JOSUÉ 16

1Aju tx'otx' oc te cye ke tiyjil José ic tza'nx swert jaw; aju tmojonil cytx'otx' tuj tjawitz k'ij, atzun in tzaj ke' ttzi nima Jordán tumlal ke twi a' te Jericó, ex atzun xi'yintl tu'n tpon max tuj tzkij tx'otx', ex jawinx tuj Jericó tu'n tjapun tuj tiwitz tx'otx' Betel. 2Ic'nitl tuj Betel (aju ax juntl tbi Luz), atzun exni tuj cytx'otx' aj Arquit tu'n tpon max tuj tnam Atarot; 3ex xi'yintl tuj telex k'ij tu'n tex tuj cytx'otx' aj Jafletey, elnix tuj tnam Bet-horón aju tcu'tz cubni, elnix tuj tnam Gezer, ex atzun xi'yni tu'n tpon baj max ttzi Nintz mar. 4Atzunju etzbil o cyc'am ke tiyjil Manasés ex tiyjil Efraín, akeju tiyjil José. 5Aju tmojonil cytx'otx' tiyjil Efraín tuj tjawitz k'ij xi k'o'n cye ic tza'nx tajlal junjun c'loj cyiyjil, atzun xi'yni ke' tuj lugar Atarot-adar, ponin max tuj tnam Bet-horón te jawni, 6ex atzun xi'yni tu'n tpon max ttzi Nintz mar. Aju tmojonil cytx'otx' tuj tbank'ab k'ij, atzun ponin baj tuj lugar Micmetat ex cubintztl tmojonil tuj tjawitz k'ij, ponin baj max tuj lugar Taanat-silo, tu'ntzun tic' tuj lugar Janoa, 7tu'n tcubil tuj lugar Atarot ex Naarat ex tu'n tocx tuj Jericó tu'n tpon baj ttzi nima Jordán. 8Ax icx aju tmojonil te jawni, xi'ynix tuj tnam Tapúa, elnix tuj telex k'ij ex ponin baj ttzi tk'ab xak Caná ex ttzi Nintz mar. Atzunju tx'otx' lu oc te cye tiyjil Efraín, ex cub sipan cyxol teyle junjun c'loj cyiyjil. 9Ex at junjun tnam ex aldey ate' tuj cytx'otx' tiyjil Manasés e oc te cye tiyjil Efraín. 10Pero minti' e ex cylajo'n ke tiyjil Efraín ke aj Canaán akeju najl tuj tnam Gezer, nok o'cx ax e cyaj cyk'o'n tu'n cynajan cyxol, pero e oc cyk'o'n te cymajen tu'n cybinchante ak'untl cyuwxix. Ax icx ja'lo ax najl ke aj Canaán cyxol.

will be added

X\