JOSUÉ 13

1Tej ttijin Josué tzaj tma'n Kman te: Ma tijina ex atx nim tx'otx' na'nx ttzyet. 2Ex atzun ke tx'otx' na'nx ttzyet cyu'ne jlu: Tcyakil cytx'otx' aj Filistey ex cytx'otx' aj Gesurey, 3xi'yin ke' ttzi nima Sihor tuj tumlal tjawitz k'ij te Ejipt, ex ponin baj max tuj tmojonil tnam Ecrón tuj tbank'ab k'ij, aju cytx'otx' aj Canaán; ex tuj tx'otx' lu at jwe' nejenel aj Filistey, nejenel ke cyuj ke tnam lu: Gaza, Asdod, Ascalón, Gat ex Ecrón. Ax icx na'nx ttzyet tx'otx' cye aj Avey 4tuj tumlal tnayaj k'ij, ex tcyakil cytx'otx' aj Canaán xi'yinx cyuj tnam cye aj Sidón ex ponin baj max tuj lugar Afec tbi, tuj tmojonil cytx'otx' aj Amorrey. 5Na'nx ttzyet cytx'otx' aj Giblit ex tcyakil tx'otx' Líbano tuj tumlal tjawitz k'ij, xi'yinx tuj Baal-gad t-xe witz Hermón ex ponin baj max ttxlaj tnam Hamat. 6Che elex nlajo'ne cywitz aj Israel ke xjal aj Sidón ex cycyakil keju najlke cyuj tiwitz tx'otx', tzajnix twi witz Líbano ex ponin baj max tuj lugar Misrefot-maim. Atzun teya, sipan cuba tx'otx' ex k'onxa te cyetzbil aj Israel ic tza'nx o txi nma'ne teya. 7Sipan cuba tx'otx' cyxol belaj c'loj cyiyjil aj Israel cyuc'ix mijtl tiyjil Manasés. 8Ke tiyjil Rubén ex ke tiyjil Gad, cyuc'ix mij tiyjil Manasés o cyc'am cyetzbil tej t-xi tk'o'n Moisés cytx'otx' tuj tumlal tjawitz k'ij te nima Jordán. 9Aju tx'otx' oc te cyetzbil, xi'yinx ke' tuj tnam Aroer aju tcub ttzi tk'ab xak Arnón, tuc'ixju tnam tcub tuj tmij chk'ajlaj, ex tcyakil chk'ajlaj te tnam Medeba, ponin baj max jatum ta' tnam Dibón, 10cyuc'ix cycyakil tnam te Sehón aju rey cye aj Amorrey, aju in cawintok tuj tnam Hesbón, ex ponin baj max ti'j tmojonil cytx'otx' aj Amón. 11Ax icx oc te cye aju tx'otx' Galaad, tuc'ix cytx'otx' aj Gesurey, tuc'ix cytx'otx' aj Maaca, tuc'ix witz Hermón, tuc'ix tcyakil tx'otx' Basán, ponin baj max tuj tnam Salca, 12ex tuc'ix tcyakil tx'otx' tcyajsa'ntok tjak' tcawbil Og aju rey te Basán, aju mancbil cyiyjil aj Refait ex in cawintok tuj tnam Astarot ex tuj tnam Edrei. Otok cub cyi'j cycyakil jlu tu'n Moisés ex otok che ex tlajo'n tuj lugar lu. 13Atzun ke xjal aj Gesur ex aj Maaca minti' e je'x lajo'n tuj tx'otx' lu, nok o'cx ax e cyaj ten tu'n cynajan cyxol aj Israel ex ax ate' ja'lo. 14Minti' xi tk'o'n Moisés cyetzbil tiyjil Leví, porque te cye tu'n cyoc ke oyaj in che cub patit te jun nimbil te Kman Dios, ic tza'nx otok tma Kman cye. 15Cub t-sipan Moisés tx'otx' cyxol tiyjil Rubén ic tza'nx cybaj junjun c'loj cyiyjil. 16Cyja'tzun, aju cytx'otx' tzaj ke' max tuj tnam Aroer ttzi tk'ab xak Arnón, jawnix tuj tnam tcub tuj tmij chk'ajlaj ex jawnix tuj tnam Medeba, 17ex pon baj max tuj tnam Hesbón ex cyuj cycyakil tnam ate' tuj chk'ajlaj, ex atzun ke tnam jlu: Dibón, Bamot-baal, Bet-baal-meón, 18Jahaza, Cademot, Mefaat, 19Quiriataim, Sibma, Zaret-sahar aju tcubsa'n twi tal witz tuj chk'ajlaj, 20Bet-peor, Bet-jesimot, tuc'ixju tx'otx' toc tc'u'j witz Pisga, 21ke tnam ate' tuj chk'ajlaj ex tcyakil tx'otx' jatum otok cawin Sehón aju rey cye aj Amorrey, aju najltok tuj tnam Hesbón. Tu'n Moisés otok cub ti'j Sehón ex cyi'j ke nejenel cye aj Madián, akeju in che ajbentok te Sehón, ex atzun ke jlu: Evi, Requem, Zur, Hur, ex Reba. 22Ax icx cub cybyo'n aj Israel Balaam aju ba'n k'ijin, aju tcy'ajal Beor, ex nimcu mastl. 23Aju cytx'otx' ke tiyjil Rubén aju cub sipan cyxol ic tza'nx cyajlal junjun c'loj cyiyjil, atzun cycyakil ke tnam lu, cyuc'ix ke cy-aldey, ex ponin baj max ttzi nima Jordán. 24Ax icx cub t-sipan Moisés tx'otx' cyxol ke tiyjil Gad ic tza'nx cyajlal junjun c'loj cyiyjil. 25Aju tnam Jazer cyuc'ix cycyakil tnam ate' tuj Galaad oc te cye, tuc'ix mij cytx'otx' aj Amón, ponin baj max jatum ta' tnam Aroer aju tcubsa'n twitz tnam Rabá, 26tuc'ix tx'otx' tcubsa'n t-xol tnam Hesbón, tuc'il tnam Ramat-mizpa, tuc'ix tnam Betonim ex tuc'ix tx'otx' tcubsa'n t-xol tnam Mahanaim tuc'il tmojonil tnam Debir. 27Atzun ke tnam ate' tuj chk'ajlaj akeju e oc te cye, atzun ke jlu: Bet-aram, Bet-nimra, Sucot ex Zafón; akeju ate'tok tjak' tcawbil Sehón aju rey te Hesbón. Cyja'tzun aju cytx'otx' aj Gad xi'ynix tuj tjawitz k'ij te nima Jordán, ponin baj max ttzi lagun Cineret. 28Atzun ke tnam lu cyuc'ix ke cy-aldey ate' cyi'jele e oc te cye ke tiyjil Gad, ic tza'nx cyajlal junjun c'loj cyiyjil. 29Ax icx xi tk'o'n Moisés cytx'otx' mij tiyjil Manasés; cub t-sipan ic tza'n cyajlal junjun c'loj cyiyjil. 30Oc te cye tcyakil tx'otx' tzyu'ntok tu'n Og aju rey te Basán, tcyakil tx'otx' xi'ynix jatum ta' tnam Mahanaim, cyuc'ix 60 tnam otok cub cyi'j tu'n Jair, 31tuc'ix mij tx'otx' Galaad, cyuc'ix ke tnam Astarot ex Edrei jatum in cawintok Og aju rey te Basán. Tcyakil jlu oc cye mij tiyjil Maquir aju tcy'ajal Manasés, ic tza'n cyajlal junjun c'loj cyiyjil. 32Atzun tx'otx' lu xi tk'o'n Moisés te cyetzbil tej ate'tok tuj tchk'ajlajil tx'otx' Moab, tuj tumlal tjawitz k'ij te nima Jordán, aju tcub twitz tnam Jericó. 33Atzun cye ke tiyjil Leví minti' xi tk'o'n Moisés tx'otx' te cyetzbil, nok o'cx o tma: Ate Kman aju Cydios aj Israel, atzun cyetzbil.

will be added

X\