JOSUÉ 5

1Cycyakil ke rey cye aj Amorrey, akeju najlke ttxlaj nima Jordán tuj telex k'ij, ex ke rey cye aj Canaán, akeju ate' nikayin ttzi Nintz mar, tej cybinte tza'n tten otok tz'aj tzkij nima Jordán tu'n Kman tej matok in che ic'x ke aj Israel tuj, bi'x tzaj baj cyc'u'j ex minti' cynimarin cyib tu'n cyoc tzokpaj k'ojlel cyi'j aj Israel. 2Tujtzun tk'ijlalil lu xi tma'n Kman te Josué cyja': Binchan baja junjun cchil abj ke, ex sircunsidarin baja juntl maj ke aj Israel. 3E banttzun ke cchil tu'n Josué ex e baj t-sircunsidarin ke xinak aj Israel twi witz Aralot. 4E baj t-sircunsidarin cycyakil xinak, porque akeju matok k'i'n cyipun tej cyetz tuj Ejipt otok che baj cyim tuj be tuj lugar tzkij tx'otx'. 5Akeju e je'tz tuj Ejipt, cycyakil otok che baj sircunsidarit, pero akeju e itz'j tuj be te tibajxi tuj lugar tzkij tx'otx', na'nxtok cybaj sircunsidarin. 6Tu'nju e bet aj Israel 40 abk'i tuj tzkij tx'otx', cyja'tzun cycyakil xinak k'i'n cyipun tej cyetz tuj Ejipt otok che baj cyim, tu'nju minti' xi cyniman tyol Kman. Cyja'tzun xi tma'n Kman jun yol axix toc, tu'n mi'n cyocx ke xjal lu tuj tx'otx' aju otok tzaj ttziyan cye cyxe'chel tu'n ttzaj tk'o'n cye aj Israel, aju tx'otx' lu k'inun tx'otx'xix ex tbanilxix. 7Cyja'tzun e baj t-sircunsidarin Josué cycy'ajal ke xinak e cyim tuj tzkij tx'otx', akeju otok che oc tk'o'n Kman te cyxel cyman, porque na'nxtok cysircunsidarit te tjak'xi tu'nju ate'tok tuj cybe. 8Tejtzun cybaj sircunsidarit cycyakil, e cyaj ten tuj campament tejxi cybanix. 9Xitzun tma'n Kman te Josué cyja': Tu'nju sircunsisyón lu ma tz'el wi'ne cych'ixwiye, aju otok tzaj cyu'n ke aj Ejipt, chi Dios. Cyja'tzun, ax tbi lugar toc ja'lo, Gilgal. 10Atzun e cub ten aj Israel tuj lugar Gilgal, ex tuj cyajlaj tajlal xjaw te kale, cub cyic'sa'n Xjan K'ij tuj chk'ajlaj tcub ttxlaj Jericó. 11Tuj juntl k'ij e wa'n pan minti' t-samel tuj, e wa'n triw tx'ilsamaj ex e wa'n ti'j twitz awal in tzaj tk'o'n tx'otx' Canaán, 12ex tujtzun juntl k'ij ya minti'tl tzaj tk'o'n Dios maná. Cyja'tzun, tuj abk'i lu e wa'n ke aj Israel ti'j twitz cyawal xjal aj Canaán. 13At jun k'ij tej attok Josué nikayin ttxlaj tnam Jericó o til lu jun xinak wa'l tcub twitz, tuc'ix jun spad k'i'n tu'n. Xi lak'e' Josué ex xi tkanin te: —¿Apeya kuc'ile ex ka aj k'oja ki'je? Xi ttzak'we'n xinak: 14—Mya tuc'il jun c'loj ex mya tuc'il juntl c'loj. Ma chin ule tzalu, akine nejenel cye t-soldad Kman Dios, chi xinak. Cubtzun ẍmeje' Josué tejxi tpon tacl tibaj twitz twitz tx'otx', ex xi tkanin te: —Tat, ¿ti ctzajel tma'na weye, akine tmajena? 15Atzunte nejenel cye t-soldad Kman tzaj ttzak'we'n: —K'imel t-xajbiya porque aju lugar jatum tcuba, xjante. Atzunte Josué xi tniman.

will be added

X\