JOSUÉ 6

1Otok che lamet ke tpwertil tnam Jericó tu'n cyclet xjal tuj cyk'ab aj Israel; mi jun xjal jacu bant tu'n tocx ex mi tu'n tetz tuj tnam. 2Atzunte Kman tzaj tma'n te Josué: Ma che'x nk'o'ne ke xjal aj Jericó tuj cyk'abe, tuc'ix cyrey ex ke cysoldad, tu'n tcub cyi'j cyu'ne. 3Ba'n tu'n cyk'on soldad jun welt ti'jele tnam jun maj tuj jun k'ij ocxi tjapun kak k'ij. 4Wuk pal che bel nej twitz cax c'ubl nleye, ex teylex te junjun cxel ti'n jun tcach ẍne'l te chun. Tujtzun twukin k'ij, wuk maj che k'ole welt ti'j tnam, acux in che k'ajtzan ke pal ti'j tcach ẍne'l. 5Octzun cybinteye tk'ajk'ajel twi chun mas nim tuj, bix che jawil sch'i'n cycyakil tnam xjal tu'n tcyakil cyipun, ex aju muro te tnam cbel xitj. Teylextzun te junjun xinak jikun tz'ocx tuj tnam, chi Kman. 6E tzajtzun ttxco'n Josué ke pal ex xi tma'n cye cyja': Cyi'nxe cax c'ubl tley Kman, ex wuk pal cbel nej twitz cax cyuc'ix ke chun tcach ẍne'l k'i'n cyu'ne. 7Ax icx xi tma'n Josué cye xjal: Cyxi'ye ex che k'one welt ti'jele tnam, atzun ke xinak banin cyten tu'n cyk'ojin, e cycub nej twitz cax c'ubl tley Kman, chi Josué. 8Tcyakil o bant cyu'n ic tza'n o tma Josué. Wuk pal e cub nej twitz cax c'ubl tley Kman, nno'ctok wuk chun cyu'n ex lepchix t-xi' cax cyi'j. 9Ke xinak banin cyten tu'n cyk'ojin, nejni ke cywitz ke pal, atzun ke mastl xjal lepchix cyxi' ti'j, acux in k'ajt chun cyuw wen cyu'n pal. 10Ex xi tma'n Josué cye cycyakil xjal cyja': Mi'n che jaw sch'ine, mi'n che k'ajte ex mi'n cye yoline. Maxi che jawil sch'ine ocxi t-xi nma'ne cyeye. 11Xi tma'n Josué tu'n tic' k'i'n jun welt cax c'ubl tley Kman ti'jele tnam. Te tibajxi jlu e aj tuj campament, ex axtzun ja'wil ak'bil cye. 12Te prim tuj juntl k'ij jaw we' Josué, ex atzun cye pal xi cyi'n cax c'ubl tley Kman. 13Wuk pal nejni twitz cax c'ubl tley Kman minti' e k'ajen tu'n cybet, ex minti' k'ajen tu'n cyk'ajt tcach ẍne'l cyu'n. Ke xinak banin cyten tu'n cyk'ojin, nejni ke cywitz, atzun juntl c'loj e tzaj bet ma ti'jxi cax, acux in che k'ajt ke chun wen cyu'n ke pal. 14Tuj juntl k'ij e ic' bet juntl welt ti'jele tnam ex e ajtl tuj campament. Ex iclex o bant cyu'n tuj kak k'ij. 15Tujtzun twukin k'ij e jaw we' primxix wen tu'n cyic' bet ti'jele tnam, ic tza'n otok bant cyu'n nej, pero tuj k'ij lu, wuk maj e k'on welt ti'jele tnam. 16Tejtzun toc cyk'ajtza'n pal chun twukin maj, xi tma'n Josué cye xjal: Cyjaw sch'ine cyuw wen, porque ma tzaj tk'o'n Kman tnam lu cyeye tu'n tcub ti'j cyu'ne. 17Te jumajx cnajel tnam lu, tuc'ix tcyakilju at tuj, ic tza'n jun chojbil te Kman. O'cxte xu'j Rahab, aju jawni twitz cyuc'il xinak, mi'n naj cyuc'ix cycyakil keju ate' tuj tja, porque e cub tewan ke xjal e tzaj ksama'n que'yilte tnam lu. 18Atzun cyeye, mi'n tz'oc cymaco'ne jun ti'xti at tuj tnam lu, ex mi'n txi cyi'ne, porque tcyakil il ti'j tu'n tnaj te jumajx ic tza'n jun chojbil te Kman; katzun ma txi cyi'ne, jaculo tzaj castiw cyibaj enter tnam xjal aj Israel ex jacu tzaj mya ba'n cyibaje. 19Tcyakil k'an pwak ex sak pwak, tcyakil ti'xti k'an c'uxbil ttx'otx'il ex mastl c'uxbil, cxel k'ot te Kman ex cxel c'u't cyxol ke tk'inumabl, chi Josué cye xjal. 20E jawtzun sch'in xjal cyuc'ix ke chun in che k'ajt cyu'n pal. Tej cybinte aj Israel tk'ajk'ajel cywi chun, e oc ten sch'il ex jaw tk'ajk'ajel cywi' cyuwxix wen, atzunju muro te tnam cub tilj. Teylex te junjun xinak, jikun ocx tuj tnam ex cub ti'j cyu'n. 21E cubtzun byo'n tu'n spad ke xinak aj Jericó, cyuc'ix ke xu'j, ke cu'xun, cyuc'ix ke tij xjal, ax icx ke wacẍ, ke ẍne'l ex ke bur. Cycyakil e naj cyu'n te jumajx, te jun chojbil te Kman. 22Xitzun tma'n Josué cye ke cabe xinak akeju otok che ul aj que'yilte tnam: Cyxi'ye tja xu'j jawni twitz cyuc'il xinak, ex cyi'metze ma chixin, cyuc'ix cycyakil keju ate' tuc'il, ic tza'n xi cytziyane te, chi Josué. 23E ocxtzun ex etz cyi'n aju xu'j Rahab, tuc'ix tman ex ttxu', cyuc'ix ke terman ex cycyakil keju at cyxilen cyuc'il, ex e je'x cyi'n tu'n cyten tuj jun lugar segur ttxlaj cycampament aj Israel. 24Octzun cyk'o'n aj Israel tk'ak'al tnam tuc'ix tcyakilju at tuj. O'cxcu sak pwak, k'an pwak, ex junjun ti'xti k'an c'uxbil cytx'otx'il ex mastl ti'xti c'uxbil ttx'otx'il, etz cyi'n ex xi cyc'u'n tuj c'ubl k'inumabl tuj tja Kman. 25Atzunte xu'j Rahab aju jawni twitz cyuc'il xinak, cyuc'ix keju ate' tuj tja, e cyaj tclo'n Josué tu'n cyank'in tu'nju e cub tewan ke xjal e pon t-sama'n Josué que'yilte tnam Jericó. Atxixtzun tcyaj ank'in Rahab cyxol aj Israel, ex lu atx ja'lo. 26Xitzun tcyuwsa'n Josué jun yol cyja': Tzajxwit tcastiw xjal tu'n Kman, alcyeju ma tz'oc ten ak'nal tu'n tjaw binchet juntl maj tnam Jericó. Oc tcub ke' simyent tu'n, bi'xwit cyim nej tcy'ajal, ex oc cyoc tk'o'n ke tlamel tnam, bi'xwit cyim mancbil tcy'ajal, chi Josué. 27O tz'onin Kman ti'j Josué, ex aju tkanil ti'j pon baj tuj tcyakil lugar.

will be added

X\