax. 7Atzunte Josué xi tma'n cyja': —Nman Dios, ¿tiku'n tzaj tma'na tu'n cyic'tz tnam xjal tuj nima Jordán? Nokpetzun k'ol kibe tuj cyk'ab aj Amorrey ma ko ic'tze tu'n knaje cyu'n. Maslo ba'n nokwit ax xko cyaj tene jlajxi nima Jordán. 8Nman Dios, ¿ti cbantel wu'ne ja'lo tu'nju ma che el ok aj Israel cywitz aj k'oj cyi'j? 9Oc cybinte ke xjal aj Canaán jlu, ex oc cybinte cycyakil keju najl tuj lugar lu aju ma baj cyi'j aj Israel, che oquel tzokpaj cycyakil ki'je, milo jun keye cyjel ank'in ex mlaylo ko tzaj na'ntle. ¿Titzun cbantel tu'na ti'j tbiya ma'xix t-xilen? Chi Josué. 10Tzajtzun tma'n Kman te Josué: —We'ctza, ¿ti nbaj teya nok mutzl tcuba twitz tx'otx'? 11Ma che binchan aj Israel il, ex minti' ma japun cyu'n aju yol cyaj bant ti'j wu'ne cyuc'il. Ma tzaj cyi'n junjun ti'xti attok tu'n cynaj te jumajx, ma tzaj cyelk'a'n, ma che nic'an yol ex ma tz'ocx cyewan cyxol ke ti'xti at cye. 12Tu'ntzun jlu mlay che cub we' aj Israel cywitz aj k'oj cyi'j, nok in che el ok cywitz aj k'oj, ex ja'lotzun ax ke aj Israel ba'n tu'n cynaj. Ka mi'n ma naj cyu'ne aju xi nma'ne cyeye tu'n bi'x tnaj, mlay chin tentle cyuc'ile. 13We'ctza ex k'manxa cye tnam xjal tu'n tel cypa'n cyib ti'j tcyakil mya ba'n. K'manxa cye tu'n tbant cyten tu'n cyul yec'ul cyib nwitze nchi'j, porque akine Cyman ex Cydios aj Israel in chin k'mante jlu cye: Akeye aj Israel ma tzaj cyi'ne aju attok tu'n tnaj te jumajx, ex ka mi'n ma naj cyu'ne, ex ka mi'n ma tz'ex cyi'ne cyxole, mlay che we'ye cywitz aj k'oj cyi'je. 14Bix che ule nchi'j yec'ul cyibe cycyakile tuj c'lojin cytene ic tza'nx cyiyjile, ex aju c'loj cyiyjile c'oquel nch'icune, teyletzun te junjun cpol tyec'un keju at cyxilen cyuc'il, ex aju c'oquel nch'icune, teyletzun te junjun cpol tyec'un ke xinak ate' tuj tja. 15Ex atzunju k'ilte te aju attok tu'n tnaj, cbel patit cyuc'ix ke tc'wa'l ex tuc'ix tcyakilju at te, tu'nju ma tbincha jun mya ba'n cyi'j aj Israel, ex minti' ma japun tu'n aju yol cyaj bant ti'j wu'ne cyuc'il, chi Dios. 16Tuj juntl k'ij primxix jaw we' Josué, ex xi tma'n tu'n cypon ke xjal yec'ul cyib tuj c'lojin ic tza'nx cyiyjil. Atzunte Kman oc tch'icun ju c'loj tiyjil Judá. 17Xitzun tma'n Josué tu'n cypon teyle junjun c'loj tiyjil Judá, ex atzunju c'loj tiyjil Zera oc ch'icun. Cyxoltzun ke c'loj tiyjil Zera oc ch'icun Zabdi cyuc'ix keju at t-xilen tuc'il. 18Tejtzun cypon lak'e' teyle junjun xinak at cyxilen tuc'il Zabdi, oc ch'icun Acán aju tcy'ajal Carmi, tal tchman Zabdi, ttxca tchman Zera ex tiyjil Judá te. 19Xitzun tma'n Josué te Acán: —Aya ncy'ajal, nimsa'nctza tbi Kman aju Cydios aj Israel ex k'onxa nimbil te. K'mantza weye aju ma tbinchaya. Mi'n cub tewana nwitze. 20Atzunte Acán xi ttzak'we'n: —Ax toc cxel nma'ne ma chin binchane il twitz Kman aju Cydios aj Israel, ex atzun jlu ma nbinchaye: 21Cyxol ke ti'xti e etz ki'ne tuj tnam Jericó, o wile jun tbanil xbalun tzajni tuj Babilonia, tuc'ix cab syent sak pwak ex jun piẍ k'an pwak mas te jun libr talil. Tzaj nganiye cyi'j ke jlu, ex e cyaj wi'ne, o che cu'x nmaku'ne jatum tcubsa'n njaye, xbalun ja, ex aju pwak o cu'x nk'o'ne max t-xe'pun, chi Acán. 22Xitzun t-sama'n Josué junjun xinak que'yilte tuj tja Acán, ex o cnet cyu'n tcyakil aju ewantok ma chixin, tuc'ix sak pwak tcu'x max t-xe'pun. 23Tzajtzun cyi'n ex pon cyi'n twitz Josué ex cywitz aj Israel, ex cubtzun cyk'o'n twitz Kman. 24Xitzun k'i'n Acán tuj chk'ajlaj Acor tbi, junx tuc'il sak pwak ex xbalun, tuc'ix jun piẍ k'an pwak, cyuc'ix ke tcy'ajal ex ke tme'jel, cyuc'ix ke twacẍ, ke tbur, ke t-ẍne'l ex ju tja, xbalun ja, tuc'ix tcyakilju at te. 25Xitzun tma'n Josué te: —¿Tiku'n ma tzaj ti'na mya ba'n kibaje? Ja'lotzun, tu'nx Kman cbel tz'ak mya ba'n tibaja, aju ma tzaj ti'na kibaje. Tej t-xi tma'n Josué icju, cycyakiltzun aj Israel e cub byonte te Acán tu'n abj, cyuc'ix ke tc'wa'l ex tcyakilju at te, ex cub cypatun. 26Cyja'tzun o chewix tk'oj Kman cyi'j aj Israel. Te tibajxi cub cyk'o'n jun byuj abj cyibaj Acán, ex cucx ate' ke abj ja'lo, ex tu'ntzun jlu ax tbi lugar lu tocsa'n ja'lo, chk'ajlaj te Acor.

will be added

X\