1 E je'x ke nejenel cye teyle junjun c'loj tiyjil Leví tu'n cyyolin tuc'il pal Eleazar, tuc'il Josué ex cyuc'il ke nejenel cye teyle junjun c'loj cyiyjil aj Israel. 2 E pon tuj Silo tuj tx'otx' Canaán ex xi cyma'n cye cyja': O tzaj tma'n Kman te Moisés tu'n ttzaj tk'o'n ke tnam keye jatum tu'n knajane cyuj, cyuc'ix ke cojbil te cywabl kwacẍe. 3 Xitzun cyk'o'n aj Israel junjun tnam ti'jx cye cyetzbil te cye aj Leví, cyuc'ix ke cojbil te cywabl wacẍ, ic tza'nx otok tma Kman. 4 Tnejel jaw swert cyi'j teyle junjun c'loj tiyjil Coat aju tcy'ajal Leví. O cyc'am aj Coat, akeju tiyjil pal Aarón, oxlaj tnam, akeju cyetok ke tiyjil Judá, tiyjil Simeón ex tiyjil Benjamín. 5 Atzun cye txkantl tiyjil Coat o cyc'am lajtl tnam, akeju cyetok ke tiyjil Efraín, tiyjil Dan ex mij tiyjil Manasés. 6 Xi k'o'n oxlaj tnam te cye ke tiyjil Gersón, ic tza'nx swert jaw cyi'j. Akeju tnam lu cyetok ke tiyjil Isacar, tiyjil Aser, tiyjil Neftalí ex mijtl tiyjil Manasés aju at tuj Basán. 7 Atzun cye cycyakil tiyjil Merari xi k'o'n cablaj tnam, akeju cyetok ke tiyjil Rubén, tiyjil Gad ex tiyjil Zabulón. 8 Tu'n swert cub cysipan aj Israel ke tnam cyxol aj Leví, cyuc'ix ke cojbil te cywabl wacẍ, ic tza'nx otok tma Kman te Moisés. 9 Atzun ke tnam lu xi cyk'o'n tiyjil Judá ex tiyjil Simeón 10 te cye aj Leví akeju tiyjil Coat, ex elni ke ti'j Aarón, porque ake e camban ti'j swert jaw nej: 11 Tuj lugar tiwitz tx'otx' cye aj Judá xi cyk'o'n tnam Quiriat-arba cye, aju ax juntl tbi Hebrón, cyuc'ix ke cojbil te cywabl wacẍ ate' cyi'jele. (Ate Arba tman ju nintz xjal Anac.) 12 Pero aju tx'otx' ex ke aldey teju tnam lu xi cyk'o'n te tetzbil Caleb aju tcy'ajal Jefone. 13 Otok tz'oc tnam Hebrón te cycolbil cyib xjal, akeju otok cub jun xjal cyu'n, ex xi k'o'n te cye ke tiyjil Aarón, cyuc'ix ke tnam lu: Libna, 14 Jatir, Estemoa, 15 Holón, Debir, 16 Aín, Juta ex Bet-semes; belaj tnam tu'n tcyakilx xi cyk'o'n ke tiyjil Judá ex ke tiyjil Simeón cye, cyuc'ix ke cojbil te cywabl wacẍ ate' cyi'jele. 17 Ex ke tiyjil Benjamín xi cyk'o'n ke tnam lu: Gabaón, Geba, 18 Anatot ex Almón; cyaje tnam tu'n tcyakilx, cyuc'ix ke cojbil te cywabl wacẍ ate' cyi'jele. 19 Cyja'tzun, akeju tnam e oc te cye ke pal akeju tiyjil Aarón, japun oxlaj tu'n tcyakilx, cyuc'ix ke cojbil te cywabl wacẍ ate' cyi'jele. 20 Atzun cye txkantl tiyjil Leví, akeju tiyjil Coat, cub sipan junjun tnam cyxol, akeju tnam cye tiyjil Efraín. 21 Tuj tiwitz tx'otx' cye aj Efraín xi k'o'n tnam Siquem, aju tnam te cycolbil cyib xjal akeju otok cub jun xjal cyu'n, ex xi k'o'ntl tnam Gezer, 22 tuc'ix Kibsaim ex Bet-horón; cyaje tnam tu'n tcyakilx, cyuc'ix ke cojbil te cywabl wacẍ ate' cyi'jele. 23 Ax icx ke tiyjil Dan xi cyk'o'n ke tnam lu cye: Elteque, Gibetón, 24 Ajalón ex Gat-rimón; cyaje tnam tu'n tcyakilx, cyuc'ix ke cojbil te cywabl wacẍ ate' cyi'jele. 25 Ex ke mij tiyjil Manasés xi cyk'o'n tnam Taanac cye, tuc'ix tnam Gat-rimón, cyuc'ix ke cojbil te cywabl wacẍ ate' cyi'jele. 26 Cyja'tzun, akeju tnam oc te cye txkantl c'loj tiyjil Coat, bant laj tu'n tcyakilx, cyuc'ix ke cojbil te cywabl wacẍ ate' cyi'jele. 27 Xi k'o'n cabe tnam cye aj Leví, akeju tiyjil Gersón, cyu'n mij tiyjil Manasés, cyuc'ix ke cojbil te cywabl wacẍ ate' cyi'jele, ex atzun ke jlu: Tnam Golán aju at tuj Basán, aju tnam te cycolbil cyib xjal akeju otok cub jun xjal cyu'n, tuc'ix tnam Beestera. 28 Ke tiyjil Isacar xi cyk'o'n ke tnam lu cye: Cisón, Daberat, 29 Jarmut ex En-ganim; cyaje tnam tu'n tcyakilx, cyuc'ix ke cojbil te cywabl wacẍ ate' cyi'jele. 30 Ke tiyjil Aser xi cyk'o'n ke tnam lu cye: Miseal, Abdón, 31 Helcat ex Rehob; cyaje tnam tu'n tcyakilx, cyuc'ix ke cojbil te cywabl wacẍ ate' cyi'jele. 32 Ke tiyjil Neftalí xi cyk'o'n ox tnam cye, cyuc'ix ke cojbil te cywabl wacẍ ate' cyi'jele, ex atzun ke jlu: Tnam Cedes aju at tuj Galiley, aju tnam te cycolbil cyib xjal akeju otok cub jun xjal cyu'n, tuc'ix tnam Hamot-dor ex tnam Cartán. 33 Cyja'tzun, akeju tnam oc te cye ke tiyjil Gersón, japun oxlaj tu'n tcyakilx, cyuc'ix ke cojbil te cywabl wacẍ ate' cyi'jele. 34 Atzun ke tiyjil Zabulón xi cyk'o'n cye txkantl tiyjil Leví, akeju tiyjil Merari, ke tnam lu: Jocneam, Carta, 35 Dimna ex Naalal; cyaje tnam tu'n tcyakilx, cyuc'ix ke cojbil te cywabl wacẍ ate' cyi'jele. 36 Ax icx ke tiyjil Rubén xi cyk'o'n ke tnam lu cye: Beser, Jahaza, 37 Cademot ex Mefaat; cyaje tnam tu'n tcyakilx, cyuc'ix ke cojbil te cywabl wacẍ ate' cyi'jele. 38 Ex ke tiyjil Gad xi cyk'o'n tnam Ramot cye, aju at tuj Galaad, aju tnam te cycolbil cyib xjal akeju otok cub jun xjal cyu'n, cyuc'ix ke tnam Mahanaim, 39 Hesbón ex Jazer; cyaje tnam tu'n tcyakilx, cyuc'ix ke cojbil te cywabl wacẍ ate' cyi'jele. 40 Cyja'tzun, akeju tnam e oc te cye txkantl tiyjil Leví, akeju tiyjil Merari, japun cablaj tu'n tcyakilx. 41 Akeju tnam e oc te cye aj Leví, ax cyxol aj Israel, bant 48 tnam tu'n tcyakilx, cyuc'ix ke cojbil te cywabl wacẍ ate' cyi'jele. 42 Aju cojbil te cywabl wacẍ ax ate' cyi'jele tnam, ex iclex tten junjun tnam lu. 43 Cyja'tzun tten xi tk'o'n Kman cye aj Israel tcyakil tx'otx' otok txi ttziyan cye ke cyxe'chel, atzun e cub ten ex axtzun e najan tuj. 44 O japun tu'n Kman aju yol otok txi ttziyan, ex o che ten tuj txubtxaj tu'n tuj tcyakil tx'otx'. Mi jun aj k'oj cyi'j bant tu'n cywe' cywitz, porque tu'n Kman e tzaj tk'o'n tcyakil aj k'oj cyi'j tuj cyk'ab. 45 Minti' jun yol minti'wt o japun ti'j tcyakilju tzaj ttziyan Kman tu'n tbinchante cye aj Israel; tcyakil o japun tu'n.
