JOSUÉ 3

1Jaw we' Josué primxix wen ex cub be tu'n cyuc'ix cycyakil aj Israel, tu'n cyic' tuj lugar Sitim; e pon ttzi nima Jordán, ex atzun e cub ten na'nxtok cyic'x tuj nima. 2Tbajlenxitzun ox k'ij, akeju nejenel cye aj Israel e je'x cyxol xjal, 3ex xi cyma'n cye cyja': Oc tcyile oc tic' k'i'n cax c'ubl tley Dios tjax twi cysemil ke pal aj Leví, cyetze jatum ate'ye ex che lpeque ti'j. 4Atzun c'elel cynic'e ti'j alcye be tu'n t-xi cyi'ne, porque mi jun cyeye ojtzki'n be lu tu'n. Pero mi'n che oc lpe'ye nikayin ti'j, najchakyin che'x lpe'ye ti'j, balo 40 ech cyxole tu'n tcyaj ten. 5Atzunte Josué xi tma'n cye: Cybincham cytene twitz Dios, porque nchi'j che bant ke binchben ma'xix cyxilen tu'n; cywitzxe che bantel. 6Ax icx xi tma'n cye pal: Cyi'nxe cax c'ubl tley Dios ex che nejcuye cywitz xjal tu'n cyic'xe tuj nima. E cubtzun nej ke pal tuc'il cax. 7Atzunte Kman tzaj tma'n te Josué: Texju ja'lo c'oquel nk'o'ne mastl toclena cywitzx cycyakil aj Israel, tu'ntzun toc cyque'yin ka atine tuc'ila ic tza'n in tene tuc'il Moisés. 8Atzun teya, k'manxa cye pal akeju ikalte cax c'ubl nleye, oc cypon ttzi nima Jordán ax che cub we' tuj nima. 9Xitzun tma'n Josué cye aj Israel: Cytzaje ex cybintze aju in tma'n Kman Dios. 10Atzun techal jlu tu'n tel cynic'e ti'j ka ate Dios itz' at cyxole, ex cywitzxe che elex tlajo'n ke aj Canaán, ke aj Hetey, ke aj Hevey, ke aj Ferezey, ke aj Gergesey, ke aj Amorrey ex ke aj Jebusey. 11Cyque'yinxe, c'ic'ex nej cywitze tuj nima Jordán aju cax c'ubl tley Dios aju Tajaw Tcyakil twitz tx'otx'. 12Cyja'tzun cysc'on jawe cablaj xinak, jun cyxol teyle junjun c'loj cyiyjil aj Israel. 13Oc tcu'x cyk'o'n cykan pal tuj nima, akeju ikalte cax c'ubl tley Kman aju Tajaw Tcyakil twitz tx'otx', bi'x cbel tpa'n tib nima; aju a' cyja' tcu'tz cwebel tbet ex junx cbel tchmon tib, chi Josué. 14E etztzun ke aj Israel tuj cyja xbalun tu'n cyic'x tuj nima, ex nejni ke pal cywitz tuc'il ju cax c'ubl tley Dios k'i'n cyu'n. 15Aju nima Jordán najchak in pon kojl tuj tyemp oc in jaw chmet twitz awal. Ex tej matok in che ic'x nikayin ttzi nima, ex tej tac' cykan pal tu'n a' in bet nikayin ttzi a', 16entons aju a' cyja' tcu'tz o we' tbet, ex junx cub tchmon tib max najchak tibaj tnam Adam aju tnam tcub nikayin ttxlaj tnam Saretán. Atzunju a' cyja' tcu'x tu'n tpon ttzi mar at nim atz'an tuj tuj chk'ajlaj Arabá cucx o bet max tej tcub naj. Cyja'tzun tten cub tpa'n tib nima, ex atzun cye aj Israel e ic'x jlajxi nima mer tlugaril tnam Jericó. 17Atzun cye pal, akeju ikalte cax c'ubl tley Dios, ax e cub we' tmijil nima Jordán, minti' e yucch, ex tuj tzkij wa'lke'tok tejxi cyic'x baj cycyakil aj Israel tuj tzkij tuj nima Jordán.

will be added

X\