JOSUÉ 22

1E tzajtzun ttxco'n Josué ke tiyjil Rubén cyuc'ix ke tiyjil Gad ex mij tiyjil Manasés, 2ex xi tma'n cye cyja': Ma japun cyu'ne tcyakilju o tma Moisés cyeye, ex ma japun cyu'ne tcyakilju xi nma'ne cyeye. 3Tuj enter tyemp ma jatz, ax icx ja'lo, minti' ma cyaj cycoline ke cyermaniye, ex ma japun cyu'ne aju orden tzaj tma'n Kman Dios. 4Atzun ja'lo ma tzaj tk'o'n Kman Dios ojlabl cye cyermaniye, ic tza'n tzaj ttziyan. Cyja'tzun cyaj meltz'aje tuj cyjaye, tuj tx'otx' xi k'o'n cyeye tu'n Moisés aju tmajen Kman, tuj tumlal tjawitz k'ij te nima Jordán. 5Nok o'cx cxel nma'ne cyeye tu'n cucx cyjapun ke mandamyent cyu'ne, cyuc'ix ke ley xi k'o'n cyeye tu'n Moisés aju tmajen Kman, tej tmante cyja': Cyc'ujlame Kman aju Cydiose, cucx che bete tuj tbe, cynimanxe ke tmandamyent, che lpeque ti'j, ex che ajbene te tu'n tcyakil cyanmiye ex tu'n tcyakil cyc'u'je, chitzun Moisés, chi Josué cye. 6Ax icx xi tma'n Josué cye cyja': —Cyajtzune tuj cytx'otx'e ja'lo tuc'il nimxix k'inumabl ex nimcu alumaj, tuc'ix k'an pwak, sak pwak, k'an c'uxbil, c'uxbil ex nimcu xbalun. Cysipan cube cyxol cyermaniye aju ma tz'el cyi'ne cye aj k'oj. Te tibajxi jlu e cubtzun cy'iwla'n tu'n Josué, ex baj cyk'olben cyib ex e ajtzun cyja. Otok txi tk'o'n Moisés cytx'otx' mij tiyjil Manasés tuj tx'otx' Basán, ex atzun cye mijtl, xi tk'o'n Josué cytx'otx' cyxol mastl aj Israel tuj telex k'ij te nima Jordán. 9Cyja'tzun tten, akeju tiyjil Rubén, cyuc'ix ke tiyjil Gad ex mij tiyjil Manasés, el cypa'n cyib cyi'j txkantl aj Israel tuj Silo tuj tx'otx' Canaán, tu'ntzun cyaj meltz'aj tuj cytx'otx' tuj tx'otx' Galaad, aju tx'otx' otok txi k'o'n cye, ic tza'nx otok txi tma'n Kman te Moisés. 10Tejtzun cypon ke tiyjil Rubén, cyuc'ix ke tiyjil Gad ex cyuc'ix mij tiyjil Manasés ttzi nima Jordán, ate'xtok tuj tx'otx' Canaán, jaw cybincha'n jun matij altar ttzi nima Jordán. 11Tejtzun cybinte txkantl aj Israel ka ake tiyjil Rubén cyuc'ix ke tiyjil Gad ex mij tiyjil Manasés otok jaw cybincha'n jun altar tuj tmojonil tx'otx' Canaán, ttzi nima Jordán tuj cytx'otx' aj Israel, 12baj cychmon cyib tuj Silo tu'n cyxi' k'ojlel cyi'j. 13Nej xi cysama'n Finees aju tcy'ajal pal Eleazar, tu'n t-xi' tuj Galaad jatum ate' ke tiyjil Rubén, tiyjil Gad ex mij tiyjil Manasés. 14Cyuc'ix laj nejenel ma'xix cyoclen cyxol aj Israel e je'x tuc'il Finees; jun te teyle junjun c'loj cyiyjil, ex nejenel ke cye cycyakil keju at cyxilen cyuc'il. 15Cycyakil ke jlu e je'x tuj Galaad jatum ate'tok ke tiyjil Rubén, ke tiyjil Gad, cyuc'ix mij tiyjil Manasés, ex xi cyma'n cye cyja': 16—Ke tnam xjal etzan tu'n Kman cyajbil tu'n cybinte tiku'n ma che binchane il twitz Kdios ako' aj Israel. ¿Tiku'n ma cyaj cycoline ex ma jaw cybincha'ne jun altar tu'n tjaw cyi'n cyibe ti'j? 17¿Baka nok ch'in aju il o cybincha aj Israel t-xe witz Peor? Tu'ntzunju il lu cucx ato'x tuj mya ba'n, masque o che cyim nimcu xjal etzan tu'n Dios. 18Ax icxtzun cyeye ja'lo, ma tz'el cypa'n cyibe ti'j Kman. Ka ma jaw cyi'n cyibe ti'j Kman, ax icx te, nchi'jlo tzaj tk'oj cyi'j cycyakil tnam xjal aj Israel. 19Katzun mya ba'n ma tz'ela tuj cywitze aju tx'otx' ma cyc'ame, ba'n tu'n cytzaje tuj tx'otx' te Kman jatum ta' tja. Cytzyume jun piẍ tx'otx' kxole, pero mi'n jaw cyi'n cyibe ti'j Kman ex mi ki'je, porque ma jaw cybincha'ne juntl altar, part ti'j altar te Kman aju Kdios. 20Cyna'ntze aju tbincha Acán aju tcy'ajal Zera; o binchan il tu'nju tzaj ti'n aju otok tma Dios bi'x tu'n tnaj, ex nok tu'n te tlaj tzaj tk'oj Kman cyi'j cycyakil tnam xjal aj Israel, ex mya o'cx te Acán o naj tu'n tlaj til, che chi. 21Atzun cye tiyjil Rubén, cyuc'ix ke tiyjil Gad ex mij tiyjil Manasés xi cytzak'we'n cye ke nejenel cye aj Israel cyja': 22—Ate Kman aju Dios ma'xix toclen cywitz cycyakil keju nno'c cydiosin xjal, ba'n tu'n alcye in ko ximane ti'j, ax icx cyeye ba'n tu'n cybinteye; katzun in ko ximane ti'j tu'n tjaw ki'n kibe ti'j, ex ka tu'n tel kpa'n kibe ti'j, ba'ntzun tu'n tcub kcastiwoye tu'n. 23Katzun ma jaw kbincha'ne ju altar lu tu'n tel kpa'n kibe ti'j Kman, ex ka tu'n tcub kpatune oyaj tibaj, akeju patun in che cub, ex ka ke oyaj ti'j twitz awal ex ka ke chojbil te mojbabl tibil, ba'n tu'n koque tuj xjel ti'j tu'n Kman. 24Ax toc ma kbinchaye jlu porque mi'n kajbile tu'n cymante ke cyc'wa'le mas yajxi cye keju keye kc'wa'l: ¿Ti cyoclene ti'j Kman aju Cydios aj Israel? 25Ate Kman ma cub k'onte nima Jordán te mojon kxol, akeye tiyjil Rubén ex tiyjil Gad, cyja'tzun minti' cyoclene ti'j Kman, mya yajcu che chi. Cyja'tzun, mya yajcu cyu'n cyeye cyc'wa'l jacu bant tu'n mi'n cyniman te Kman keju keye kc'wa'l. 26Cyja'tzun cub kximane tu'n tjaw kbincha'ne jun altar, pero mya tu'n tajben te patbil oyaj te Kman, ex mi tu'n tcub k'ot juntl chojbil tibaj, 27nok o'cx tu'n tajben te jun techal te cyeye ex te keye ex te cye ke kiyjil che ul itz'j te tibajxi, tu'ntzun kajbene te Kman ex tu'n kpone tuj tja cyuc'il koyaje patun in che cub, cyuc'ix ke chojbil il ex ke chojbil te mojbabl tibil. Cyja'tzun, akeju cyiyjile mlay txi cyma'n cye ke keye kiyjile cyja': Cyeye minti' cyoclene ti'j Kman, jacu che chi. 28Cyja'tzun o kmaye: Ka at jun ma k'mante jlu keye ex ka cye ke kiyjile che ul itz'j te tibajxi, atzun keye jacu txi ktzak'we'ne cyja': Cyque'yinxe aju altar jaw cybincha'n ke kxe'chele, ic que'yin ic tza'n altar in ajben te Kman, pero mya tu'n tcub patit oyaj tibaj ex mi ke chojbil, nok o'cx tu'n tajben te jun techal kxol, che chilo. 29Awt Dios onin keye tu'n mi'n tjaw ki'n kibe ti'j, ex tu'n mi'n tcyaj kcoline tu'nju ma jaw kbincha'ne juntl altar, porque mya tu'n tcub patit oyaj tibaj, ex mi tu'n tcub k'ot oyaj twitz awal ex ka tu'n tcub patit txkantl chojbil tibaj altar lu, nok o'cx cbel k'ot chojbil ex oyaj tibaj altar tcubsa'n twitz tja Kman aju Dios, che chi xi cyma'n. 30Atzunte pal Finees, cyuc'ix ke nejenel cye tnam xjal ex ke nejenel cye junjun c'loj cyiyjil aj Israel, akeju uc'in tu'n Finees, tej cybinte aju o cyma ke tiyjil Rubén, ke tiyjil Gad ex mij tiyjil Manasés, ba'n e'la jlu tuj cywitz. 31Atzunte Finees aju tcy'ajal pal Eleazar, xi tma'n cye: —Matzun tz'el knic'e ti'j ja'lo ka ax ta' Kman kuc'il, porque minti' ma jaw cyi'n cyibe ti'j, ex cyja'tzun ma ko clet cyu'ne tu'n mi'n tcub kcastiw tu'n Kman. 32Te tibajxi jlu, baj tk'olben tib Finees cyuc'il, ax icx ke nejenel uc'in tu'n baj cyk'olben cyib cyuc'il, e ajtztzun meltz'aj tuj tx'otx' Galaad tu'n cyul tuj tx'otx' Canaán jatum ate'tok ke aj Israel. Tejtzun t-xi cyma'n cye keju ate' tuj Canaán aju otok tzaj cytzak'we'n ke txkantl cyiyjil, 33aju tzak'webl lu ba'n e'la tuj cywitz ex jaw cynimsa'n tbi Dios. Tu'ntzun jlu ya minti'tl e yolin tu'n cyoc tzokpaj cyi'j ke tiyjil Rubén ex tiyjil Gad ex mi tu'n tnaj cytx'otx' cyu'n. 34Atzun ke tiyjil Rubén, cyuc'ix ke tiyjil Gad, oc cyk'o'n tbi altar lu Testiw, tu'nju cyma: Atzunju altar lu c'ajbel te testiw kxol, ka atzun Kman Diosju.

will be added

X\