JOSUÉ 2

1Tej ate'tok tuj lugar Sitim e je'x t-sama'n Josué cabe xinak tuj ewaj, ex xi tma'n cye tu'n cyxi' que'yilte tx'otx' ex tnam Jericó. E je'xtzun ex e pon tuj tnam Jericó tuj tja jun xu'j jawni twitz cyuc'il xinak, Rahab tbi, ex atzun e posadyin te konic'an. 2Pero at jun pon k'mal tkanil tuc'il rey cye aj Jericó cyja': —Te kale ja'lo ma che ul cabe aj Israel que'yilte tnam. 3Xitzun t-sama'n rey jun xjal k'malte te Rahab: —K'i'metza ke xinak ma che ul tuc'ila, akeju ate'cx tuj tjaya, porque que'yil tx'otx' ma che ul xjal lu, ex at nnic' ti'j cyc'u'j. 4Atzunte xu'j otok che'x tewan ke xinak ex xi tma'n: —Ax toc at cabe xinak ma che ul aj wuc'ile, pero minti' ma nbiye jatum tzajnike. 5Tej xkoc yupj, bi'x ẍe ex, porque atzun or in che lamet ke tpwertil tnam. Minti' ba'n wu'ne tza'n ma che'x, pero ka ma che'x lpe' naje cyi'j, jacu che pon cnet cyu'ne, chi xu'j. 6Ex otok che jax tewan xu'j ma twi tja, ex atzun ewan ke tjak' junjun che'l lino cyjaxsa'n tu'n cytzkij. 7Cubtzun be cyu'n xjal, akeju e je'x t-sama'n rey tu'n cypon cnet ke betin xjal cyu'n, ex atzun e je'x tuj be in xi' tlugaril nima Jordán, max tejxi cypon tuj xajbil a'. O'cx tej cyex ke xjal lu, e lamet naj ke tpwertil tnam. 8Na'nxtok cytan xjal e pon que'yilte tnam, jax Rahab cyuc'il twi ja ex xi tma'n cye: 9—Ba'n wu'ne, ate Kman ma txi k'onte tx'otx' lu cyeye, porque axte ma tzaj k'onte nim t-xobil ki'je tu'ntzun ttzaj kxobile cywitze. Cycyakil xjal najl tuj tx'otx' lu nimxix in che xob cywitze. 10Bi'n ku'ne, tej cyetze tuj Ejipt, tu'n Dios bi'x tzkij mar Cyak Que'yin, tu'ntzun cyic'tze tuj. Ax icx bi'n ku'ne, cyu'ne e naj ke rey Sehón ex Og, akeju cyrey aj Amorrey najlketok jlajxi nima Jordán. 11Tzaj nimxix kxobile tej kbinteye jlu, cyja'tzun mi a'l jun jacu ten tipun tu'n tk'ojin cyuc'ile, porque ate Kman aju Cydiose, atzun aju Dios at tuj cya'j ax icx at tzalu twitz tx'otx'. 12Cyja'tzun in chin cubsane cywitze tu'n ttzaj cyma'ne bi'x ja'lo jun yol axix toc twitz Kman, tu'n cybinchanteye ba'n cye keju ate' tuj njaye, ic tza'n weye ma nbinchaye ba'n cyeye. Bi'x cyma'n cyaje jun techal axix toc, 13ka tu'n mi'n cub cybyo'ne nmane ex ntxu'ye ex ke mastl wermaniye, cyuc'ix cycyakil xjal ate' cyuc'il. Ko cyclome tu'n mi'n knaje, chi Rahab. 14Atzun cye xi cytzak'we'n: —Ka mi xbant ku'ne aju ma tzaj tkanina keye, ba'n tu'n kcyime tu'n Dios, pero mi'n baj tma'na jlu. Oc ttzaj tk'o'n Kman aju tx'otx' lu keye, ax toc oc kbinchaye ba'n teya, che chi. 15Tu'nju atzun najltok Rahab tuj jun ja binchamaj twi muro te tnam, cyja'tzun akeju cabe xinak lu e ex ttzi ventan, ex ti'j sakbak e cu'x tu'n Rahab. 16Ex xi tma'n cye: —Cyxi'ye ewal cyibe cywi' ke witz tu'ntzun mi'n cycnete cyu'n keju in che jyon cyi'je. Cyewanx cyibe ma chixin ox k'ij ocxi cyajtz meltz'aj keju in che jyon cyi'je. Te tibajxi jlu ba'n tu'n tcub be cyu'ne. 17Atzun cye xi cytzak'we'n: —Cbantel ku'ne aju ma txi ktziyane teya ex aju ma tzaj tkanina tu'n kbinchanteye teya. 18Pero oc koctze tuj tx'otx' lu, bix cu'x tyobina ttzi ventan jatum ma ko cu'tz tk'o'na, aju cy'jaj lu cyak que'yin, ex chmon baja cycyakil termaniya tuj tjaya, tuc'ix tmana ex ttxu'ya ex cycyakil keju at t-xilen tmana cyuc'il. 19Ka at jun cye ma tz'ex ti'jxi tjaya, cymel tu'n tex tlaj ex mya ko'ye at kile. Katzun at jun keye ma tz'oc tzokpaj ti'j jun cyxol keju ate' tuj tjaya, atzun ko'ye at kile ti'j tcamic. 20Ex ka ma tz'el tkanil jlu tu'na, mlaytzun japun ku'ne aju ma txi ktziyane teya, che chi. 21—Ba'n icju, cyja'na ctelba ku'n, chi xu'j. Bajtzun cyk'olben cyib ex cub be cyu'n ke xinak. Te tibajxitzun oc tc'alo'n Rahab ttzi tventan tja aju cy'jaj cyak que'yin. 22Akeju cabe xinak lu e je'x ewal cyib cywi witz ox k'ij, atzun cye xinak in che jyontok cyi'j tuj tcyakil part ex minti' e cnet cyu'n. Tej tbaj cygan tu'n cyjyon cyi'j, e ajtz meltz'aj tu'n cyul tuj tnam Jericó. 23E cu'tztzun ke cabe xinak cywi witz, e ic'x tuj nima Jordán, e ul jatum ta' Josué aju tcy'ajal Nun, ex xi cytx'olba'n tcyakilju otok baj cyi'j. 24Ex xi cyma'n te Josué: Ma tzaj tk'o'n Kman tcyakil tx'otx' lu te ke, porque cycyakil xjal najlke tuj tnam lu in che xob wen tu'n klaj.

will be added

X\