JOSUÉ 14

1Atzun tx'otx' lu cyc'am aj Israel te cyetzbil tuj tx'otx' Canaán, ic tza'nx xi k'o'n cye tu'n pal Eleazar, tuc'ix Josué aju tcy'ajal Nun, cyuc'ix ke nejenel cye junjun c'loj cyiyjil aj Israel. 2Tu'n swert cub sipan tx'otx' cyxol belaj tuc' mij c'loj cyiyjil aj Israel, ic tza'nx otok tma Kman te Moisés tu'n tbant tu'n. 3Otok txi tk'o'n Moisés tx'otx' taj jlajxi nima Jordán cye tiyjil Rubén, cye tiyjil Gad ex cye mij tiyjil Manasés; atzun cye aj Leví minti' xi tk'o'n cytx'otx'. 4Ke tiyjil José te cabe c'loj e el, jun ti'j tiyjil Manasés ex juntl ti'j tiyjil Efraín, atzun cye aj Leví minti' jun piẍ cytx'otx' cyc'am, nok o'cx o cyc'am ke tnam jatum tu'n cynajan, cyuc'ix ke cojbil ate' cyi'jele, tu'ntzun cyten ke cywacẍ cyuj, cyuc'ix ke cyẍne'l. 5Atzun cye aj Israel o bant cyu'n tu'n tbaj sipet tx'otx' ic tza'nx otok tma Kman te Moisés. 6Ke tiyjil Judá e je'x tuj Gilgal tu'n cyyolin tuc'il Josué, ex atzunte Caleb aju aj Cenesey, aju tcy'ajal Jefone, xi tma'n te Josué: Ba'n tu'na aju tzaj tma'n Kman te Moisés aju tmajen tuj lugar Cades-barnea, aju o tma ti'ja ex wi'je. 7Otok chin japune twi' 40 abk'i tej ntzaj sama'ne tu'n Moisés max tuj lugar Cades-barnea que'yilte tx'otx' Canaán, ex tej npon meltz'aje, xi nma'ne te axix toc ti'j tcyakilju otok wile. 8Atzun keju e tzaj wuc'ile, tzaj baj cyc'u'j tnam xjal tu'n cyyol, atzun weye o japun wu'ne aju tajbil Kman aju Ndiose. 9Tzajtzun tma'n Moisés jun yol axix toc weye cyja': Aju tx'otx' jatum ma cub aj tkana tibaj, c'oquel te teya te jumajx ex te cye ke tiyjila, porque ma japun tu'na aju tajbil Kman aju Ndiose. 10Ma bajxi 45 abk'i ttzajlen tma'n Kman jlu te Moisés, atxix tej ate'xtok ke aj Israel tuj lugar tzkij tx'otx', ex tu'n Dios, lu itz'x kine ic tza'nxju yol tzaj ttziyan. Ja'lo ma chin japune twi' 85 abk'i, 11pero atx wipune ic tza'nx tej ntzaj sama'ne tu'n Moisés que'yilte tx'otx' Canaán; atx wipune tu'n nbete ex tu'n nk'ojine ic tza'nx ojtxi. 12Cyja'tzun in xi nkanine teya ja'lo tu'n ttzaj tk'o'na weye tiwitz tx'otx' aju tzaj ttziyan Kman weye. Atxix ojtxi ba'n tu'na, ke tiyjil nintz xjal Anac najlke ma chixin, ex nmak ke cytanmi ex toc muro cyi'j. Pero awt Kman ten wuc'ile ex onin weye tu'n cyex nlajo'ne ic tza'nx o tma, chi Caleb. 13Cubtzun cy'iwla'n Caleb aju tcy'ajal Jefone tu'n Josué, ex xi tk'o'n tnam Hebrón tu'n toc te te. 14Cyja'tzun oc tnam Hebrón te te Caleb aju tcy'ajal Jefone, aju aj Senesey, ex ttenx ja'lo porque o japun tu'n Caleb aju tajbil Kman, aju Cydios aj Israel. 15Aju tbi tnam Hebrón toctok nej Quiriat-arba, porque Arba atzun tbi jun xinak ma'xix toclen cyxol ke tiyjil nintz xjal Anac. Te tibajxi jlu o we' k'oj ex o cyaj ten tnam xjal tuj txubtxaj.

will be added

X\