JOSUÉ 19

1Aju tcabin piẍ tx'otx' jaw swert ti'j, atzun oc te cye teyle junjun c'loj tiyjil Simeón. Aju tx'otx' lu atzun ta' tuj cytx'otx' ke tiyjil Judá, 2ex akeju tnam e cyaj ten tuj cycwent, atzun ke jlu: Beerseba, Seba, Molada, 3Hazar-sual, Bala, Ezem, 4Eltolad, Betul, Horma, 5Siclag, Bet-marcabot, Hazar-susa, 6Bet-lebaot ex tuc'ix Saruhén; oxlaj tnam tu'n tcyakilx ex cyuc'ix ke aldey ate' cyi'jele. 7Ax icx oc te cye akeju tnam Aín, Rimón, Eter ex Asán; cyaje tnam cyuc'ix ke aldey ate' cyi'jele, 8ex cyuc'ix ke aldey ate' max tuj Baalat-beer, aju ax juntl tbi Ramat aju at tuj tx'otx' Néguev. Atzun tx'otx' lu oc te cye teyle junjun c'loj tiyjil Simeón. 9Aju cyetzbil ke tiyjil Simeón atzun ta' tuj cytx'otx' ke tiyjil Judá, porque ke tiyjil Judá nim tx'otx' otok txi k'o'n cye. Tu'ntzunju, xi k'o'n cyetzbil ke tiyjil Simeón ti'jx tx'otx' aju otok txi k'o'n cye tiyjil Judá. 10Aju toxin piẍ tx'otx' jaw swert ti'j, atzun oc te cye teyle junjun c'loj tiyjil Zabulón. Aju tmojonil cytx'otx' ponin max tuj lugar Sarid tbi, 11xi'yintl tuj telex k'ij tu'n tpon max tuj lugar Marala ex ic'nitl tu'n tpon tuj lugar Dabeset, tu'ntzun tpon baj ttzi tk'ab xak tcubsa'n tumlal tnam Jocneam. 12Aju mojon xi'yin tuj lugar Sarid cyja' in xi' tuj tjawitz k'ij tu'n tpon max tuj lugar Quislot-tabor, ex atzun nnic' tuj lugar Daberat ex jawnix tu'n tjapun tuj lugar Jafía. 13Ex atzun xi'yintl mojon tuj tjawitz k'ij te lugar Gat-hefer, ic'ni tuj lugar Ita-cazín tbi, ponin max tuj tnam Rimón, ex atzun in k'on welt tuj lugar Nea. 14Aju tmojonil tuj tbank'ab k'ij, atzun in k'on welt max tuj lugar Hanatón, ex atzun nno'cpun baj tuj tchk'ajlajil tx'otx' Jefte-el. 15Attok cablaj tnam tuj tx'otx' lu, cyuc'ix ke aldey ate' cyi'jele, cyvesin cyib cyuc'il, ex ajun ke tnam lu ate' cyxol: Catat, Naalal, Simrón, Idala ex Belén. 16Atzun tx'otx' lu oc te cye teyle junjun c'loj tiyjil Zabulón, cyuc'ix ke tnam ate' cyuj ex cyuc'ix ke aldey ate' cyi'jele. 17Aju tcyajin piẍ tx'otx' jaw swert ti'j, atzunju oc te cye teyle junjun c'loj tiyjil Isacar, 18ex ke tnam ate' tuj cytx'otx', atzun ke jlu: Jezreel, Quesulot, Sunem, 19Hafaraim, Sihón, Anaharat, 20Rabit, Quisión, Abez, 21Remet, En-ganim, En-hada ex Bet-pases. 22Aju tmojonil cytx'otx' ponin max tuj tnam Tabor, tuj tnam Sahazima, tuj tnam Bet-semes, ex atzun ponin baj ttzi nima Jordán; kaklaj tnam tu'n tcyakilx, ex cyuc'ix ke aldey ate' cyi'jele. 23Atzun tx'otx' lu oc te cye teyle junjun c'loj tiyjil Isacar, cyuc'ix ke tnam ate' tuj ex cyuc'ix ke aldey ate' cyi'jele tnam. 24Aju tjwe'yin piẍ tx'otx' jaw swert ti'j, atzunju oc te cye teyle junjun c'loj tiyjil Aser, 25ex ke tnam ate' tuj cytx'otx', atzun ke jlu: Helcat, Halí, Betén, Acsaf, 26Alamelec, Amad ex Miseal. Aju tmojonil tuj telex k'ij ponin max twi witz Carmelo ex ttzi nima Sihor-libnat. 27Aju tmojonil tuj tjawitz k'ij xi'yni tu'n tjapun tuj lugar Bet-dagón ex jawnix ti'j cytx'otx' tiyjil Zabulón tuj tchk'ajlajil tx'otx' Jefte-el, ex tuj tbank'ab k'ij cyuj tnam Bet-emec ex Neiel ex elnix tibaj tnam Cabul, 28cyja'tzun, tuc'ix tnam Abdón xi k'o'n cye, tuc'ix Rehob, Hamón ex Caná, ex pon baj max tuj nintz tnam Sidón. 29Te tibajxi, aju mojon in k'on welt max tuj tnam Ramá ex ponin max tuj tnam Tiro aju tnam toc muro ti'j, tu'ntzun tpon tuj tnam Hosa ex cubintz ttzi'yile Nintz mar in cubil tuj tx'otx' Aczib. 30Tuc'ix tnam Uma oc te cye, tuc'ix Afec ex Rehob. Tu'n tcyakilx o japun jun tajlal te 22 tnam, cyuc'ix ke aldey ate' cyi'jele. 31Atzun ke tnam lu cyuc'ix ke aldey ate' cyi'jele, e oc te cye teyle junjun c'loj tiyjil Aser. 32Aju tkakin piẍ tx'otx' jaw swert ti'j, atzunju oc te cye teyle junjun c'loj tiyjil Neftalí. 33Aju cytx'otx', atzun xi'ynix tmojonil tuj tnam Helef ex ic'ni cyuj ke tnam Alón-saananim, Adami-neceb ex Jabneel ex ponin max tuj tnam Lacum, tu'n tpon ttzi nima Jordán. 34Aju tmojonil tuj telex k'ij, atzun in xi ke' tuj tnam Aznot-tabor ex tuj tnam Hucoc; cyja'tzun aju tmojonil mij cytx'otx' tuj tnayaj k'ij tmojon tib tuc'il cytx'otx' tiyjil Zabulón, ex mijtl cytx'otx' tuj telex k'ij tmojon tib tuc'il cytx'otx' tiyjil Aser. Aju tmojonil cytx'otx' tiyjil Neftalí tuj tjawitz k'ij, atzun nima Jordán. 35Akeju tnam toc muro cyi'j e oc te cye, atzun ke jlu: Sidim, Zer, Hamat, Racat, Cineret, 36Adama, Ramá, Hazor, 37Cedes, Edrei, En-hazor, 38Irón, Migdal-el, Horem, Bet-anat ex Bet-semes. Belajlaj tnam tu'n tcyakilx ex cyuc'ix ke aldey ate' cyi'jele. 39Atzun tx'otx' lu, cyuc'ix ke tnam ate' tuj ex cyuc'ix ke aldey ate' cyi'jele tnam, e oc te cye teyle junjun c'loj tiyjil Neftalí. 40Aju twukin piẍ tx'otx' jaw swert ti'j, atzunju oc te cye teyle junjun c'loj tiyjil Dan. 41Tuj tx'otx' lu atzun ate' ke tnam lu: Zora, Estaol, Ir-semes, 42Saalabín, Ajalón, Jetla, 43Elón, Timnat, Ecrón, 44Elteque, Gibetón, Baalat, 45Jehud, Bene-berac, Gat-rimón, 46Mejarcón ex Racón, tuc'ix ju tx'otx' tcubsa'n tumlal twitz tnam Jope. 47Pero como minti' canun tx'otx' lu te cye, cyja'tzun e je'x ke tiyjil Dan tu'n cyoc tzokpaj ti'j tnam Lesem, ex o tzyet tnam cyu'n. Tcublenxi cybyo'n cycyakil xjal najl tuj tnam lu, e cyaj ten najal tuj ex baj cych'expu'n tbi. Dan oc cyk'o'n tbi tnam te jun nimbil te ktzan cyxe'chel. 48Atzun tx'otx' lu, cyuc'ix ke tnam ate' tuj ex ke aldey ate' cyi'jele tnam, e oc te cye teyle junjun c'loj tiyjil Dan. 49Tbajlenxi cysipan aj Israel aju tx'otx' attok tu'n toc te cye teyle junjun c'loj cyiyjil, xi cyk'o'n jun piẍ te Josué ttx'otx', ax cyxolx, 50ic tza'nx otok tma Kman. Xi tkanin Josué aju tnam Timnat-sera tbi, aju tcubsa'n tuj tiwitz tx'otx' cye aj Efraín, ex atzunju xi cyk'o'n te. Jawtzun tbincha'n Josué juntl maj aju tnam lu ex axtzun o najan tuj. 51Tcyakil tx'otx' lu, aju jaw swert ti'j tu'n Eleazar tuc'ix Josué ex cyuc'ix ke nejenel te tnam tu'n tcub sipet cyxol cycyakil c'loj cyiyjil aj Israel, o bant jlu twitz Kman, ttzi ja xbalun te mojbabl tibil, max tuj Silo, ex cyja'tzun tten o baj cysipan tcyakil tx'otx'.

will be added

X\