JOSUÉ 11

1Tej tbinte Jabín aju rey te tnam Hazor tcyakilju otok baj, xi t-sama'n ke t-sanjel tu'n tbant ti'j jun cyyol tuc'il Jobab aju rey te tnam Madón, ex cyuc'il ke rey te tnam Simrón ex te tnam Acsaf, 2cyuc'il cycyakil ke rey ate' tuj tiwitz tx'otx' tuj tbank'ab k'ij, cyuc'il keju ate' tuj chk'ajlaj ttzi nima Jordán ex tjak' lagun Cineret, cyuc'il keju ate' tuj chk'ajlaj, ex cyuc'il keju ate' tuj tx'otx' tuj telex k'ij tumlal tnam Dor, 3cyuc'il ke aj Canaán tumlal tjawitz k'ij ex telex k'ij, cyuc'il aj Amorrey, aj Hetey, aj Ferezey, aj Jebusey akeju ate' cywi witz, ex ke aj Hevey akeju ate' t-xe witz Hermón tuj tx'otx' Mizpa. 4Cycyakiltzun ke rey lu e tzaj, cyuc'ix ke cysoldad, cyuc'ix nimxix chej k'i'n cyu'n ex cyuc'ix ke carwaj in che ajben tuj k'oj. Nimxix cyajlal ke soldad, minti' o bant cyajlanjtz, ic cyajlal ic tza'n ttxa tza'n at ttzi mar. 5Cycyakil ke jlu o bant ti'j jun cyyol, ex atzun baj cychmon cyib ttzi a' Merom tu'ntzun cyoc tzokpaj cyi'j aj Israel. 6Atzunte Kman tzaj tma'n te Josué: Mi'n xoba cywitz. Wu'ne che bel tz'ak tuj cyk'abe tlokju nchi'j ex che bel cybyo'ne cycyakil. Atzun teya bix baj tkesina tbotx'il cykan ke cychej, ex bix tz'oc tk'o'na cyk'ak'al ke carwaj in che ajben tuj k'oj. 7Atzunte Josué cyuc'ix cycyakil ke t-soldad nok minaben e oc tzokpaj cyi'j ttzi a' Merom. 8Ate Kman xi k'onte cye tuj cyk'ab aj Israel, e oc tzokpaj cyi'j ex e je'x lpe' cyi'j tejxi cypon tuj nintz tnam Sidón ex tuj lugar Misrefot-maim, ex atzun tuj tumlal tjawitz k'ij e pon max tuj tchk'ajlajil tx'otx' Mizpa. Misicyer jun cye ke xjal lu o cyaj ank'in. 9O japun tu'n Josué ic tza'nx otok tma Kman te, baj tkesin tbotx'il cykan cychej ke aj k'oj, ex e baj tpatun ke cycarwaj in che ajben tuj k'oj. 10Te tibajxi ajtz meltz'aj Josué ex cub ti'j tnam Hazor tu'n. Aju tnam lu mas at toclen cywitz mastl tnam. Ex cub tbyo'n Josué aju rey at tuj tnam, 11cyuc'ix cycyakil ke xjal najlke tuj tnam. Tcyakil o naj cyu'n te jumajx ex cub cypatun tnam. 12Ax icx o tbincha Josué cyi'j mastl tnam akeju otok moje' cyyol tuc'il Hazor; e tzyet tu'n ex e cub tbyo'n ke rey ate' cyuj, ex e cub t-xitun te jumajx ic tza'nx otok cyaj tma'n Moisés aju tmajen Kman. 13Pero minti' cub cypatun ke aj Israel ke tnam binchamaj cyibaj cytx'akan tnam cywi' tal witz, o'cxcu tnam Hazor cub cypatun. 14Cub cybyo'n tu'n spad cycyakil ke xjal najlke cyuj ke tnam lu, misicyer jun xjal o cyaj ank'in. Atzun ke alumaj, cyuc'ix cycyakil ti'xti at cyuj ke tnam lu, tzaj cyi'n tu'n toc te cye. 15Ate Kman xi k'onte ke orden te Moisés, ex atzunte Moisés xi k'onte te Josué, ex tcyakil o japun tu'n Josué; misicyer jun yol cyaj naj tu'n ti'j tcyakilju otok tzaj tma'n Kman te Moisés. 16O che tzyet cycyakil lugar lu tu'n Josué: Aju tiwitz tx'otx', tcyakil tx'otx' Néguev, tcyakil tx'otx' Gosén, tuc'ix tx'otx' tibaj mlaj ex chk'ajlaj ttzi nima Jordán, tuc'ix tcyakil tiwitz tx'otx' ex ke chk'ajlaj cye aj Israel. 17Tzajnix ke' jatum ta' witz Halac nikayin ttxlaj lugar Seir, ex max tuj ju lugar Baal-gad aju tcubsa'n tuj chk'ajlaj Líbano t-xe witz Hermón; e tzyet ke rey te tx'otx' lu tu'n Josué ex e cub tbyo'n cycyakil, 18ex nim tyemp o k'ojin Josué cyuc'il ke rey lu. 19Nok junx tnam o bant ti'j cyyol cyuc'il aj Israel; atzun ke xjal aj Hevey akeju najl tuj tnam Gabaón. Cycyakil mastl tnam oc k'oj cyi'j ex e tzyet, 20porque ate Kman cub cyuwsante cyanmi ke aj k'oj tu'n tjaw cyi'n cyib cyi'j aj Israel, tu'ntzun cynaj te jumajx cyu'n aj Israel, ex tu'n mi'n ttzaj tz'e'y cyc'u'j aj Israel cyi'j, ic tza'nx otok tma Kman te Moisés. 21Ax tuj tyemp lu cub cyi'j cycyakil aj Anac tu'n Josué, akeju najl twi witz Hebrón, tuj tnam Debir, tuj tnam Anab ex tuj tcyakil tiwitz tx'otx' te Judá ex te Israel. Bi'x e naj tu'n ex cub t-xitun ke cytanmi. 22Cyja'tzun misicyer jun tiyjil nintz xjal Anac cyaj ank'in tuj tcyakil tx'otx' cye aj Israel. O'cx e cyaj ten ke tiyjil Anac tuj tnam Gaza, tuj tnam Gat ex tuj tnam Asdod. 23Cyja'tzun o tzyet tcyakil tx'otx' tu'n Josué ic tza'nx otok tma Kman te Moisés. Ax icx cub t-sipan Josué tx'otx' cyxol cyiyjil aj Israel tu'ntzun toc te cyetzbil. Te tibajxi jlu we' k'oj ex e cyaj ten tnam xjal tuj txubtxaj.

will be added

X\