JOSUÉ 24

1Bajtzun tchmo'n Josué cycyakil c'loj cyiyjil aj Israel tuj lugar Siquem; e tzaj ttxco'n ke cytijil xjal, ke nejenel, ke jwes ex keju at cyoclen, ex e cub ten twitz Dios. 2Xi tma'n Josué cye cycyakil tnam xjal: —Atzun jlu in tma'n Kman aju Kdios ako' aj Israel: Atxix ojtxi najltok cyxe'chele Taré jlajxi nima Éufrates tuc'ix Abraham ex Nacor akeju tcy'ajal, ex in che c'uluntok cywitz junxitl dios. 3Atzun etz wi'ne cyxe'chele Abraham jlajxi nima, ex o bet tic' wu'ne tuj tcyakil tx'otx' Canaán. Tnejel xi nk'o'ne jun tcy'ajal Isaac tbi, ex wu'ne chmet cybaj tiyjil. 4Atzun te Isaac xi nk'o'ne cabe tcy'ajal, jun Jacob tbi ex juntl Esaú tbi. Te Esaú xi nk'o'ne lugar twi witz Seir, atzunte Jacob cyuc'ix ke tcy'ajal e je'x tuj Ejipt. 5Te tibajxi xi nsama'ne Moisés tuc'ix Aarón, ex e c'ixbiset aj Ejipt wu'ne tu'n nim c'ixbisabl; cyja'tzun tten e je'tze wu'ne tuj Ejipt. 6Tejtzun cyetz cyxe'chele tuj Ejipt, e oc lpe' aj Ejipt cyi'j tejxi cypon max ttzi mar Cyak Que'yin, cyuc'ix cycarwaj in che ajben tuj k'oj ex cyuc'ix ke xjal cyjax cyibaj chej, tu'n tcub cyi'j cyu'n. 7E cubsantzun nwitze, ex cub nk'o'ne nim klolj cyxol cyxe'chele cyuc'il aj Ejipt; atzun cye aj Ejipt tzaj mulk'aj mar wu'ne cyibaj ex e cyaj tjak'. Ax keye e que'yinte teju bant wu'ne tuj Ejipt. Te tibajxi jlu e tene nim tyemp tuj lugar tzkij tx'otx', 8ex e ul wi'ne tuj cytx'otx' aj Amorrey jlajxi nima Jordán tuj tjawitz k'ij. E k'ojin aj Amorrey cyi'je, pero ax kine in cub k'onte cye tuj cyk'abe, cubtzun cyi'j cyu'ne ex e octzune te tajwil cytx'otx'. 9Atzunte Balac aju tcy'ajal Zipor ex rey cye aj Moab, tej tul k'ojlel cyi'je, xi txocbaj Balaam aju tcy'ajal Beor tu'n, tu'ntzun ttzaj tkanin mya ba'n cyibaje. 10Pero minti' wak'e ambil te Balaam tu'n ttzaj tkanin mya ba'n cyibaje, nok o'cx cucx e cub cy'iwla'ne tu'n ex e clete wu'ne tuj tk'ab Balac. 11E ic'tztzune tuj nima Jordán ex e ule tuj Jericó. Ke xjal najl tuj Jericó e oc ten k'ojlel cyi'je, ax icx cybincha aj Amorrey, aj Ferezey, aj Canaán, aj Hetey, aj Gergesey, aj Hevey ex aj Jebusey, pero e je'x nk'o'ne cycyakil jlu tuj cyk'abe tu'n tcub cyi'j cyu'ne. 12Nej e je'x nsama'ne txkan ttxu sichel cywitze, ex ke xjal lu e je'l ok cywitze na'nxtok cypon canune cyi'j, ax icx ke cabe rey cye aj Amorrey. Minti' cub cyi'j cyu'ne tu'n cyspadiye ex mi'n tu'n xobl cypleche. 13Xi nk'o'ne cytx'otx'e aju mya cyu'ne baj cyak'nane, ex xi nk'o'ne ke tnam cyeye aju mya cyu'ne jaw cybincha'ne; atzun ja'lo najlkeye cyuj, ex in che lo'ne twitz uva ex twitz olivo aju mya cyu'ne cu'x cyawa'ne, chi Dios, chi Josué. 14Ax icx xi tma'n Josué cye: —Atzun ja'lo, cucx che nimane Kman ex che ajbene te tu'n tcyakil cyc'u'je ex axix toc cyu'ne. Cypa'mil cyibe cyi'j ke cydios cyxe'chele akeju e c'ulun cywitz jlajxi nima Éufrates ex tuj Ejipt; atzun cyeye che ajbene te Kman. 15Katzun cyc'i'ye che ajbene te Kman, entons bi'x cyximancuye ja'lo al e che ajbele; ka cye ke dios e ajben cyxe'chele cye jlajxi nima Éufrates, ex ka cye ke cydios aj Amorrey akeju najltok tuj tx'otx' lu jatum najl keye ja'lo. Atzun weye cyuc'ix cycyakil keju ate' tuj njaye, a ko ajbele te Kman, chi Josué. 16Atzun cye tnam xjal cyma: —Mlayx tz'el kpa'n kibe ti'j Kman, ex mlayx ko ajbene cye junxitl dios. 17Ate Kman etz k'inte ke ex cye kxe'chel tuj Ejipt jatum ato'tok te majen, ex tu'n o binchet nimcu binchben nim tipumal kwitz. Ate o clon ke ex o colon ki'j tuj tcyakil kbe tej kic' cyuj nimcu tnam. 18Ate Kman ic' lajonte cye cycyakil tnam xjal tuj kbe, ax icx o tbincha cyi'j aj Amorrey akeju najlke tzalu nej. Ax icx keye, te Kman ko ajbele, porque atzun Kdiosju, che chi. 19Atzunte Josué xi tma'n cye: —Mlay bant cyu'ne tu'n cyajbene te Kman, porque ate Kman Dios xjante, minti' in cub tuj twitz tu'n kc'ulun twitz junxitl dios, ex mlayx tzic'x tu'n aju cyile ex cybinchbene mya ba'n. 20Ka ma cyaj cycoline ex ka ma che ajbene cye junxitl dios, ax icxte Kman c'oquel meltz'aj cyi'je tu'n ttzaj tk'o'n mya ba'n cyibaje, ex che bajel naje tu'n, masque otok tbincha nimcu ba'n cyeye nej. 21Atzun cye tnam xjal tzaj cytzak'we'n: —Ax toc, pero keye mi'n kbinchaye icju, nok o'cx te Kman ko ajbele. 22Atzunte Josué xi tma'n cye: —Ax keye testiw cyi'je, tu'nju ma jaw cysc'o'ne tu'n cyajbene te Kman. —Ax ko'ye, che chi tzaj cytzak'we'n. 23Entons cyxon exe ke junxitl dios ate' cyuc'ile, ex che ajbentzune te Kman tu'n tcyakil cyanmiye, aju Kdios aj Israel ko', chi Josué cye. 24Atzun cye tnam xjal tzaj cytzak'we'n: —Ko ajbele te Kman Dios ex ko nimale te. 25Ax k'ij lu ex tujx Siquem, twitz Josué cyaj bant ti'j jun yol cyu'n aj Israel tuc'il Dios. Xi tk'o'n Josué ke ley ex ke mandamyent cye, 26ex cyaj ttz'iban jlu tuj libro te tley Dios. Te tibajxi tzaj ti'n jun abj matij, ex cub tk'o'n tjak' jun wi' tze' c'ol ttxlaj tja Kman, 27ex xi tma'n cye cycyakil tnam xjal cyja': —Aju abj lu c'ajbel te jun techal te ke, ex atzunju c'ajbel te testiw ti'j tcyakil yol ma tma Kman ke; c'oquel te jun testiw cyi'je, tu'ntzun mi'n tel cypa'n cyibe ti'j Cydiose. 28Te tibajxi jlu xi tma'n Josué cye xjal tu'n taj teyle junjun tuj ttx'otx'. 29Te tibajxi jlu, cyimtzun Josué aju tcy'ajal Nun ex tmajen Kman, tej otok japun jun syent tuc' laj abk'i tu'n. 30Cu'x maku'n tujx ttx'otx', tuj lugar Timnat-sera aju ta' tuj tiwitz tx'otx' cye aj Efraín ti'jxi witz Gaas. 31Ke aj Israel e ajben te Kman tej itz'xtok Josué, ax icx te tibajxi, tej itz'xtok ke cytijil xjal, akeju ax e cyaj ten tcyimlenxi Josué ex o cyil tcyakilju ba'n o tbincha Kman cye aj Israel. 32Ke tbakil José, aju tzaj cyi'n aj Israel tuj Ejipt, atzun cu'x cymaku'n tuj Siquem, tuj tx'otx' aju otok lak'et tu'n Jacob cye tcy'ajal Hamor aju tman Siquem tu'n jun syent sak pwak. Aju tx'otx' lu oc te cyetzbil ke tiyjil José. 33Tej tcyim Eleazar aju tcy'ajal Aarón, cu'x maku'n twi' jun tal witz tuj ttx'otx' Finees aju tcy'ajal, aju tzaj k'o'n te tuj tiwitz tx'otx' cye aj Efraín.

will be added

X\